Lucasqa Bibliapi kaq jujnin librotan qelqaran, paymi niran: “Qallariymantapacha tukuy imachus pasasqantan allintapuni estudiarani”, nispa (Lucas 1:3).

 Jesuspa vidanmanta willaq qelqakunatan nikun “evangeliokuna” nispa, chaykunata qelqaqkunan karanku: Mateo, Marcos, Lucas, Juan ima. Wakin runakunaq nisqanman jinaqa 300 a 399 watakuna ukhupis chay librokunapi cambiokuna ruwakusqa.

 Ichaqa 1900 wataq qallariyninpi jinan, Egiptopi tarikuran Juan libromanta juj parteta. Chay qelqatan waqaychakushan John Rylands Bibliotecapi (Manchester, Inglaterra), chay qelqatan reqsikullantaq Papiro Rylands 457 (P52) nisqa sutiwan, chaypin kashan Juan 18:31-33, 37, 38 textokuna.

 Chay qelqaqa ancha valorniyoqmi, griego rimay qelqakunamantaqa chaymi aswan ñaupa kaqqa, yaqachus jina qelqakunman karan 125 watapi jina, arí, Juanpa wañupusqanmanta 25 watakuna jina qhepallatan qelqakuran. Chay qelqaqa yaqa igualmi chay jina kaq juj qelqakunawanpas.