Filipenses 2:1-30
2 Quiquingunaca Cristohuan shujllashna caimandami, caishuj chaishuj animarina capanguichi. Juyarishpami caishuj chaishuj cushichirina capanguichi. Caishujmanda chaishujmandami preocuparishcata, juyarishcata y llaquishcatapash ricuchina capanguichi.
2 Shina rurajpica, ñucaca ninandami cushijusha. Quiquingunaca shujlla yuyaimi cana capanguichi. Caishuj chaishujmi juyarina capanguichi. Shinallata shujllashna unidomi cana capanguichi. Y chai pensamientotallatami* charina capanguichi.
3 Envidiamandalla o jariyanamandallaca na imatapash ruranachu capanguichi. Sino humildemi cana capanguichi. Y shujcuna quiquingunamanda yali cashcataca yaipimi charina capanguichi.
4 Shinallata na quiquingunapa beneficiotallachu mascana capanguichi. Sino shujcunapa beneficiotapashmi mascana capanguichi.
5 Cristo Jesús pensashcashnallatami pensashpa catina capanguichi.
6 Paica Taita Diosman parecido cashpapash, Taita Dios charishca autoridadta quichungapaj o Taita Dios cuenda cangapaca pensaitallapash na pensarcachu.
7 Ashtahuangarin, tucui imata charishcata saquishpami esclavoshna tucurca y gentecunashna tucurca.
8 Chai jahuapash, gente tucushpa shamushpaca humillarircami. Y huañungacamanmi Taita Diostaca tucuipi cazurca. Ari, paica jatun racu caspipimi* huañurca.
9 Chaimandami Taita Diosca shuj ashtahuan importante cargota paimanga curca. Shinallata tucuicunamanda yali ashtahuan autoridadtami Taita Diosca tucui shunguhuan paimanga curca.
10 Jahua cielopi cajcuna, cai alpapi cajcuna, alpa ucupi cajcunapash tucuicuna Jesuspa shutita respetachunmi* shina rurarca.
11 Shinami tucuicuna Jesucristo Señor cashcataca shujcunapa ñaupapi villachishpa Taita Diosta alabanga.
12 Juyashca huauquicuna, quiquingunaca siempremi Taita Diostaca cazunata yachapanguichi. Ñuca chaipi cajpipashmi cazunata yachapanguichi. Ñuca na chaipi cajpicarin ashtahuanmi cazunata yachapanguichi. Shinaca ninanda respetashpa y manllashpami quiquinguna salvaringapaca esforzarishpa catina capanguichi.
13 Porque Taita Diosmi quiquingunamanga paipa voluntadta rurachun fuerzata cun. Chaimi paipa voluntadta rurana munaita charichun y chaita pactachichunbash fuerzata cun.
14 Na quejarishpa, na pliturishpami tucuita rurashpa catina capanguichi.
15 Shinami quiquingunaca ima culpapash illa, sin pecado huahuacuna Taita Diospaca capanguichi. Shinallata ima pandapash illa caimandami, cai tiempopi nali gentecunapurapi* causanajushpapash shuj michagushna punchapambata brillanguichi.
16 Chaipaca, causaita cuj Taita Diospa shimitaca, shinllita chaririajunshnami causana capanguichi. Quiquinguna shina rurashcata yachashpami, Cristopa punllapica ninanda cushijusha. Chaimi na yangata esforzarishcanichu, na yanga trabajashcanichu yashpa cushijusha.
17 Ñucaca sacrificio* jahuapi talishca vinoshnami capani. Shina cashpapashmi, quiquinguna rurashca sacrificiotapash y Taita Diospi crishpa paita ali sirvinajushcatapash apoyajupani. Chaimandami ñucaca cushijuni y tucui quiquingunahuanbash cushijuni.
18 Shinallata quiquingunapash ñucahuan cushijupaichi.
19 Ñucaca, Señor Jesuspa voluntad cajpica, Timoteota quiquingunapaman ñalla cachangapami munapani. Shinami quiquingunamanda ali noticiacunata uyashpaca cushijusha.
20 Porque paitashnaca nipita na charipanichu. Paica tucui shunguhuanmi quiquingunamandaca preocuparin.
21 Porque tucui chaishujcunaca Jesucristo imata munashcapi pensarinapa randica, paicunapa alipillami pensarinata yachan.
22 Pero Timoteoca shuj ali ejemplotami ricuchishca. Y chaitaca alimi quiquingunaca yachapanguichi. Paica shuj churi paipa taitahuan shuj esclavoshna shinllita trabajashpami, ali villaicunata villachishpa ñucataca ninanda ayudahuashca.
23 Chaimi ñucahuan ima pasanata yachashcandi, Timoteotaca quiquingunapaman cachangapaj munajupani.
24 Ashtahuangarin, ñucanchi Señor Jesuspa voluntad cajpica, ñallami quiquingunapaman ripasha.
25 Pero cunanga, Epafroditotami quiquingunapaman cachana minishtirishcata yashpami paitaca tigrai cachagripani. Paica ñuca huauqui, ñucata ayudaj, ñucapa cumba soldadoshnami can. Paitami ñuca imata minishtishcagupi ayudachun cachamuparcanguichi.
26 Paica ninandami tucui quiquingunataca ricungapaj munan. Pai ungushca cashcata quiquinguna yachaj chayashcata yachashpami paica llaqui llaqui can.
27 Paica ungushcapachami carca. Cazimi huañurca. Shinapash Taita Diosmi paitaca llaquirca. Pero Taita Diosca na solo paitallachu llaquirca. Sino ñucatapashmi llaquirca. Ama ñuca yapata sufrijuchunmi, Taita Diosca shina rurarca.
28 Chaimi paitaca uchalla quiquingunapaman cachajupani. Shinami paita cutin ricushpaca cushijupanguichi. Y ñucapashmi ashtahuan tranquilo sintiripasha.
29 Shinaca, imashinami ñucanchi Señor Jesuspa discipulocunata chasquinata yachapanguichi, shinallatami paitaca cushijushpa chasquina capanguichi. Paishna huauquicunataca juyashpa catipanguichi.
30 Porque paica Cristopa obrata ruraimandami cazi huañurca. Quiquinguna na caipi cashpa ñucata na ayudai ushajpimi, paica paipa causaitapash* peligropi churashpa ñucataca ayudahuarca.
Notacuna
^ O “chai shungutallatami”.
^ Glosariopi “huañuchingapaj jatun racu caspi” shimita ricupangui.
^ Griego shimipica “tucuicuna cungurichunmi” nijunmi.
^ O “generacionbi”.
^ Glosariopi “sacrificio” shimita ricupangui.
