Lucas 4:1-44
-
Diabloca Jesusta tentacionbi urmachingapami munarca (1-13)
-
Jesusca Galilea llactapimi predicai callarirca (14, 15)
-
Jesusca Nazaret llactapimi rechazai tucurca (16-30)
-
Capernaúm llactapi sinagoga huasimanmi Jesusca yaicurca (31-37)
-
Simonba suedrata y shujcunatapashmi jambirca (38-41)
-
Gentecunaca shuj chulunlla pushtupimi Jesushuanga tuparirca (42-44)
4 Jesusca Jordán yacu ladomandami rirca. Paimanga Taita Diosmi paipa espíritu santota curca. Taita Diospa espíritu santo yuyachijpimi, Jesusca shuj desiertoman rirca.
2 Chaipica 40 punllacunatami carca. Chaipimi Diabloca Jesusta tentacionbi urmachingapaj munarca. Chai punllacunapica nima nimata na micushcarcachu. Chaimi, chai 40 punllacuna yalishca jipaca Jesusca ninanda yarjachijurca.
3 Chaipimi Diabloca Jesustaca nirca: “Diospa churi cashpaca, cai rumita tandaman tigrachiyari”.
4 Shinapash Jesusca nircami: “Taita Dios escribichishca shimipica nijunmi, gentecunaca tandata micushpallaca na causai ushangachu” nirca.
5 Chai jipami, Jesustaca shuj jatun jatun urcu jahuaman apashpa, Diabloca cai alpapi tucuilla llactacunata ricuchirca.
6 Shina ricuchishpami Diabloca nirca: “Cai juyailla alipacha llactacunatapash canmanmi cusha. Shinallata, cai llactacunata mandana podertapash canmanmi cusha. Cai tucuilla llactacunaca ñucapami can. Chai llactacunata mandana podertaca piman cungapaj munashpapash cushallami.
7 Shinaca shuj viajetallapash ñucata adorajpica, tucui caicunatami canman cusha”.
8 Shina nijpimi Jesusca nirca: “Taita Dios escribichishca shimipica, ‘Jehová* Diostami adorana cangui. Paitallami sirvina cangui nijunmi’”.
9 Chai jipami Diabloca, Jerusalén llactapi tiaj Taita Diospa templo huasi jahuaman Jesustaca aparca. Shina apashpami Diabloca, Jesustaca nirca: “Diospa churi cashpaca, caimanda ucuman shitari.
10 Porque Taita Dios escribichishca shimipica nijunmi: ‘Canda cuidangapami paica paipa angelcunata cachamunga’.
11 ‘Chai angelcunaca rumipi ama huactarichunmi candaca ayudanga’” nirca.
12 Chaimi Jesusca nirca: “Taita Dios escribichishca shimipica nijunmi: ‘Jehová* Dios ayudajta o na ayudajta ricungapallaca na imatapash rurajunachu cangui’” nishpa.
13 Diabloca quimsa viajeta tentangapaj munashca jipami, shuj punlla tentashallami yashpa Jesusmanda caruyarca.
14 Chai jipaca Galilea llactamanmi Jesusca tigrarca. Taita Diospa espíritu santopa podertami charirca. Jesuspa ali rurashcacunataca Galilea llacta tucui ladocunapimi yachaj chayarca.
15 Jesusca, sinagoga* huasicunapipashmi yachachi callarirca. Tucui gentecunami Jesusmandaca alicunata parlanajurca.
16 Jipamanga pai viñashca Nazaret llactamanmi Jesusca rirca. Paica sábado punllapica* sinagoga huasiman yaicuna costumbretami charirca. Chaimi chaiman yaicushpa Taita Dios escribichishca shimita liingapaj shayarirca.
17 Chaipimi shuj runaguca profeta Isaías escribishca rollota* Jesusman yalichirca. Chaimi Jesusca chai rollota pascashpa chaipi escribishca tiajuj cai shimicunata tarirca:
18 “Jehová* Diosmi ñucamanga paipa espíritu santota cuhuashca. Paimi ñucataca pobre gentegucunaman ali villaicunata predicachun agllahuashca. Shinallata prezoshna causanajuj gentecunamanbash cacharichi tucunguichimi nishpa villachun y ñausa gentegucunapash cutin ricui ushachun paicunata ayudachunmi ñucataca cachamuhuashca. Sufrishpa causanajuj gentecunatapash libre saquichunmi cachamuhuashca.
19 Ashtahuanbash Jehová* Dios cutin bendiciana tiempomanda predicachunmi paica cachamuhuashca” nishpa.
20 Chai jipaca chai rollota pillushpami sinagoga huasipi cuidador runaguman tigrachishpa Jesusca tiaringapaj rirca. Tucui chaipi cashcacunami Jesustaca catishpa ricunajurca.
21 Jesusca paicunataca ni callarircami: “Taita Dios escribichishca shimimanda chairalla ñuca liishca cai shimicunaca cunanmi pactarijun” nirca.
22 Tucuicunami Jesusmandaca alicunata parlanajurca. Jesús juyailla shimicunahuan parlajta uyashpami, gentecunaca manllarishpa ninajurca: “¿Nachu paica Josepa churi canyari?”.
23 Chaimi Jesusca nirca: “Cangunaca ñucataca nihuanguichimi: ‘Nachu doctor canguiyari, canllata jambiriyari. Capernaúm llactapica ashtaca milagrocunata rurashcatami uyarcanchi. Chaitaca canba llactapipash rurayari’”.
24 Shinallata Jesusca nircami: “Ciertopachami cangunataca nini, ni maijan profetatapash paipa propio llactapica na ali chasquinllu.
25 Na llullashpami cangunataca cashna nini, Eliaspa punllacunapica ashtaca viuda huarmigucunami Israel llactapica tiarca. Chai punllacunapica quimsa huata chaupitami nimata na tamiashcarca. Chaimi chai tucuilla llactapi ninan yarjai tiarca.
26 Shinapash Eliastaca, Israel llactapi ni shuj viuda huarmigupaman na cacharcachu. Sino Sidón llactapi Sarepta llactamanda viuda huarmigupamanllami Eliastaca cacharca.
27 Shinallata profeta Eliseopa punllacunapica, lepra* unguita charij ashtaca gentecunami Israel llactapica tiarca. Shinapash Eliseoca, chai llactamanda gentecunataca ni shujta na jambircachu. Sino Siria llactamanda Naamán runagutallami jambirca” nirca.
28 Chaicunata sinagoga huasipi uyanajuj tucuilla gentecunaca ninandami culirarca.
29 Chaimi chai gentecunaca shayarishpa Jesustaca chai llactamanda uchalla llujchirca. Chai llactaca urcu jahuapimi tiajurca. Chai urcu jahuamanda shitangapami Jesustaca apanajurca.
30 Shinapash Jesusca paicunapa chaupita yalishpami, ñanda catishpa rirca.
31 Chai jipaca, Capernaúm llactamanmi Jesusca urai rirca. Capernaúm llactaca Galileapimi carca. Sabadocunataca chai llactapimi Jesusca gentecunaman yachachin carca.
32 Jesús imashina yachachijta uyashpami gentecunaca manllarinajurca. Porque paica Taita Diospa poderhuanmi yachachijurca.
33 Sinagoga huasipica demonio** jundashca shuj runami chaipi carca. Chai demonioca shinllitami cashna caparijurca:
34 “Nazaret llactamanda Jesús ¿imapata caimanga shamurcangui? ¿Ñucanchita tucuchingapachu shamurcangui? Taita Dios canda cachamushcataca alimi yachani”.
35 Shina nijpimi Jesusca chai demoniotaca* cashna rimarca: “Upallai, cai runamanda llujshi”. Shina nijpimi chai demonioca gentecunapa chaupipi chai runagutaca alpaman urmachirca. Shinapash imatapash na rurashpami chai runagumandaca llujshirca.
36 Chaita ricushpami tucuilla gentecunaca manllarishpa paicunapura parlarishpa ninajurca: “Caica ¿imatayari? Pai mandashcata uyashpami demoniocunapash* cazushpa gentecunamanda llujshinajuj” nishpa.
37 Jesusmanda ali villaicunataca tucui ladocunapimi yachaj chayarca.
38 Chai jipaca sinagoga huasimanda llujshishpami, Jesusca Simonba huasiman rirca. Chaipica Simonba suedrami calenturahuan na valijurca. Chaimi chaipi cajcunaca Jesustaca, paita jambipai ninajurca.
39 Shina nijpimi Jesusca chai huarmigupaman quimirishpa jambirca. Chai huarmiguca ali tucushcandi jatarishpami, paicunaman carangapaj micunaguta yanui callarirca.
40 Ña indi huashajujujpimi gentecunaca paicunapa huasimanda shuj shuj unguita charijcunata Jesuspaman apanajurca. Chaimi Jesusca cada unopa uma jahuapi maquita churashpa jambijurca.
41 Ashtaca gentecunamanda demoniocunata Jesús llujchijpimi demoniocunaca cashna caparinajurca: “Canga Taita Diospa Churimi cangui” nishpa. Pero demoniocuna parlanajuchunga na saquircachu. Porque demoniocunaca pai Cristo cashcataca alimi yacharca.
42 Ña punllayajujpimi Jesusca chaimanda llujshishpa shuj chulunlla pushtuman rirca. Shinapash ashtaca gentecunami paita mascai callarirca. Jesusta tuparishpaca ama ripaichu nishpami roganajurca.
43 Shinapash Jesusca paicunataca nircami: “Taita Diospa Gobiernomanda ali villaicunataca shuj llactacunapipashmi predicana cani. Porque chaipami Taita Diosca ñucataca cachamuhuashca” nirca.
44 Shinami Jesusca Judea llactapa sinagoga huasicunapi ali villaicunata predicashpa catirca.
Notacuna
^ Glosariopi “sinagoga huasi” shimita ricupangui.
^ O “aya”.
^ Griego shimipica “nali ángel” nijunmi.
^ Griego shimipica “nali angeltaca” nijunmi.
^ Griego shimipica “nali angelcunapash” nijunmi.
