Askha runakunan hanaq pachaman ripuyta munanku wañupusqanku qhepaman. Jesusmi manaraq wañupushaspa huntʼaq sonqo apostolninkunaman prometerqan hanaq pachapi Taytanwan kuska kanankupaq (leey Juan 14:2).

¿Imapaqmi wakin runakuna rinqaku hanaq pachaman? ¿Imatan chaypi ruwanqaku? Jesuspa nisqan hina, paykunaqa reykunan kanqaku kay pachatataqmi kamachikamunqaku (leey Lucas 22:28-30; Apocalipsis 20:4).

Imaynan huk nacionta pisi runakunalla kamachin, chay hinatan hanaq pachamanta kamachikamuq runakunapas pisilla kanqaku, paykunallatan Jesusqa akllarqan hanaq pachapi kawsarichinanpaq (Lucas 12:32). Biblian willan haykʼa kasqankuta (leey Apocalipsis 14:1).

Ichaqa manan paykunallachu sumaq suyakuyniyoqqa kanqaku. Jesuspa kamachikusqanta kasukuq runakunapas wiñay kawsayniyoqmi kanqaku kay pacha paraíso kapuqtin (Juan 3:16). Saqraq kamachisqan pacha chinkaqtinmi wakin kasukuq runakunaqa mana wañuspalla chay sumaq kawsayman haykunqaku hukkunataq chaypiña kawsarimpunqaku (leey Salmo 37:29; Juan 5:28, 29).