Albertoqa soldadon karqan chunka watata hina, ninmi: “Curan bendeciwarqanku ‘Diosqa qankunawanmi kashan’, nispa. Ichaqa sonqoypin nirqani ‘Bibliaqa ninmi aman wañuchinkichu’, nispa. Chhaynaqa, ¿imaynapitaq ñoqari runa wañuchiq risaq?”, nispa.

Raulpas soldadon karqan Segunda Guerra Mundialpi. Huk kutinmi curata nirqan: “Qanqa barcoykuman seqamuspan soldadokunapaq Diosmanta mañapunki guerrapi ganamunaykupaq. Ichaqa, ¿manachu kaqllatataq ruwashanku enemigoykupas?”, nispa. Hinan curaqa kutichirqan: “Diospa ñanninkunaqa mana entiendeymi”, nispa.

¿Ima ninkin chhayna kutichisqanmanta? ¿Manachu sonqoykipaq hina? Chhayna kaqtinqa manan qanllachu chhaynapi tarikunki.

Jesusmi willarqan huknin kaq aswan hatun kamachikuy mayqenchus kasqanta, nirqanmi: “Runamasiykitan qan kikiykita hina munakunki”, nispa (Marcos 12:31). ¿Wakin nacionmanta runakunata munakunallapaqchu Jesús nisharqan? Manan. Qatikuqninkunatan nirqan: “Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:34, 35). Munanakusqankuqa sut’itan rikukunan karqan, chaypin hukniray hukkunamanta kananku karqan. Paykunaqa manan munankuchu runamasinku wañuchiyta, kawsayninkutapas qonkumanmi runamasinkurayku.

Chaytapunitaqmi ruwarqanku. Religionkunamanta rimaq qelqan nin: “Tertuliano, Orígenes runakunan niqku cristianokunaqa runamasinkuta mana wañuchiy munasqankuta, chayrayku Roma ejercitopipas mana kasqankuta”, nispa.

Jehová Diospa testigonkunaqa yaqa llapa nacionkunapin tarikunku. Mayqen nacionkunapipas guerra kaqtinqa, tukuy atisqankutan ruwanku munanakusqankuta rikuchinankupaq.

Ruanda nacionpin 1994 watapi hutu runakuna tutsi runakunawan maqanakurqanku, Jehová Diospa testigonkunaqa manan mayqen ladomantapas sayapakurqankuchu. Wañunankuña kaqtinpas utu Testigokunapas tutsi Testigokunapas yanapanakurqankun. Iskay hutu Testigokunan tutsi Testigokunata pakarqanku, chayta yacharqospan Interahamwe nisqamanta soldadokuna hutu Testigokunata hap’irqospanku nirqanku: “Tutsi runakunata yanapasqaykichismantan kayqa kanqa”, nispa. Hinan paykunata wañuchirqanku (Juan 15:13).

¿Ima ninkin chaymanta? ¿Testigokunaq chhayna kasqanku tupanchu munanakuymanta Jesuspa nisqanwan?