Tauca casocunapica Bibliapi tianajushca numerocunaca na imapash significadota charinllu. Pero huaquin casocunapica shuj significadota charinmi. Shuj número significadota charijta o na charijta yachangapaca shuj yuyaipa ñaupaman o jipaman tiajuj yuyaicunatami ricuna capanchi. Chaipaca cai cati ejemplocunata ricupashunchi:

•   Número 1 Paipa discipulocunamanda Taita Diosta mañajushpaca Jesusca nircami: ‘Paicunaca shujllashna cachun. Imashinami quiquinga ñucahuan shujllashna capangui y ñucapash quiquinhuanga shujllashna capani’ (Juan 17:21; Mateo 19:6). Shinaca número 1​ca shujllashna canatami ningapaj munan.

•   Número 2 Moisesman Cushca Leypica imamandapash aseguraringapaca ishcai testigocuna minishtirishcatami nijurca (Deuteronomio 17:6). Shina cuendallatami shuj muscuipishna ricurishca visión o imapash parlashcaca ishcai viajeta repetirijpica chaica seguropacha cashcatami ricuchijurca. Por ejemplo, Faraón imata muscushcata Joseman villajpica, Joseca: “Taita Dios ciertopacha pactachina cajpimi, quiquinga ishcai viajeta muscushcangui” nircami (Génesis 41:32). Y huaquinbica Bibliapica profeciacunamanda parlashpaca “ishcai cachocuna” shimitami utilizan. Cai shimica ishcai llactacuna unirishpa, shuj jatun poderoso llacta cuenda tucushcatami ricuchin. Por ejemplo, Daniel libropi parlashca ishcai cachocunaca Media shuti, Persia shuti llactacunatami ricuchijun (Daniel 8:​20, 21; Apocalipsis 13:11).

•   Número 3 Imapash ciertopacha cashcataca quimsa personacunami aseguran carca. Shina cuendallatami imatapash quimsa viajecaman nishpaca, chaica ciertopacha cashcata yarichingapaj y cumplirinata ricuchingapami carca (Ezequiel 21:27; Hechos 10:​9-​16; Apocalipsis 4:8; 8:​13).

•   Número 4 Cai numeroca shuj cuadrado cuendallatami imapash cabal, tucui ladocunamandallata completo cashcata ricuchin. Bibliapica ‘cai alpapi chuscundi ladocunamandallata’ shamujuj ‘chuscundi huairamanda’ parlashpaca tucuchitapacha tucuchinatami nijun (Apocalipsis 7:1; 21:16; Isaías 11:12).

•   Número 6 Cai numeroca imapash incompleto, faltajlla, imperfecto cashcatami ricuchin. Cai numerotaca Taita Diospa contracunamanda parlangapaj o paicunahuan imatapash ricunata charishcata ricuchingapami ocupan (1 Crónicas 20:6; Daniel 3:1, Traducción del Nuevo Mundo Biblia [TNM]; Apocalipsis 13:18).

•   Número 7 Cai numeroca imapash perfecto, cabal cashcatami ricuchin. Por ejemplo, Taita Diosca israelitacunataca Jericó shuti llacta muyundita, 7 punllacunata marchashpa muyuchunmi mandarca. Y ña séptimo punllapica 7 viajecamanmi llactataca marchashpa muyuna carca (Josué 6:​15). Bibliapica cashna cuenda instrucciongunata cujushpaca, número 7​tami ocupan (Levítico 4:6; 25:8; 26:18; Salmo 119:164; Apocalipsis 1:​20; 13:1; 17:10). Apóstol Pedroca Jesustaca pitapash perdonashpaca mashna viajecamanda perdonana capani nishpami tapurca. Chaimi Jesusca nirca: “Na, na 7 viajetallaca perdonanachu cangui. Sino 77 viajetami perdonana cangui” nishpa. Jesusca 7 viajecaman perdonana nishpaca, siempre perdonana cashcata intindichingapami munarca (Mateo 18:21, 22).

•   Número 10 Cai numeroca imapash totalgu o completogu cashcatami ricuchin (Éxodo 34:28; Lucas 19:13; Apocalipsis 2:​10).

•   Número 12 Cai numeroca huaquinbica Taita Dios shuj organizacionda formashcatami ricuchin. Por ejemplo, apóstol Juan muscuipishna ricushca visionbica paica, shuj llactapa ‘pircacunapa cimientoca 12 rumicunata charijta. Chai rumicunapica 12 apostolcunapa shuticuna escribishca tiajujtami’ ricurca (Apocalipsis 21:14; Génesis 49:28). Múltiplo de 12​pa numerocunapash chashna yuyaitallatami ricuchita ushan (Apocalipsis 4:4; 7:​4-8).

•   Número 40 Huaquinbica número 40​ca mashna tiempopa sentenciai tucushcata, mashna tiempota castigai tucushcatami ricuchijurca (Génesis 7:4; Ezequiel 29:11, 12).

Numerología y gematría

 Bibliapi shuj número imapash significadota charijta ricuchijushpapash, numerología nishcahuanga na igualchu can. Numerología nishcaca shuj número imapash pasanatami ricuchijun ninmi. Shinallata chai numerota shuj numerocunahuan unishpaca imapash significadocunatami charin ninmi. Por ejemplo, cabalista judío gentecunaca Bibliapa Escrituras Hebreastami ali ali analizan. Paicunaca numerocunata utilizashpa gematría nishcatami ruran. Gematriaca shuj numeroca shuj letratami ricuchin ninmi. Gematriata utilizashpami cabalista judío gentecunaca Bibliapi imapash código secretocunata mascan. Taita Diospa ñaupapica numerologiaca brujucunapaman rishpa ricujuj cuendami can. Shinacunata rurachunga Taita Diosca nimamanda na alicachinllu (Deuteronomio 18:10-​12).