Apocalipsis 13:1-18
13 Chai dragonga mar yacu manñapimi shayanman quidarca.*
Chaipimi, mar yacumanda shuj manllanai sacha animal llujshimujta ricurcani. Chai animalca 10 cachocunata y 7 umacunatami charirca. Paipa cachocunapica 10 coronacunata churajushcami carca. Umacunapica, Taita Diosta nalicachishpa rimaj o nalicunata rimaj shuticunatami escribishca charirca.
2 Ñuca ricushca manllanai sacha animalca shuj leopardoshnami carca. Shinapash paipa chaquicunaca osopa chaquicunashnami carca. Y paipa shimica leonba shimishnami carca. Chai dragonmi, chai sacha animalmanga paipa podertapash, pai mandangapaj tiarina pushtutapash* ashtaca autoridadtapash curca.
3 Sacha animalpa shuj umaca huañujta cuchui tucushcashnami carca. Shina cashpapash chai cuchui tucushcaca ñami ali tucushcarca. Chaimi cai alpapi gentecunaca tucuicuna chai sacha animalta alicachishpa* catinajurca.
4 Shinallata dragondami paicunaca adoranajurca. Porque paimi sacha animalmanga autoridadta cushcarca. Sacha animaltaca cashna nishpami gentecunaca adoranajurca: “¿Pita chai sacha animalshnaca tian? ¿Pita paihuan macanajuitaca ushanga?” ninajurcami.
5 Sacha animalca jariyajungapaj y Taita Diosta nalicachishpa o nalicunata rimajungapami poderta chasquirca. Shinallata, 42 quillacunacaman pai ima munashcata rurangapami poderta chasquirca.
6 Chai jipami paica, Taita Diostapash, Taita Diospa shutitapash, Taita Dios causajuj pushtutapash, jahua cielopi causanajujcunatapash nalicachishpa o nalicunata rimajurca.
7 Manllanai sacha animalca, Taita Diospa separashcacunahuan* macanajushpa, paicunata mishana oportunidadtami chasquirca. Shinallata tucui jatun familiacunata, tucui pueblocunata, tucui idiomacunata parlaj gentecunata y tucui llactacunata mandana autoridadtami chasquirca.
8 Cai alpapi causanajujcunaca tucuillami chai sacha animalta adoranajurca. Paicunapa shutica picunalla causaita chasquinata ricuchij libropica na escribishca tiajurcachu. Paicunapa shutica cai mundo* tiai callarishcamandapachaca ni shujllapash na escribishca tiajurcachu. Cai libroca, huañuchi tucushca Maltun Llamapa libromi can.
9 Rinrita charishpaca, ali uyanguichi.
10 Si maijanbash carcelpi churai tucuna cashpaca carcelpi churai tucungami. Y si maijanbash espadahuan huañuchishpaca* espadahuanmi huañuchi tucunga. Chaimandami Taita Diospa separashcacunaca aguantana can y tucui shunguhuanbash crina can.
11 Chai jipaca, shuj cati manllanai sacha animaltapashmi ricurcani. Cai cati sacha animalca alpamandami llujshimurca. Chai cati sacha animalca, shuj maltun llamashnami ishcai cachocunata charirca. Shinapash dragonshnami parlai callarirca.
12 Cai cati manllanai sacha animalca, primer sacha animalpa ñaupapimi, primer animal charishca autoridadtallata paipash charishcata ricuchirca. Chai cati sacha animalca cai alpapash y cai alpapi causanajujcunapash, primer sacha animalta adorachunmi obligarca. Cai primer sacha animalca huañujta cuchui tucushcamanda ali tucushcami carca.
13 Cati sacha animalca manllanai cosascunatami rurarca. Hasta gentecuna ricujtami cielomandaca ninata cai alpaman uriajuchirca.
14 Chai cati sacha animalca, primer sacha animalpa ñaupapimi manllarinai cosascunata rurai usharca. Chai manllarinai cosascunahuanmi cati sacha animalca cai alpapi causanajuj gentecunataca umachirca. Shinallata cai alpapi gentecunataca, primer sacha animalpa estatuata ruraichi ninmi. Chai primer sacha animalca espadahuan chugrichi tucushpa cutin causarishcami carca.
15 Shinallata, primer sacha animalpa estatuaman causaita* cungapami cati sacha animalca permisota chasquirca. Primer sacha animalpa estatua parlachun y primer sacha animalpa imagenda na adorangapaj munajcunata huañuchichunmi cati sacha animalca shina rurarca.
16 Tucuicunatami uchillacuna cajpi, jatunguna cajpi* charijcuna cajpi, pobrecuna cajpi, librecuna cajpi, esclavocuna cajpipash ali lado maquipi o frentepi shuj señalta charichun obligan.
17 Chai señalta na charijcunaca nipi ama randichun ni ama jatuita ushachunmi shina rurarca. Solo, primer sacha animalpa shutipa o paipa numeropa señalta charijcunallami randita o jatuitaca ushana carca.
18 Primer sacha animalpa numerotaca ali intindi ushajcunami calculana can. Porque chai numeroca gentepa numeromi can. Chai numeroca 666mi can. Ali yachajushcacunallami chaitaca intindita ushan.
Notacuna
^ O “saquirirca”.
^ Griego shimipica “tronotapash” nijunmi.
^ O “mainishpa”.
^ Glosariopi “Taita Diospa separashcacuna” shimita ricupangui.
^ Caipica “Adán y Evapa huahuacunamandami” parlajun.
^ O talvez “pipash espadahuan huañuchi tucuna cashpaca”.
^ Griego shimipica “samaita” nijunmi.
^ O “importantecuna cajpi, na yapa importantecuna cajpi”.
