ÑAWPA tiempomantapachan manchakunapaq peliculakuna “anticristo” nisqa sutiwan lloqsimurqan, chhaynatan suticharqanku “papa” nisqakunatapas. Chaymi askha runakuna tapukunku: “¿Pitaq ‘anticristo’ nisqari? ¿Yanapawasunmanchu imallapipas pi kasqanta yachay?”, nispa. Bibliapipunin chay suti rikhurin phisqa kutita, willantaqmi pi kasqanta. Chaymanta kunan yachasun.

Apóstol Juanllan cartakuna qelqasqanpi willarqan “anticristo” nisqamanta. Ñawpaqta qelqasqan cartapin nin: “P’uchukay tiempoqa ñan chayamushanña, uyarirqankichismi Cristo contra sayariqpa [anticristo] hamunanta, chaymi kunanpas askhaña Cristoq contran sayariqkuna rikhurimunku, chayraykun yachanchis p’uchukay tiempo chayamushasqanta. Paykunan ñoqanchis ukhumanta lloqsipurqanku, ichaqa manan iñiqmasinchiskunapunichu karqanku [...]. ¿Pitaq llullari? Pichus Jesusta ‘manan Cristochu’ niqmi llullaqa. Chay runan Cristoq contranpi sayariqqa, paymi Yayatapas Churitapas negaqqa”, nispa (1 Juan 2:18, 19, 22).

Chaypin apóstol Juan nirqan: ‘Askhañan Cristoq contran sayariqkuna [anticristokuna]’, nispa. Chaypin yachanchis “anticristo” nisqaqa mana hukllachu kasqanta. Paykunaqa llullakunan kanku, manataqmi munankuchu runakuna Jesucristomanta Taytanmantapas yachanankuta. Chay “anticristo” nisqaqa kanku “Criston kani” niq runakunan otaq “Cristoq rantinpin kashayku” niq religionkunan. Chaymantapas Jesusta negaqkuna, Jesuspa cheqaq qatikuqninkunata cheqnikuqkunapas. Paykunamantan Juan nirqan: “Ñoqanchis ukhumanta lloqsipurqanku”, nispa. Chaypin yachanchis paykunaqa Diospi iñiq kashaspa karunchakapusqankuta. Apóstol Juanpa tiemponpiqa karqanñan “anticristo” nisqa runakuna. ¿Imaynapi yachanchis? Paypa kawsasqan tiempota ‘p’uchukay tiempo’ nisqanpi.

¿Imatawanmi Juan willarqan “anticristo” nisqamanta? Willarqanmi pantasqa yachachikuykunata mast’arisqanta, nirqanmi: “Pipas Jesucristoq runa-kaypi cheqaqtapuni hamusqanta sut’ita rimariqqa, Diospa Espiritunwanmi kashan. Jesucristoq runa-kaypi cheqaqtapuni hamusqanta mana sut’itachu rimaqpin ichaqa, Diospa Espiritun mana kanchu, aswanpas Cristo contra sayariqpa espiritunmi paypi kashan. Qankunaqa uyarirqankichismi Cristo contra sayariqpa rikhurimunanta, chaymi kunan kay pachapiña kashan”, nispa (1 Juan 4:2, 3). Iskay kaq carta qelqasqanpin nirqan: “Askhan pantachiqkunaqa kay pachapi purishanku, paykunaqa Jesucristoq runa-kaypi hamusqantan neganku. Chay hina runakunaqa q’otukuqkunan, Cristo contra sayariqkunataqmi kankupas”, nispa (2 Juan 7). Juanqa sut’itan willarqan “anticristo” nisqaqa Jesucristomanta yachachikuyninmantapas pantasqata yachachisqanta.

Juanmanta ñawpaqtaraqmi Jesús kayta willarqan: “Llulla profetakunamanta allinta cuidakuychis. Paykunan hamusunkichis ovejaman tukuspa, sonqonkupitaq ichaqa yarqasqa atoqkuna hina kanku”, nispa (Mateo 7:15). Apóstol Pablopas Tesalónica llaqtapi cristianokunatan nirqan: “Amapuni imaynallamantapas q’otuchikuychischu. Señorpa kutimunan p’unchay manaraq chayamushaqtinqa, Diospa contranpi sayariyraqmi kanqa, hinan millay-millay awqa sonqo runa rikhurimunqa, chay runaqa muchunanpaq t’aqasqañan”, nispa (2 Tesalonicenses 2:3).

Arí, apostolkunaq tiemponpiqa karqanñan llulla profetakuna, cristianokunaman waqllisqata yachachiqkunapas. Cristomanta pantasqata yachachiqkunata, yachachisqan contrapi yachachiqkunatawanmi Juanqa nirqan “anticristo” nispa. “Muchunanpaq t’aqasqañan” nispa nisqanpin Pablo rikuchirqan Jehová Dios paykunawan ima ruwananta.

Kay tiempopipas kashanmi Jesuspa contranpi, yachachisqan contrapipas yachachiq runakuna religionkunapas, paykunan kanku “anticristo” nisqa. Paykunaqa pantasqa yachachikuykunatan yachachinku, chaymi yaqa llapa runakuna mana yachankuchu pin Jesucristopas Taytanpas kasqanta. Chayraykun cuidakunanchis paykunaq yachachisqankumanta. Iskay yachachikuyninkumanta yachasun.

Trinidad yachachikuy. Ñawpa tiempomantaraqmi “cristianon kayku” niq iglesiakuna yachachirqanku Yayawan, Churiwan huk Dioslla kasqankuta. Chaymi runakunaqa mana yachankuchu pin Jesucristo, pin Jehová kasqanta, chayraykun paykuna anticristo kanku. Kunankamapas runakunaqa manan Diosta reqsinkuchu nitaq Jesucristotapas qatikuyta atinkuchu (1 Corintios 11:1; Santiago 4:8).

Diospa sutinta pakanku. Chayllaraq Biblia qelqakushaqtinqa 7.000 más kutitan Jehová suti rikhurirqan. Ichaqa chay religionkunan mana manchakuspa Diospa sutinta Bibliankumanta horqorqanku, Diospa sutinta willaq Bibliakunamantataq mana allinta rimarqanku. Chaymi kay tiempopiqa yaqa llapa runakuna mana Diosta reqsinkuchu.

Askha runakunan Diospa sutinta yachasqankumantapacha payman asuykurqanku. Yachasun Richard sutiyoq runa casarasqa Testigokunawan chayllaraq tupaspa rimasqankumanta. Paymi nin: “Paykunan Bibliapi rikuchiwarqanku Diospa sutin Jehova kasqanta. Manan hayk’aqpas chayta uyarirqanichu. Maytan admirakurqani Diospa sutinta yachaspa”, nispa. Payqa chaymantapachan Diosta kusichiyta munaspa Bibliapi yachasqanman hina kawsayta qallarirqan, ninmi: “Diospa sutinta yachasqaymantapachan astawan Diosman asuykurqani”, nispa.

Ñawpa tiempomantañan “anticristo” nisqakuna waranqa-waranqanpi runakunata laqhayaq ukhupi purichishan. Ichaqa Bibliata estudiaspan yachasun pin chay anticristo kasqanta, cuidakusuntaq pantasqa yachachikuyninkumanta (Juan 17:17).