Misicunataca siempremi limpiarinajunlla nin. Misicuna rijcharia cashpaca paicunapa cuerpotaca lambirishpallami yalin. Misicunaca paicunapa jalluhuan lambirishpa causaimandami limpio can.

 Caipi yuyapai: Misipa jalluca 290 papilas nishcacunatami charin. Chai papilas nishcaca uchilla cashacuna cuentami can. Misipa jallupi cashacunaca huashamanmi pundata charin. Chai cashacunaca ñucanchi sillushnami sinlli can. Misipa jallupica cada casha huashapimi utujuta charin. Chaimi misicunaca cada jalluta shimi ucuman churashpaca babastaca tandachin.

 Misicuna milmata lambirishpaca cada lambirishcami jallupa cashacunaca babastaca charin. Misipa jalluca cada punllami quimsa cucharacunatashna paipa aicha carapi, paipa milmapica babastaca charin. Chai babasmi misipa cuerpopi mapacuna tiashcataca limpian. Misicunaca achica milmata charimandami sudorta facil cacharitaca na ushan. Chaimandami paicunapa babashuanllata lambirishpaca paicuna frescolla sintirichun ayudan.

 Misipa jallupa cashacunaca paipa milma huatarishcata tarishpaca ashtahuan jundotami lambin. Shina rurashpami huatarishca milmacunataca facil safaita ushan. Misipa jallupa cashapa puntacunami paipa aicha caratapash limpiaita ushan. Cientificocunaca misipa jalluta copiashpami gentecuna ajchata ñajcharina peinillacunata rurashca. Cai peinillacunami ajchata amujllata ñajcharichun ayudan. Shinalla ajcha huatarishcacunataca amujllami safaita ushan. Cai peinillacunaca limpiangapapash ashtahuan facilmi can. Cientificocunaca misipa jalluta ashtahuan copiashpaca limpiangapaj ashtahuan ali cosascunata rurai ushashcatami yuyan. Shinallata cuerpopi yapalla milmata charijcuna cremata o imapash jambicunata churari ushachunbashmi ayudaita ushan ninmi.

 Quiquinga ¿imatata yuyapangui? ¿Misipa jalluca pipash rurashca caimandachu shina ali pacha canga o yangamandachu chashna ali pacha jallutaca charinga?