¿Taita Diosca mashna shuticunatata charin?

Cai idiomapi uyangapaj o ricungapaj

Bibliapica caitami yachachin

Taita Diosca shujlla shutitami charin. Hebreo shimipica cashnami escribirin: יהוה y español shimipica “Jehová” a nishpami rijsipanchi. Profeta Isaiasta utilizashpami Taita Diosca, “ñucaca, Jehová b Dios shutimi cani” nirca (Isaías 42:8). Taita Diospa shutica casi 7.000 viajecunatami Bibliata escribichishca shimicunapica ricurin. Cai shutimi Taita Diosta rijsishca titulocunatapash o shuj shuticunatapash yali cutin cutin Bibliapica ricurin. c

Jehová Diosca ¿shuj shuticunatapashchu charin?

Bibliapica Taita Diostaca shujlla shutihuanmi rijsin. Shinapash huaquingunaca huaquin titulocunahuanbashmi Taita Diostaca rijsin. Chai titulocuna imata ningapaj munashcata, Jehová Dios imashina cashcata ricuchijtapash cai cati listapi ricupashun.

Título o cashna nishpami rijsin	Bibliapica ¿maipita ricurin?	¿Imata ningapaj munan?
Alá	(Na ricurinllu)	Alá nishca shimica árabe shimipimi can. Shinapash na shuj shutipachaca canllu. “Dios” ningapami shuj titulolla can. Árabe Bibliapa traducciongunapi o shuj shimicunapipash Alá nishpaca Dios ningapami munan.
Alfa y Omega	Apocalipsis 1:8; 21:6; 22:13, (La Biblia. Traducción del Nuevo Mundo [TNM])	Griego shimipa abecedariopica Alfa shimica primera letrami can. Omega nishpaca última letrami can. Cai letracunaca Jehová Dios “primero y último” cajtami ricuchin. Paimanda pundaca maijan diospash na tiarcachu. Shinallata pai jipapash, maijan diospash na tiangachu (Isaías 43:10).
Alfarero	Isaías 64:8, TNM	Alfarero nishpaca imashinami shuj alpa mangata ruraj runaca turuhuanga imatapash rurai ushanlla. Shinallatami Jehová Diosca tucui gentecunata, llactacunatapash mandana autoridadta charishcata ricuchin (Romanos 9:20, 21).
Altísimo	Salmo 47:2, TNM	Tucui cai pachata mandaj Dios ningapami munan.
Anciano de Días	Daniel 7:9, 13, 22, TNM	Imapash nara tiajpillata Taita Diosca ña tiashcata, shinallata siempre tiashcatami ricuchin (Salmo 90:2).
Celoso	Éxodo 34:14, TNM	Cai shimica Jehová Dios shuj dioscunataca napacha adorachun munashcatami ricuchin. Shinallata “paitalla adorachun” munashcatapashmi ricuchin.
Tucuita Ruraj	Isaías 40:28	Tucui cosascunata rurashcatami ningapaj munan.
Taita Dios	Génesis 1:1	Cai shimicunaca pitapash adorajushcata, o pipash ashtaca poderta charijtami ricuchin. Hebreo shimipi ʼElohím nishpaca Jehová Dioslla alicachi tucuna, ninanda respetai tucuna cashcatami ricuchin.
Tucui dioscunapaj Taita Dios	Deuteronomio 10:17	Shuj ‘yanga dioscunahuan’ ricushpaca Taita Diosca pailla Dios cashcatami ricuchin (Isaías 2:8).
Yachachij	Isaías 30:20, 21	Maijan ñanda rinata, imashina canatapash ñucanchipa alipallata yachachij cashcatami shina nin (Isaías 48:17, 18).
Magnífico Hacedor	Salmo 149:2, TNM	Cai alpapi tucui tiashca cosascunata rurashcatami ricuchin (Apocalipsis 4:11).
Mañaicunata uyaj	Salmo 65:2	Tucui shunguhuan mañajcunataca paipacha uyajujtami ningapaj munan.
Ñucanchi Taita	Mateo 6:9	Causaita caraj Dios cashcatami ningapaj munan.
Ñucanchita Michij	Salmo 23:1	Paita adorajcunata cuidajmi can.
Redentor, Recomprador	Isaías 41:14, TNM	Jesuspa causaita cushpa juchamanda, huañuimandapash gentecunata salvashcatami ricuchin (Juan 3:16).
Jatun Mandaj	Apocalipsis 15:3	Paica siempremi mandana derechota charishca y siempremi mandana derechota charinga ningapami munan.
Shinlli Rumishna	Salmo 18:2, 46	Shinlli rumishnami can ningapami munan. Paipi pacajungapaj rinaca seguromi can.
Quishpichij Taita Dios	Isaías 45:21	Imapash llaquimanda, huañuimanda, tucuchi tucunamanda quishpichij Dios ningapami munan.
Jucha illaj limpio Dios	Proverbios 9:10	Tucuimanda yalica limpio, jucha illaj, ima nalitapash na charij ningapami munan.
Señor	Salmo 135:5, TNM	Dueño o amo cashcatami ricuchin. Hebreo shimipica ʼAdhóhn y ʼAdhoním ningapami munan.
Jatun Mandaj Dios	Génesis 15:2	Pailla tucui autoridadta, mandana derechota charishcatami ricuchin. Hebreo shimipica’Adhonái nijunmi.
Jahua pachapi causajuj Dios	Daniel 7:18, 27	Jatun Mandaj Dios cashcatami ricuchin.
Tucui Ushaita Charij Taita Dios	Génesis 17:1	Paita yalica nipipash na poderta charishcatami ricuchin. Hebreo shimipi ’El Schaddái, shimica “Tucui Ushaita Charij Dios” ningapami munan. Cai shimica Bibliapica 7 viajecunatami ricurin.
Yahvé Sebaot, Señor de los ejércitos	Isaías 1:9, TNM; Romanos 9:29, TNM	Cai shimica cielopi ashtaca ashtaca angelcunata mandaj cashcatami ricuchin. Cai shimitaca “Jehová de los ejércitos” o “SEÑOR de los ejércitos celestiales” nishpapashmi churashca (Romanos 9:29).
Yo soy el que soy	Éxodo 3:14, TNM	Hebreo shimipica cai shimica, Taita Diosca paipa munaita pactachingapaca ima munashcata o imatapash ruranlla cashcatami ricuchingapaj munan. Traducción del Nuevo Mundo [con referencias]; notapica: “Ñucami cani. Ñuca, ñucallatami cani” nijunmi. Cai shimicunaca Jehová shuti imata ningapaj munashcatami ricuchin. Chaitami La Biblia. Traducción del Nuevo Mundo Éxodo 3:15pipash ricuchijun.

Escrituras Hebreas o Antiguo Testamentopi ricurishca pushtucuna

Bibliapi parlashca huaquin pushtucunapa shuticunaca, Taita Diospa shutita charishcatami ricuchin. Pero cai shuticunaca Taita Diosmandaimanga na parlajunllu.

Llacta	Bibliapica ¿maipita ricurin?	¿Imata ningapaj munan?
Jehová-nisí	Éxodo 17:15, TNM	“Jehová Diosmi poste señalshna can” o “ñuca banderashna” can. Jehová Dios paipa llactata cuidanata, ayudanatami cai shimicunaca ricuchin (Éxodo 17:13-16).
Jehová-salom	Jueces 6:23, 24, TNM	“Jehová Diosca, casilla ali causaigutami caran” ningapami munan.
Jehová-sama	Ezequiel 48:35, TNM	“Mandaj Diosmi chaipi” can ningapami munan.
Jehová-yiré	Génesis 22:13, 14, TNM	“Jehová Diosca caranllami” ningapami munan.

Taita Diospa shutita rijsina y utilizanaca ¿imamandata importante can?

Taita Diosca paipa shuti Jehová cashcatami gentecuna rijsichun munan. Chaimandami Bibliapica ashtaca ashtaca viajecuna paipa shutita escribichishpa saquirca (Malaquías 1:11).
Jesucristoca paipa taitata shutipi parlana minishtirishcapacha cashcatami tauca viajecunata yachachirca. Por ejemplo, Jehová Diosta mañajushpaca Jesusca nircami: “Cambaj jucha illaj shutiguca, alicachi tucushca cachun” nishpa (Mateo 6:9; Juan 17:6).
Jehová Diospa shutita yachajujcuna, shinallata Jehová Dios nishpa parlajcunaca Jehová Dioshuan ali amigo tucungapaj munashcatami ricuchinajun (Salmo 9:10; Malaquías 3:16). Jehová Diospa amigocuna cashpami cai shimicuna paicunapa causaipi pactarijta ricunga: “Ñucata juyashcamandami, ñucapash paitaca cacharichisha. Paitaca, ñuca shutita rijsishcamandami, alicachi tucunapi churasha” (Salmo 91:14).
Bibliapica: ‘Jahua pachapipash, cai pachapipash tauca dioscunami tian. Chashna dioscunapash, mandajcunapash taucacunami’ tian nijunmi (1 Corintios 8:5, 6). Shina cajpipash Jehová nishcata Bibliapi ricushpami, pailla Taita Dios cashcata ricupanchi (Salmo 83:18).

a Hebreo shimita huaquin estudiashcacunaca “Yahweh” o “Yahvé” nishpami churashca.

b Bibliata escribishca punda manuscritocunapica, Taita Diospa shuti Jehová cajtami ricuchijun. Shinapash Quichua Bibliacunapica Taita Diospa shuti tiajushca pushtucunapica “Taita Dios”, “Tucui Ushaita Charij Dios”, “Mandaj Dios” nishpallami churashca.

c Huaquingunaca Taita Diospa shutita escribinajushpaca Jah nishpallami churashca. Jah nishca shimica Bibliapica casi 50 viajecunami escribishca tiajun. Por ejemplo, Jah shimica Aleluya shimipipashmi ricurin. Cai shimica “Jehovata alabaichi” ningapami munan (Apocalipsis 19:1).