Hungría nacionpi Székesfehérvár llaqtapin nacerqani, chay llaqtaqa 1.000 wata más ñawpaqmantaraqmi karqan. Ichaqa Segunda Guerra Mundial qhepamanmi chay llaqtaqa llakikunapaq hina karqan, chaytaqa yuyashaniraqmi.

Abueloykunaq ladonpin wiñarqani. Paykunataqa yuyarillanipunin, astawanqa abuelay Elizabethta. Paymi yanapawarqan Diospi iñinaypaq. Kinsa wataymantapachan sapa tuta Yayayku oracionta ruwachiwarqan. Ichaqa yaqa 30 wataypiraqmi entienderqani imachus nisqanta.

Papaywan mamaywanmi tuta-p’unchay llank’arqanku wasita rantikunankupaq, chaymi abueloykuna uywawarqanku. Ichaqa sapa sabadon familiantin huñukuspa mikhuq kayku, chaytaqa kunankamapas yuyarinin.

1958 watapin tayta-mamay wasita rantirqanku. ¡Kusikurqanin paykunawan kuska kawsasqaymanta! Ichaqa pisi tiempollan chayqa karqan, soqta killa qhepallamanmi papayqa cáncer onqoywan wañukapurqan.

Sinchitan llakikurqani; sapa kutin Diosta nirqani: “Valekurqaykin papayta yanapanaykipaq. ¿Imanaqtinmi mana uyariwarqankichu? ¡Maytan paywan kayta munarqani!”, nispa. Yachaytan munarqani papaywan imachus pasasqanta. Tapukuqmi kani: “¿Hanaq pachatachu ripun icha wiñaypaqchu wañukapun?”, nispa. Papankuwan kashaq wawakunata envidiakuq kani.

Unay tiempon panteonta yaqa sapa p’unchay riq kani. P’ampasqanku ladopi qonqorikuspa Diosta niq kani: “Diosníy, willaway maypin papay kashan”, nispa. Diostan mañakuq kani imapaqchus kawsasqanchista entiendechiwananpaq.

13 wataypi kashaqtiymi alemán rimayta yacharqani, chay rimaypi qelqakunata leespa tapuyniykunamanta yachanaypaq. 1967 watapin Alemania nacionpi tarikuq  Jena llaqtaman ripurqani. Alemaniamanta filósofo runakunaq libronta leerqani, astawanqa imapaqchus runa kawsanchis chayta entiendenaypaq. Allin yachaykunataña tarirqani chaypas, manan tapuyniykunaman sut’intachu kutichirqanku. Chaymi Diospa yanapayninta mañakushallarqani.

1970 watapin Hungría nacionman kutimpurqani, chaypin reqsinakurqani Rose esposaywan. Chay tiempopiqa Hungría nacionpin comunismo nisqa kamachikurqan, chaymi casarakuspayku hinalla Austria nacionman ripurqayku. Ñoqaykuqa piensarqayku chay qhepaman Australia nacionpi Sydney llaqtaman ripuyta, chay llaqtapin tioy tiyarqan.

Pisi tiempollapin Austria nacionpi llank’anata tarirqani. Huk p’unchaymi huk llank’aqmasiy niwarqan: “Bibliapin llapa tapuyniykipaq kutichiynin tarikun”, nispa. Hinaspa Bibliamanta willaq iskay librota qowarqan, kaq rato chay librokunata leerqani. Astawanmi yachayta munarqani, chaymi chay librokunata ruwamuq Jehová Diospa testigonkunaman qelqarqani huk qelqakunatawan qowanankupaq.

Huk wata casarakusqaykumanta aniversarioykupin huk Testigo visitamuwarqanku. Qelqakuna mañakusqaytan apamusqa, hinan niwarqan: “Biblia estudiayta munawaqchu”, nispa. Ñoqataq “riki” nirqani. ¡Ima hinaraqmi yachayta munarqani, chaymi sapa semana iskay kutita estudiarqayku tawa horata!

Jehová Diospa testigokuna Bibliamanta yachachiwasqankumanta anchata kusikurqani. Húngaro rimaypi Diospa sutinta rikuchiwasqankumantan admirakurqani. 27 watañan misaman risharqani, ichaqa manan hayk’aqpas Jehová sutita uyarirqanichu. ¡Bibliaqa sut’intan tapuyniykunaman kutichiwarqan! Bibliapin yacharqani wañupuq runa manaña imatapas yachasqanta, misk’itapas puñushanman hina kashasqanta (Eclesiastés 9:5, 10; Juan 11:11-15). Yachallarqanitaqmi hamuq tiempopi manaña wañuy kananta (Apocalipsis 21:3, 4). Kunanqa iñinin hamuq tiempopi ‘wañupuqkuna kawsarimpunankupi’, chay tiempopin papayta hukmanta rikusaq (Hechos 24:15).

Esposayqa tukuy sonqomantan yanapawarqan. Qowasqanku qelqatan iskay killallapi estudiayta tukurqayku. Testigokunaq llapa huñunakuyninmanmi rirqayku, sumaqta qhawariwasqanku huk hinalla kawsasqankupas sonqoykumanraq chayarqan (Juan 13:34, 35).

1976 watapin autoridadkuna autorizacionta qowarqanku Australiaman ripunaykupaq. Chayaspa hinallan Testigokunata maskharqayku. Familiankupas kaykuman hinatan tratawarqanku, hinan 1978 watapi bautizakapurqayku.

Kunanqa llapa tapuyniykumanmi kutichiyninta tarini. Reqsinitaqmi ancha munakuq Jehová Diosta (Santiago 4:8). Hinaspapas kusisqa sonqowanmi suyakushani kay pacha paraíso kapuqtin papay chaypi kawsarimpunanta (Juan 5:28, 29).

1989 watapin Hungría nacionman kutimpurqayku familiaykunata amigoykunata huk runakunatapas Bibliamanta yachachinaykupaq. Askha runakunamanmi Bibliamanta yachachirqayku, paykunamanta 70 hinan bautizakurqanku, mamaypas bautizakapurqan.

17 watata hinan Diosta valekurqani tapuyniykunaman kutichimunanpaq. Tapuyniykunaman kutichimusqanmantaqa 39 watañan pasarqon. Kunankamapas Dioswanqa rimashallanin, kunanmi ichaqa nini: “Gracias Diosníy tapuyniykunaman kutichimusqaykimanta”, nispa.