Escarabajo diabólico acorazado (Phloeodes diabolicus) nishcaca Norteamericapa oeste ladomanmi tian. Investigadorcuna nishcashnaca, cai jatun jatsoca ashtaca ashtaca pesocunata aguantanllami. Por ejemplo, shuj carro paita sarushpa yalijpipash nima na pasanllu. ¿Imashinata chai tucui pesota aguantaita ushan?

 Cai jatsopa carapachoca jahua ladomanbash y ura ladomanbashmi filopica uniongunata charin. Shuj unionga shinlli shinllimi can. Ima llapijpipash jatsopa esqueletogu ama ñuturichunmi cai unionga ayudan. Shinami carapacho ucuman imapash organocunaca na imapash pasan. Cutin shuj unionga ni yapa shinlli ni yapa suavepash na canllu. Chai unionga jatsopa esqueletogu facillla deformarichunmi ayudan. Cutin shuj unionga suave suavegumi can. Chaimi jatsoca quiru cara ucuman satirinlla o rumi utujucunapipash pacajungapaj satirinlla.

 Shinallata jatsopa carapachopica jahuamanda uracamanmi shuj unión rayagu cuenda tiajun. Chaipica loma lomami can. Chai lomayashca pushtugucunaca shuj rompecabezaspa piezagucuna cuendami, ali aliguta acomodashca, pactachishca tiajun. Shinami carapachota fuerzahuan llapijpica, tucuilla carapacho shinlli shinlli tucun. Shinallata, chai lomayashca pushtugucunapica, shuj shuj capacuna cuendami tianajun. Chai capagucunaca proteína de pegamento nishcahuan pegashcacunami can. Chai lomayashca pushtugucunata llapijpica, chai pegamento pushtucunapica uchilla utujugucuna cuendami tucun. Chai utujucunaca tiempohuanga chingarinllami. Pero chai utujugucunamandami llapijpipash nimamanda na ñuturin.

 Investigadorcunaca cai jatsopa carapachopa diseñota catishpami, llapijpi o chocarijpi ama imapash pasachun carrocunata, puentecunata, huasicunata y shuj cosascunatapash rurangapaj munan.

 Quiquinga ¿imatata yuyapangui? Escarabajo diabolicopa carapachoca ¿pipash rurashca caimandacha shina alipacha can? O ¿yangamandacha shina can?