Evangelio de Juanda escribishpaca, apóstol Juanga nircami: ‘Jesuspa discipuloca ricushpami villarca. Paica, paipa villashcacuna cierto cajtaca alimi yachan. Cangunapash crichunmi paica cabalta villarca’ ninmi (Juan 19:35).

 Bibliapa Evangelio librocunapica Jesús imatalla rurashcatami parlajun. Chai Evangelio librocunapica, tucui shunguhuanmi confiaita ushapanchi. ¿Imamandata confiaita ushapanchi? Mateo, Marcos, Lucas y Juanga Jesús imatalla rurashcata ricushca gentecuna causanajuj tiempopillatami, Evangelio librocunataca escribirca. Huaquin gentecunaca, Evangelio de Mateotaca Jesús huañushcamanda 8 huatacuna jipa, más o menos año 41​pimi escribirca ninmi. Cutin shujcunaca, ashtahuan jipa huatacunamanmi Evangelio de Mateotaca escribirca ninmi. Ima huatacunapi escribishca cajpipash, Escrituras Griegas Cristianaspa tucuilla librocunata nara año 100 tucujpillata tucuillata escribishpa tucuchishcataca seguromi capanchi.

 Jesús imatalla rurashcata, Jesús huañushcata y Jesús causarishcata ricushca gentecunaca, Evangelio librocuna ciertota nijushcata o na ciertota nijushcataca ninmanllami carca. Bibliapi especialista Frederick F. Bruce shuti profesorca ninmi: “Apostolcuna predicashpaca, uyanajuj gentecuna imatalla ricushcata, uyashcataca seguromi carca. Chaimi apostolcunaca, ‘ñucanchimi ricushcanchi nishpalla’ parlanapa randica ‘imashinami ña ali yachapanguichi’ nishpa parlarca” ninmi (Hechos 2:22).