Iskay chunka soqtayoq p’unchay junio killapin Mosoq Pacha Biblia quechua cusqueño rimaypi lloqsimurqan. ¡Chayqa may kusikunapaqmi Diospa llaqtanpi kaqkunapaqqa!

Chay Mosoq Pacha Biblia nisqa sutiyoq Bibliaqa imatachus Dios qelqachirqan ima niytachus munarqan chayman jinan ruwasqa kashan (2 Timoteo 3:16). Kay tiempokunapiqa imaymanatan yapashanku orqoshanku ima Bibliamanta, ¿chhaynachu kay Biblia kashan? ¿Pin chay Bibliata ruwachimun? ¿Confianapaq jinachu chay Mosoq Pacha Biblia nisqa sutiyoq Biblia kashanman? Chaykunatan kaypi yachasun.

Negociokunamanta yachachiq Declan Hayes sutiyoq profesormi nirqan: “Sapa watanpas Bibliatan tukuy imamantapas mastaqa vendekun” nispa. Chayqa cheqaqpunin, ichaqa vendenankuraykun wakinqa Bibliapi imaymanata cambianku. Juj Biblia kan, chaypin chay Bibliata ruwaqkuna wakin textokunata borrapusqaku, paykunapaqqa aburrikunapaq jinas chay textokuna kanman. Juj Biblian kallantaq, chaypiqa wakin letrakunata rimaykunata iman cambiarusqaku, kunan tiempo runakunata mana ofiendenankupaqsi chayta ruwankuman karqan. “Wakin runakuna Diosman qayllaykunankupaq” nispas “Dios” nispa churanankutaqa “Taytáy, Mamáy” nispa churasqaku.

Chaykunamanta aswan mana allinqa kashan Diospa sutinta Bibliamanta orqosqankun. Ñaupa tiempo hebreo rimay qelqakunapiqa YHWH otaq JHVH ajnan Diospa sutinqa rijurin, chaytan t’ijrakun Jehová nispa otaq Yahvé nispa. Chayqa yaqa qanchis waranqa kutitan Hebreo rimay librokunapiqa, Antiguo Testamento nisqapiqa rijurin (Éxodo 3:15; Salmos 83:18). Chaymi rikuchin imaynas kamaqninchis Diosqa sutin yachananchista munan chayta, imaynas sutinmanta rimapayananchis munan chayta.

Chaytaña Dios munarqan chaypas unayñan Judío runakunaqa costumbrenku jawa mana munarqankuchu Diospa sutinmanta rimayta. Tiempowanqa ñaupa tiempopi Jesusta qatikuqkunapas chay piensaywanmi apachikapurqanku (Hechos 20:29, 30; 1 Timoteo 4:1). Kunan tiempopas yaqa llapa Biblia t’ijraqkunan Diospa sutinpa rantinta Señor nispalla churanku. Wakin Bibliakunapiqa manan rijurillanpaschu Juan 17:6 textopi suti nisqa rimaypas. Chaypin Jesusqa nirqan: “Kay pachamanta qowasqayki runakunamanmi sutiykita reqsichiniña”, nispa. Diospa simin qelqa nisqa Bibliapin ichaqa nishan: “Kay pachamanta qowasqayki runakunamanqa ñan willaniña pichus kasqaykita” nispa.

Wakinmi Diospa sutinta Señor nispalla churaspanku ninku: “Ñaupa costumbreman jinan ruwashayku” nispa. Wakinmi ichaqa sut’inta willakunku imaynas askha Biblia vendenankurayku Diospa sutinta cambiarqanku chayta. a Ichaqa, Jesuspa nisqan jina manapunin allinchu costumbrerayku Diosta pisichayqa (Mateo 15:6). Chaymantapas manan Bibliapiqa maypipas ninchu sutiq rantinta juj sutikunawan churanamantaqa. Jesustapas “Diospa Simin”, “reykunaq reynin” nispa iman nikun (Apocalipsis 19:11-16). Ichaqa, ¿chayraykuchu chaykunawan Jesuspa sutinta cambiana?

Kaypiqa manan orqopuychus allin icha churaychus chayllamantachu rimashanchis. India ladopi Biblia t’ijraymanta allin yachaq runan nirqan: “Kay India ladopi runakunamanqa manan imapas qokunchu imakunatas Diosta nikun chayqa. Paykunaqa sutintapunin yachayta munanku, “manachus sutinta yachaykuman chayqa imaynatataq paywanri reqsinakuykuman”, nispan ninku”, nispa. Chaytaqa munanku llapa Diosta maskhaq runakunan. Diosta cheqaq Diosta jina rikunapaqqa, paywan amigota ruwanapaqqa yachanapunin sutinta (Éxodo 34:6, 7). Chaymantapas, Bibliaq nisqan jina, “Jehová Diospa sutinta llapa wajakuqkunaqa salvasqan kanqaku” (Romanos 10:13). Diosta serviqkunaqa jatunchanankupunin paypa sutintaqa.

1950 watapin juj jatun noticia willakurqan, chay watapin inglés rimaypi Mosoq Pacha Biblia nisqa sutiyoq Biblia lloqsimurqan. Chaypiqa Griego rimaypi librokunallan kasharqan. Qatiqnin watakunapitaq pisi-pisimanta Hebreo rimaypi librokuna lloqsimurqan, chunka watapin chayqa tukukurqan. 1961 watapitaq llapan jujllapi lloqsimurqan. Chay Bibliapiqa maykunapichus Diospa sutin kasharqan chaypin kaqta chay sutita churakapurqan. Antiguo testamento nisqapiqa yaqa qanchis waranqa partepin kasharqan. Chay Bibliapiqa Griego rimaypi librokunapipas, Nuevo Testamento nisqapiqa 237 partepin chay sutiqa kasharqan.

Maypichus rijurinanman kaqta Diospa sutinta churaspaqa paytan jatunchakushan, runakunatataqmi yanapan payta reqsinankupaq. Mateo 22:44 textopin wakin Bibliapi nishan: “Señormi Señorniyta nirqan” nispa. Ichaqa manan faciltachu entiendekun mayqen señormantachus rimashan chayta. Ichaqa chay partepiqa Salmos 110:1 textopi nisqamantan Jesusqa rimasharqan, chaymi Mosoq Pacha Biblia nisqa sutiyoq Bibliapiqa chay textopi nisqanman jina Mateo 22:44 textopiqa churan, chaypin nishan: “Jehová Diosmi Señorniyta nirqan”, nispa. Chayta leespaqa sut’itan pipas reparan imaynas Jehová Diosqa tayta chayta, Jesustaq churi chayta.

Chay Mosoq Pacha Biblia nisqa sutiyoq Bibliataqa Watch Tower Bible and Tract Society nisqa organizacionmi ruwachin, chay organizacionqa Jehová Diospa testigonkunaq sutinpin llank’an. Pachaj wata masñan Bibliakunatapas orqomushan, chaytataq lliu kay pachantinman ch’eqechishan. Juj t’aqa iñiqkunan, Jehová Diospa testigonkuna chay Mosoq Pacha Biblia nisqataqa ruwarqanku. Chay t’aqamanta hermanokunaqa manan jatunchasqa kaytachu ni reqsisqa kaytachu maskharqanku, aswanmi mañakurqanku wañupunanku qhepatapas ama piqpa reqsisqan kanankupaq (1 Corintios 10:31).

¿Imaraykutaq chay Bibliata nikun Mosoq Pacha Biblia, nispa? 1950 watapi lloqsimuq Bibliapin qallariyninpi nirqan: “Chay sutin rikuchin imaynas runakunaqa mosoq pachaman jaykuq punkupiña kashanchis chayta, imaynas 2 Pedro 3:13 textopi nisqanqa junt’akunan patapiña kashan chayta”, nispa. Chay t’aqapi hermanokunan nillarqankutaq: “Kay mana allin kausaymantataq mosoq kausayman jaykusun chayqa, Diospa siminpi cheqaq yachachikuyqa k’ancharinanpunin, llapa Bibliakunan chayta k’ancharichinan”, nispa.

Imaynatachá Dios qelqachirqan chayman jinan kanan. Inglés rimayman t’ijraqkunaqa hebreo rimaymanta, arameo rimaymanta, griego rimaymanta iman Inglesman pasachirqanku, chay simikunapin Dios qelqachisqa. Paykunaqa tukuy atisqankutan kallpachakurqanku ima niytachus Dios munasharqan chayman jinapuni ruwanankupaq, ichaqa kay tiempokunapi entiendekunanpaq jinan kanan karqan.

Chaychá inglespi Mosoq Pacha Biblia nisqa Bibliamantaqa yachayniyoq runakunapas allinta rimanku. 1989 watapin Israel llaqtamanta Benjamin Kedar-Kopfstein sutiyoq runa, hebreo rimay simimanta allinta yachaq runa nirqan: “Estudiasqaypi hebreo rimaypi qelqakunamanta, juj rimaykunaman t’ijrasqa Bibliakunamantapas rimaspaqa inglespi Mosoq Pacha Biblia nisqa Bibliamantaqa rimanipunin. Chay Bibliaqa allin ruwasqan kashan, ima ninantachus hebreo rimaypi nishan chayman jinapunin ruwasqa kashan, sut’itan rikukun chay Biblia ruwaqkunaq kallpachakusqanqa” nispa.

Jehová Diospa Testigonkunaqa Mosoq Pacha Biblia nisqa Bibliataqa juj rimaykunapipas orqomushankun. Kunanqa ñan 228 simi rimaykunapiña kashan, wakinqa partellanmi kashan wakintaq junt’asqa kashan. Llapa chaykuna facilta ruwakunanpaqmi imaymana programakuna ruwakurqan. Chaymantapas t’ijraypi llank’aqkunata yanapakunanpaqmi juj oficinata kichakurqan. Yachachikuykuna qelqaymanta encargakuq hermanokunaq yanapayninwanmi Jehová Diospa testigonkunata pusariq hermanokunaqa Biblia t’ijraqkunata qhawarishanku. Ichaqa, ¿imaynatataq Biblia t’ijrayri aparikun?

Qelqakuna ruwaypi reparasqaykuman jinaqa grupo-grupo llank’asqan imapas allin aparikun (Proverbios 11:14). Chaymi Biblia ruwakunanpaqpas ñaupaqtaqa juj grupo hermanokunata ajllakun. Paykunaqa qelqakuna t’ijraypi experienciayoq hermanokunan kananku. Maypachachus paykunata ajllakun chayqa, juj capacitaciontan paykunaman qokun. Chaypin yachachikun imaynatas Bibliata juj simi rimaykunaman pasachikun chayta, imaynatas chaypaq preparasqa programa nisqakunawanpas yanapachikunkuman chaytapas.

Chaypin yachachikullantaq imaynas Bibliaqa Diospa qelqachisqanman jinapuni kanan, imaynas fácil entiendeylla kanan chaykunata. Atikusqanman jinan juj palabrapaq ima palabrachá, ima rimaychá tupan chayta maskhakun. Imatachus entiendekushan chaytan t’ijrakusqan simipipas entiendekunan. ¿Imaynatapunitaq chaytari ruwakun? Chaypaq yachasun imaynatas inglés simipi Mosoq Pacha Biblia nisqa Bibliata ruwakurqan chayta. Ñaupaqtaqa mayqen simikunachus masta rijurin, mayqenkunachus jaykunanpuni chaytan qhawarikurqan. Chaypaqqa ñan Watchtower Translation System nisqa programapi karqanña chay simikuna, Bibliapi ima simikunawanchus tupan chaykunapas. Chaypin kashallarqantaq inglés simipi ima rimaypas o palabrapas Hebreo rimaypi, griego rimaypi ima simiwanchus tupan chaykunapas, chhaynapi t’ijraqkunaqa imaynatachus ñaupaqkuna ruwakurqan chayta reparanankupaq. Llapa chaykunata allinta qhawarispa, simikunatapas rimaykunatapas allinta ajllaspañan Biblia t’ijrayqa qallarikurqan. Yaqa chhaynan quechuapipas karqan, t’ijraqkunaq ruwasqanman jinan chay programa lloqsichimuq ajllasqanku simikunata.

Ichaqa kay ruwayqa manan juj palabraq rantinta juj palabra churayllachu, manan llapa partepichu kaqllata imatapas nikun, manataqmi kaq palabrachu jaykun. Chaymi quechuapi Bibliata ruwakunanpaqqa allinta qhawarikurqan ima palabras, ima rimaysi maymanpas allinta jaykunman chayta. Allintan rimaykunata simikunata tupanachikurqan chhaynapi gusto leey kananpaq, sumaq uyarikunanpaqwan. Quechuapi Mosoq Pacha Biblia nisqa Bibliaqa fácil leey fácil entiendey iman kashan. Chaymantapas ima ninantachus Diosninchis nirqan chayman jinapunin kashan. b

Tukuy sonqoykuwanmi kallpachaykiku Mosoq Pacha Biblia nisqa Bibliata leenaykipaq. Yaqapaschá chayta leewaq internetpi, JW Library nisqa aplicacionpi ima. Atispaqa Jehová Diospa testigonkunaq juñukusqanman riy, chaypin tarinki chay Bibliata. Chay Bibliataqa confianzawan leekuy, imatachus Diosninchis qelqachirqan chayman jinapunin ruwasqa kashan. Qan kikiykin cuentata qokunki imaynas kay Bibliaqa Diospa regalonpuni chayta.