Taita Dios perdonachun imata rurana cashcata rurajpica, Taita Diosca perdonangami. Bibliapica Taita Diosca “perdonangapaj listomi can”, “paimi ashtaca nali rurashcacunatapash anchuchinga” ninmi (Nehemías 9:17. La Biblia. Traducción del Nuevo Mundo [TNM-S]; Salmo 86:5; Isaías 55:7). Taita Dios perdonashpaca, perdonaitapachami perdonan. Bibliapica ñucanchi pecadocunaca borrashca cuendami can ninmi (Hechos 3:19). Taita Diosca gentecunapa “juchataca napacha cutinga yarishachu” ninmi (Jeremías 31:34). Shinaca, Taita Dios perdonashpaca para siempremi perdonan. Ñucanchi pecadocunata perdonashpaca, ñucanchicuna ima pecadota rurashcataca na cutin nijunllu, ni cutin cutinbash na castigajunllu.

 Pero Taita Dios perdonashpaca na llaquinaigumi can nishpallachu perdonan. Taita Diosca siempre alita ruraj Taita Diosmi can. Chaimi huaquin pecadocunataca na perdonan (Josué 24:19, 20).

Taita Dios ñucanchita perdonachunga ¿imatata rurana capanchi?

1.   Taita Diospa mandamientocunata na cazushpa pecadota rurashcatami reconocina capanchi. Pecadota rurashpa shujcunata llaquichishpapash, ashtahuanbachaca Taita Diosta llaquichishcatami pundapica reconocina capanchi (Salmo 51:1, 4; Hechos 24:16).

2.   Oracionda rurashpami ñucanchicuna ima pecadota rurashcataca Taita Diosman villana capanchi (Salmo 32:5; 1 Juan 1:9).

3.   Pecadota rurashcamandaca ninandami llaquirina capanchi. ‘Taita Dios munashcashna llaquirishpa pecadocunamanda arripintirishpami’ ñucanchi pensamientocunataca cambiana capanchi (2 Corintios 7:10, TNM-S). Imamanda pecadopi urmashcatapash yaipimi charina capanchi y chai cosascunamandapashmi llaquirina capanchi (Mateo 5:27, 28).

4.   Ñucanchi causaipimi cambiocunata rurana capanchi (Hechos 3:19). Cambiashpaca, cutinga chai nali rurashca cosascunataca na ruranachu capanchi. O ima nali ruraita rurajushca cashpapash saquinami capanchi. Shinallata ñucanchi pensamientocunata, ruraicunataca totalmente cambiana capanchi (Efesios 4:23, 24).

5.   Imapash nalita rurashcata arreglangapaj o imapash dañota rurashcamandaca pagangapami esforzarina capanchi (Mateo 5:23, 24; 2 Corintios 7:11). Pitapash llaquichishca cashpaca, disculpahuai ninami capanchi. Shinallata imapash dañota rurashca cashpaca, chai dañomanda pagangapapashmi esforzarina capanchi (Lucas 19:7-10).

6.   Jesús paipa causaita cushcamandami Taita Diostaca perdonahuai nishpa mañana capanchi (Efesios 1:7). Ñucanchi oraciongunata Taita Dios uyachunga, ñucanchipashmi shujcunataca perdonana capanchi (Mateo 6:14, 15).

7.   Si shuj jatun pecadota rurashcanchica, Taita Diospa ñaupapi cutin ali ricuringapaj ayudachun, ñucanchimanda oracionda rurachunmi congregacionmanda shuj huauquihuan parlana capanchi (Santiago 5:14-16).

¿Ima panda yuyaicunatata huaquingunaca charin?

 “Si shuj curaman o pastorman ñuca pecadocunata confesanica, paica ñuca pecadocunata perdonangami”.

 Taita Diospa mandamiento na cazushpa pecadota ruraj gentecunataca nipipash na perdonaita ushanllu. Ñucanchicuna ima pecadota rurashcata shuj personaman villanaca alimi can. Pero nipipash na pecadocunata perdonaitaca ushanllu. Solo Taita Diosllami pecadocunata perdonaitaca ushan (Efesios 4:32; 1 Juan 1:7, 9).

 Shinaca ¿imashpata Jesusca nirca: “Pipash pecadota rurajpi canguna paita perdonajpica, ñami Taita Diosca paitaca perdonashca. Pero si pipash pecadota rurajpi canguna paita na perdonajpica, Taita Diosca paitaca na perdonashcachu” nishpa? (Juan 20:23). Chai shimicunata nishpaca, apostolcuna espíritu santo chasquishpa shuj autoridad especialta charinatami Jesusca nijurca (Juan 20:22).

 Jesús nishcashnami apostolcunaca huata 33​pi espíritu santota chasquirca (Hechos 2:1-4). Apóstol Pedroca espíritu santota chasquishpa autoridadta charishpami Ananías y Safirataca juzgarca. Paica shuj milagropi cuendami paicuna umachijujtaca yacharca. Shina umachimandami paicunaca huañuita tarirca. Shinami apóstol Pedroca paicunapa pecadocunamandaca na perdonai tucuna cashcata ricuchirca (Hechos 5:1-11).

 Shinapash espíritu santota chasquimandami apóstol Pedroca Ananías y Safira umachijujtaca shuj milagropi cuenda yacharca. Espíritu santota chasquimandami shujcunaca jambita, shuj shuj idiomacunapi parlaita usharca. Pero apostolcuna huañushca jipaca nipi na chai milagrocunataca rurai usharcachu (1 Corintios 13:8-10). Chaimi cunan punllacunapica, nipi shuj personacunapa pecadocunata perdonaitaca na ushan.