DIOSTA ALLINTA REQSIY
“Mañakuychis qosunkichismi”
Jesuspa huknin qatikuqninmi nirqan: “Señorniy yachachiwayku mañakuyta”, nispa (Lucas 11:1). Chaytan iskay rikch’anachiywan Jesús yachachiwanchis imaynatas Jehová Diosmanta mañakusunman uyariwananchispaq chayta. Hayk’aqllapas kayta tapukurqankichu: “¿Dios uyariwanchu mañakusqayta?”, nispa. Chhayna kaqtinqa Jesuspa kutichisqanqa allinniykipaqmi kanqa (Leey Lucas 11:5-13).
Ñawpaq rikch’anachiyqa, Diosmanta mañakuq runamantan rimashan (Lucas 11:5-8). Chayqa rimashan imaynatas kuska tutata huk runaq amigon chayamun manataq imapas qonanpaq kanchu chaymantan. Kuska tutaña chaypas wasiyoqqa usqhayllan wasimasinmanta kinsa t’antata mañakuq rin. Wasimasinqa familianta mana rikch’achiyta munaspas mana hatarimuyta munanchu. Ichaqa chay runaqa ima munasqanta qomunankaman yapa-yapamanta rimapayan. *
¿Imatan chay rikch’anachiy yachachiwanchis mañakuymanta? Mañakuspaqa qowananchiskaman maskhananchis, kicharimuwananchiskaman waqyakunanchis (Lucas 11:9, 10). ¿Imaraykun Jesús chay rikch’anachiymanta rimasharqan? ¿Mana qoykukuq runa hinachu Diosninchis kanman? Manan. Aswanpas chay rikch’anachiypi mana qoykukuq runamantaqa, Diosqa munashanmi imachus mañakusqanchista qowananchispaq, ichaqa iñiywanmi chaytaqa mañakunanchis Diospa munayniyman hina. Chay iñiytan rikuchinchis yapa-yapamanta mañakuspa. Sichus imatapas chaskiytapuni munanchis chayqa yapa-yapamanta mañakunanchis, ichaqa confiananchis Jehová Dios qowananchispi (Marcos 11:24; 1 Juan 5:14).
Iskay kaq rikch’anachiypin ‘mañakusqata uyariq’ Jehová Diosmantan rimashan (Salmo 65:2). Jesusmi nirqan: “¿Mayqen taytataq qankunamanta churin challwata mañakuqtin, mach’aqwayta qoykunman? Runtuta mañakuqtinpas, ¿alacrán kuruta qoykunman?”, nispa. Arí, munakuq taytaqa mana hayk’aqpas mana allinkuntaqa qonmanchu wawanta k’irinanpaqqa. Nillarqantaqmi: ‘Qankunapas mana allin kashaspa wawaykichisman allin kaqkunataqa qoyta yachankichismi, chaymantapas astawanraqmi hanaq pachapi kaq Yayaykichisqa mañakuqninkunaman santo espiritunta qonqa’, nispa (Lucas 11:11-13; Mateo 7:11).
Diosqa munashanmi imachus mañakusqanchista qowananchispaq, ichaqa iñiywanmi chaytaqa mañakunanchis
Chay rikch’anachiywanmi Jesusqa yachachiwanchis ‘mañakusqata Uyariq’ Jehová Diosqa munashanmi munakuq Tayta hina imachus necesitasqanchista qowananchispaq. Chayraykun Jehová Diosta serviqkunaqa mana manchakuspa imachus munasqankuta mañakuyta atinkuman. Yachasqanchis hina Diosqa allinninchista munashan chaymi tukuy sonqowan chaskikunanchis mañakusqanchista, manaña munasqanchisman hinachu kutichimuwanchis chaypas. *
^ párr. 4 Jesuspa tiemponpi costumbrekunamantan rimashan. Judiokunaqa ancha allinpaqmi qhawariqku qoykukuq kayta. Familiakunaqa huk p’unchayllapaqmi t’antataqa ruwakuqku, mana aypaqtintaqmi wasimasinmanta aynikamuqku. Waqcha familiakunataq huk cuartollapi panpapitaqmi puñuqku, pipas hatarispaqa rikch’achimanmi puñuqkunata.
^ párr. 7 ¿Imatapunin Biblia yachachin? libropi 17 capitulopin willashan imaynatas Jehová Dios mañakusqanchista uyariwasunman chayta. Chay librotaqa Jehová Diospa testigonkunan ruwan.
