Manan jark’anchu. Jesuspunin qatikuqninkunata niran: “Qhali runakunaqa manan doctorta necesitankuchu, onqosqakunan ichaqa necesitanku”, nispa (Mateo 9:12). Bibliapiqa manan niwanchischu ima jampikunawanchus jampichikusunman chayta, ichaqa allin yachachikuykunatan qowanchis tukuy imatapas Diospaq jina ruwashanallanchispaq.

Allin consejokuna

 1. Allintan yachananchis ima tratamientotachus doctor qowashanchis chayta. Bibliaq nisqan jina, ‘manan tukuy uyarisqanchistachu creenanchis’ (Proverbios 14:15).

 2. Bibliaq nisqan jina, “askha yuyaychaqkuna kaqtinmi” imapas allinta ruwakun. Chhaynaqa allinmi kanman askha doctorkunata onqoyninchismanta tapukuy, astawanqa chayta ruwasunman nishu onqosqa tarikuspan (Proverbios15:22).

 3. Bibliaqa jark’anmi yawar mijuyta churachikuytapas, chaymi ima tratamientopas mana yawarllawan kanan (Hechos 15:20).

 4. Diosqa manan munanchu ‘layqa ruwaykunataqa’, chaymi ima tratamiento chaskisqanchispas manapuni layqa ruwaykunawanqa chaqrusqachu kanan (Gálatas 5:19-21). ¿Imaynatan yachasunman ima tratamientopas layqa ruwaykunawanchus kashan icha manachus chayta? Chaypaqqa allintan piensananchis kaykunapi:

•   Onqoyninchista jampiyta munaq runa, ¿yachanchu layqakuyta otaq magia ruwayta?

•   Sichus tratamiento qowaqninchis niwasunman: “Layqarusunkikun” otaq “mana allin espiritukunan chay onqoywan jap’ichishasunkiku”, nispa chayqa, manañan chay tratamientoqa allinchu kanman.

•   Chay tratamiento qowaqninchis, ¿ruwanqachu sacrificiokunata, pagokunata, otaq chay jina ruwaykunatapas ima jampitapas qowananchispaq? Chhayna kaqtinqa manañan allinchu chay tratamientoqa kanman.

 5. Manan nishutachu llakikunanchis onqoyninchismantaqa. Biblian nin: “Lliu runakuna yachachunku allin yuyaywanpuni imatapas ruwaq kasqaykichista,” nispa (Filipenses 4:5). Imatapas allin yuyaywan ruwaq kasun chayqa, manan qonqapusunchu “aswan allin kaqkunata”; imamantapas aswan allin kaqqa Diosta serviymi (Filipenses 1:10; Mateo 5:3).