Génesis 7:1-24
7 Chai jipami Jehová Diosca Noetaca nirca: “Canba familiahuan arcaman yaicui. Canga cai tiempopi gentecunamanda diferente, alita rurajmi* cangui.
2 Cada limpio animalcunamandaca 7tami* apana cangui. Jaricuna y huarmicunami cana can. Pero na limpio animalcunamandaca ishcaitallami apana cangui, shuj jarita y shuj huarmita.
3 Cielota volaj animalcunapash tiashpa catichunga, huahuacunata charichunmi 7ta* apana cangui. Jaricuna y huarmicunami cana can.
4 Porque solo 7 punllacunapillami cai alpapica 40 punllacunata y 40 tutacunata tamiachigrini. Ñuca rurashca gentecunata y animalcunataca tucuchishpami saquigrini” nirca.
5 Noeca Jehová Dios tucui imata mandashcatami rurarca.
6 Ninan Manllanai Tamia* callarishca tiempopica, Noeca 600 añostami charirca. Chai tamiami cai alpataca taparca.*
7 Ninan Manllanai Tamia nara callarijpillatami Noeca paipa churicunahuan, paipa huarmihuan y paipa jachungunahuanbash arcamanga yaicurca.
8 Limpio animalcunapash, na limpio animalcunapash, cielota volaj animalcunapash y cai alpapi causaita charij tucui animalcunapashmi arca ucuman yaicurca.
9 Tucuilla animalgucunami Noé maipi cashcaman rirca. Noeman Taita Dios mandashcashnami chai animalgucunaca shuj jari, shuj huarmi ishcai ishcai arcamanga yaicunajurca.
10 Shinami 7 punllacuna jipaca, cai alpapica ninanda tamiai callarirca.
11 Noé 600 añosta charijpi y segundo quillapa* punlla número 17pimi, jahua cielopi tiashca tucuilla yacucunaca talirimurca. Cielopi pungucunapashmi pascarirca.
12 Shinami cai alpapica 40 punllacunata y 40 tutacunata ushashcata* tamiarca.
13 Chai punllapillatami Noeca paipa quimsa churicunahuan, paipa huarmihuan y paipa quimsa jachungunahuanbash arcaman yaicurca. Noepa churicunaca Sem, Cam y Jafet shuticunami carca.
14 Paicunaca según paicunapa clase tucui laya sacha animalcunahuan, según paicunapa clase tucui laya na sacha animalcunahuanmi yaicurca. Shinallata, según paicunapa clase llucashpa purij tucui laya animalcunahuan* y según paicunapa clase cielota volaj tucui laya animalcunahuanmi arcamanga yaicurca. Chai volaj animalcunaca tucuilla pajarocuna y alasta charij tucuilla animalcunami can.
15 Causana samaita* charij tucui laya animalcunami Noé maipi cashcaman rirca. Arcamanga ishcai ishcaimi yaicunajurca.
16 Noeman Taita Dios mandashcashnami tucui laya animalcunaca jaricuna cashpa, huarmicuna cashpapash arcaman yaicunajurca. Shinami Jehová Diosca Noé yaicushca jipaca, arca punguta vicharca.*
17 Y 40 punllacunatami cai alpapica ushashcata tamiajurcalla. Tamia yacucunaca cai alpapi ashtahuan ashtahuan jundashpami, arcataca alzai callarirca. Chaimi arcaca yacucuna jahuata huambujurca.
18 Tamia yacucunaca ashtahuan ashtahuan jundashpami alpataca tapaitapacha taparca.* Pero arcaca yacucuna jahuapimi huambujurcalla.
19 Yacucunaca ushashcata jundashpami, mundo enteropi jatun urcucunatapash tucuillata taparca.
20 Urcucunamandaca 7 metrosta* jahuamanmi yacucunaca jundarca.
21 Shinami cai alpapi causaita charijcunaca tucuilla huañurca. Jahuata volaj animalcuna cashpa, na sacha animalcuna cashpa, sacha animalcuna cashpa, uchilla animalcuna* cashpa y gentecuna cashpapash tucuillami huañurca.
22 Cai chaquishca alpapi causana samaita* charijcunaca tucuillami huañurca.
23 Cai alpapi causajcunataca tucuillatami Taita Diosca* tucuchirca. Gentecunata, animalcunata, llucashpa purij animalcunata,* cielota volaj animalcunatapashmi tucuchirca. Tucuillami huañurca. Solo Noé y arcapi paihuan cajcunallami salvarirca.
24 Yacucunaca 150 punllacunacamanmi cai alpataca taparca.
Notacuna
^ O talvez “7 limpio jari animalcuna, 7 limpio huarmi animalcuna”.
^ O talvez “cielota volaj 7 jari animalcuna, 7 huarmi animalcuna”.
^ O “Diluvio”.
^ O “quilparca”.
^ Caipi segundo quillapa nishpaca mediados de octubremanda a mediados de noviembrecamanmi parlajun. Apéndice B15ta ricupangui.
^ O “pudishcata”.
^ Shina nishpaca talvez culebracunamanda, lagartijacunamanda, ucuchacunamanda y jurucunamandapashmi parlajun yarin.
^ O “causaita cuj espirituta”. Hebreo shimipica “rúaj” nijunmi. Glosariopi “espíritu” shimita ricupangui.
^ O “vichicarca”.
^ O “quilpaitapacha quilparca”.
^ Hebreo shimipica “15 codos” nijunmi.
^ Caipica por grupo tandanajushpa causaj uchilla animalcunamandami parlajun yarin.
^ O “causaita cuj espirituta”. Hebreo shimipica “rúaj” nijunmi. Glosariopi “espíritu” shimita ricupangui.
^ Hebreo shimipica “Paica” nijunmi.
^ Shina nishpaca talvez culebracunamanda, lagartijacunamanda, ucuchacunamanda y jurucunamandapashmi parlajun yarin.
