Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Sut’ichu Bibliapi profeciakuna?

Tukuy atiyniyoq Diosllan hamuq tiempopaq imakuna kananta willan (Amós 3:7). Adán Evaq huchallikusqanku tiempokunamantaraqmi Cristo otaq Mesías hamunanmanta willarqanña. Hinaspapas willarqanmi hunt’aq sonqo Abrahampa mirayninmanta huk kamachikuq hamunanta, paymi kasukuq runakunata ch’uya kawsayman apanan karqan (Génesis 22:18; Isaías 53:4, 5). Nillarqantaqmi prometesqa Mesiasqa Belén llaqtapi nacenanta. (Leey Miqueas 5:2.)

700 watakuna ñawpaqta Jesús manaraq naceshaqtinmi, Bibliaqa willarqanña huk doncella sipasmanta nacenanta, cheqnisqa kananta, huchakuna pampachananpaq kawsayninta qonanta hinaspa qhapaqkunawan p’ampasqa kanantapas (Isaías 7:14; 53:3, 9, 12). 500 watakuna ñawpaqtan willarqanña huk asnopi sillaykuspa Jerusalén llaqtaman haykunanta chaymantataq 30 qolqerayku traicionasqa kananta. Chhaynatapunin hunt’akurqan. (Leey Zacarías 9:9; 11:12.)

2. ¿Tiempollanpi hunt’akunanpaqchu Dios imatapas willan?

500 watakuna ñawpaqtan, Biblia willarqan ima watapi Mesías rikhurimunanta. Chayamunanpaq hayk’a tiempo pasananmantan watapi yupasqa semanakuna karqan, huk ‘semanataq’ tupan 7 watawan. Profecía willan iskay t’aqamanta: 7 semanakuna, 62 semanakunapiwan. Llapanpin 69 semanakuna otaq 483 watakuna. ¿Hayk’aqmi qallarirqan? Bibliaq nisqan hina, templota hatarichinanpaq Jerusalén llaqtaman Nehemías chayasqanmantapachan. Persia llaqtamanta willakuykunan tupachin 455 watawan (Nehemías 2:1-5). 483 watakuna qhepamanmi 29 watapi Jesús bautizakurqan. ¡K’apaqtan chay profecía hunt’akurqan! (Leey Daniel 9: 25.)

  3. ¿Hunt’akushanchu kay tiempopi profeciakuna?

Jesusmi willarqanña kunan tiempopaq profeciakunamanta. Chaypin willarqan Diospa Gobiernonmanta allin willakuykuna predicakunanmanta, chaykunan Diosta munakuq runakunata thak-kayta qonan karqan. Chay Gobiernon kay millay pachata tukuchinqa. (Leey Mateo 24:14, 21, 22.)

Bibliapi profeciakunan willarqanña manaraq p’uchukay chayamushaqtin imakuna kananmanta. Willarqanñan runakuna imaymana fabricasqankuwan kay pachata allichanankumantaqa astawan thuninankumanta. Astawanmi ñak’ariy kanan karqan mikhuypa pisiyapusqanwan, guerrakuna, pacha chhaphchiykuna onqoykunapas kasqanrayku (Lucas 21:11; Apocalipsis 11:18). Millay kawsaypas astawanmi kanan karqan. Chhayna millay tiempokuna kashaqtintaq Jesuspa qatikuqninkunaqa llapa suyukunaman Diospa Gobiernonmanta allin willakuykunata willananku karqan. (Leey Mateo 24:3, 7, 8; 2 Timoteo 3:1-5.)

4. ¿Iman kanqa runakunapaq hamuq tiempopi?

Tukuy atiyniyoq Diosninchisqa hamuq tiempopin kasukuq runakunata bendecinqa. Diospa Gobiernonpi Mesías Jesucriston waranqa wata kay pachata kamachinqa akllasqa cristianokunawan kuska. Wañusqakunapas kawsarimpunqakun hinaspan Diosta reqsispa wiñay kawsayta chaskikunqaku. Llapa runan onqoyninkumanta qhaliyapunqa, manañan onqoypas wañuypas kapunqañachu. (Leey Apocalipsis 5:10; 20:6, 12; 21:4, 5.)

Astawan yachayta munanki chayqa ¿Imatapunin Biblia yachachin? nisqa librota qhaway 23-25 paginakunata, 197-201 paginakunatawan, chataqa Jehová Diospa testigonkunan ruwan.