Bibliapica María Taita Diospa mama cashcataca ni maipi na nijunllu. Shinallata cristianocuna Mariata adorana cashcatapash na nijunllu. a Caipi pensaripai:

•   Mariaca ñucaca Taita Diospa mamami cani nishpaca nunca na nircachu. Bibliapica Mariaca ‘jahua cielopi Taita Diospa Churitami’ ungushca nijunmi. Taita Diosta ungushcataca na nijunllu (Lucas 1:32, 35).

•   María Taita Diospa mama cashcataca Jesucristoca na nircachu. Ni Mariata adorana cashcatapash na nircachu. Por ejemplo, shuj viajeca shuj huarmimi Mariataca Jesuspa mama caimandaca cushijushcami cana cangui nishpa alabai callarirca. Chaita ricushpami Jesusca chai huarmitaca cashna nirca: “Na shinachu can. Taita Diospa shimita uyashpa pactachijcunami ashtahuan cushijun” nishpa (Lucas 11:27, 28).

•   Bibliapica “Taita Diospa mama” y Theotokos shimicunaca ni maipi na ricurinllu. Theotokos shimica “Taita Diosta unguj huarmimi” significan.

•   “Jahua pachata jatun mandaj nishca huarmi” shimicuna Bibliapi tiajushpapash, Mariamandaca na parlajunllu. Sino apóstata israelitacuna adoran cashca falso diosamandami parlajun (Jeremías 44:15-19). ‘Jahua pachata jatun mandaj nishca huarmica’ Babilonia llactamanda Istar o Astarté falso diosamandami parlajun.

•   Primer cristianocunaca Mariataca na adoranllu carca, ni shuj especial huarmitashnapash na tratanllu carca. Primer cristianocunamanda parlashpami shuj estudiashca jarica nirca: “Paicunaca Mariata adorana cultocunataca rechazaitapachami rechazarca. Shinallata Mariata yapata alicachishpa o mainishpaca Mariataca shuj diosatashnami adoranajun nishpami shujcunaca pensanga yashpami chaitaca na rurarca” (In Quest of the Jewish Mary).

•   Bibliapica Taita Diosca siempremi tiashca nijunmi (Salmo 90:1, 2; 93:2). Como Taita Diostaca nipi na rurarca, entonces shuj mamata charitaca na ushanllu. Además, Bibliapica “jahua pachapash, can Dios causangapaca na pactanllu” nijunmi (1 Reyes 8:27). Shinaca, Mariaca Taita Diosta paipa vijsapi charitaca na ushanmanllu carca.

Mariaca Taita Diospa mamaca na carcachu, Jesuspa mamami carca

 Mariaca judiami carca y rey Davidpa familiami carca (Lucas 3:23-31). Mariaca Taita Diospi feta charimanda y tucui shunguhuan sirvimandami Taita Diospa favortaca charirca (Lucas 1:28). Taita Diosca Jesuspa mama tucuchunmi Mariataca agllarca (Lucas 1:31, 35). Mariaca paipa cusa Josehuanga shuj huahuacunatapashmi charirca (Marcos 6:3).

 Bibliapica Mariapash Jesuspa discípula tucushcatami nin. Pero paimandaca na imatapash ashtahuan parlanllu (Hechos 1:14).