Bibliapin willawanchis wakin atiyniyoq runakuna runamasinkuta sarunchasqankuta. Ahabmi 900 watakuna manaraq Jesús hamushaqtin Israelpi kamachirqan, paymi Nabotpa chakranta hap’ikapuyta munarqan. Chaymi Ahabpa warmin Jezabelqa yanqamanta tumpachispa Nabot-ta wañuchirqan qosantaq mana imatapas ruwarqanchu hark’ananpaq (1 Reyes 21:1-16; 2 Reyes 9:26). ¿Imaraykun Jehová Dios hinallata qhawarqan chay hina ruwaykunata?

Jehová Diosqa manan llullakuqchu (Tito 1:2). Qallariymantapachan Jehová Diosqa runakunaman willarqan payta mana kasukuqtinku wañunanku kasqanta, chaytaqmi pasarqanpas. Edén huertapi huchallikusqankumantapachan runakunaqa wañunchis. Qallariypi runamasinta sarunchaqqa Cainmi karqan, paymi wawqen Abelta wañuchirqan (Génesis 2:16, 17; 4:8).

Biblian willarqanña ‘runaqa runamasinta mana allinta ruwananpaq munaychakusqanta’ (Eclesiastés 8:9). Jehová Diosqa willarqanña Israel llaqtata millay reykuna kamachinanta, chaymi paykunaqa Diosman waqyakunanku karqan (1 Samuel 8:11-18). Yachayniyoq rey Salomonpas saruncharqanmi Israel llaqtata, askha impuestota mañaspa (1 Reyes 11:43; 12:3, 4). Huk reykunaqa Ahab hina aswan millayraqmi karqanku. Sichus Jehová Dios hark’anman karqan chay sarunchaykunata chayqa, ñawpaqpi rimasqan simikunaqa manachá cheqaqchu kanman karqan.

Hinaspapas Satanás nisqan hinaqa runakunaqa imatapas chaskinankuraykulla Diostaqa servinku (Job 1:9, 10; 2:4). Chayrayku sarunchaymanta Dios hark’awasunman chayqa, Satanaspa rimasqan hunt’akushanman. Chaymantapas runakunata imamantapas hark’anman chayqa, ninkumanmi: “Runaqa atinmi runamasinta allinta kamachiyta mana piqpa yanapaynillanwan”, nispa. Bibliaq nisqan hina runaqa manan kawsayninllantapas pusariyta atinchu (Jeremías 10:23). Chaymi Diospa Gobiernon hamunanta necesitanchis, chay Gobiernollan mana chanin kayta chinkachinqa.

¿Chay hinaqa hinallatachu Dios chaykuna kananta qhawashan? Manan. Ñawpaqtaqa: sut’imanmi horqon sarunchaqkunaq ruwasqanta. Bibliaqa sut’itan willan Nabot-ta wañuchinanpaq Jezabelpa imakuna ruwasqanta. Willantaqmi pin mana reparachikuspalla atiyniyoqkunata tanqashan runamasinkuta sarunchanankupaq chayta (Juan 14:30; 2 Corintios 11:14). ¿Pitaq payri? Satanasmi. Chaykunata sut’iman horqosqanwanmi yanapawanchis mana allin ruwaykunaman ñoqanchispas mana urmananchispaq, chhaynapin atisun wiñay kawsayman aypayta.

Iskay kaq: Diosmi prometewanchis sarunchaqkunata wañuchinanpaq. Chaytan ñawpaqpi ruwarqan Ahabwan Jezabelwan huk sarunchaqkunawanpas. Chaykunamanta yachasqanchiswanmi mana iskayanchischu hamuq tiempopi millay runakunata wañuchinanmanta (Salmo 52:1-5). Hinaspapas willawanchismi Diosqa pay munakuqkunaman sumaq kawsay qonanmanta. * Nabotpas wawankunapas kay pacha paraíso kaqtinmi chaypi tiyanqaku (Salmo 37:34).