Marcos 6:1-56
-
Paipa llactamanda gentecunallatami Jesustaca rechazarca (1-6)
-
Imashina predicanatami 12 apostolcunamanga yachachirca (7-13)
-
Juan Bautistaca huañurcami (14-29)
-
Jesusca 5 mil gentecunamanmi micuchirca (30-44)
-
Jesusca yacu jahuatami purirca (45-52)
-
Genesaret llactapimi Jesusca ashtaca ungushcacunata jambirca (53-56)
6 Jipamanga, chai huasimanda llujshishpami Jesusca paipa llactaman rirca. Paipa discipulocunapashmi paitaca cumbashpa rinajurca.
2 Sábado punlla chayajpimi Jesusca sinagoga huasipi yachachi callarirca. Paita uyashpami cazi tucui gentecuna manllarishpa ninajurca: “Cai runaca ¿maipita cai tucuita yachajushcayari? ¿Imashpata ashtaca cosascunata yachanyari? Cai milagrocunata rurachunga ¿pita paimanga poderta cushcayari?
3 ¿Nachu paica carpintero can? ¿Nachu paipa mamaca María can? ¿Nachu paipa huauquicunaca Santiago, José, Judas y Simón can? ¿Nachu paipa panicunapash ñucanchi llactapillata causanajun?” ninajurcami. Chaimi paicunaca Jesuspi cringapaca na munanajurca.
4 Shinapash Jesusca paicunataca nircami: “Shuj llactamanda gentecunaca shuj profetataca respetanmi. Shinapash, profeta runagupa propio llactapillata, paipa propio familiapillata y paipa propio huasipillata gentecunaca na respetanllu” nircami.
5 Chaimi Jesusca ni shuj milagrotapash na chaipica rurarca. Solo huaquin ungushca gentecunatallami paipa maquita paicunapa umapi churashpa jambirca.
6 Ashtahuangarin, chai gentecuna na tucui shunguhuan crijta ricushpami Jesusca manllarirca. Paica muyundi ladolla pueblocunapimi yachachishpa purijurca.
7 Chai jipami Jesusca paipa 12 apostolcunata tandachishpa, ishcai ishcai cachai callarirca. Paicunamanga demoniocunata* llujchina podertami curca.
8 Shinallata ñanda ringapaca na imatapash apanachu canguichi, shuj tauna caspigutallami apana canguichi nishpami paicunataca mandarca. Tandata, culquita* cara bolsogupi micunata apachunbash na mandarcachu.
9 Sandaliataca churajunguichilla nircami. Pero ishcai churajunata apana cashcataca na nircachu.
10 Shinallata nircami: “Shuj huasiman yaicushpaca, chai llactamanda rina horascamanmi chai huasipi quidana* canguichi.
11 Pero si maijan llactapipash cangunata na chasquijpi o Taita Diospa shimicunata na uyajpica paicuna nalita ruranajushcata ricuchingapami chaimanda ña llujshinajushpaca, cangunapa chaquimanda polvota chafsirina* canguichi”.
12 Jesús shina nijpimi paipa discipulocunaca chaimanda rirca. Paicunaca arripintirinami canguichi nishpami gentecunamanga predicai callarirca.
13 Demonio jundashca gentecunamandapashmi demoniocunata llujchinajurca. Shinallata, aceiteta javishpami ashtaca gentecunata jambinajurca.
14 Chaitami rey Herodesca* yachaj chayarca. Porque tucui llactacunapimi gentecunaca Jesusmanda parlanajurca. Gentecunaca cashnami ninajurca: “Paica huañushcacunamanda causarishca Juan Bautistami can. Chaimi milagrocunatapash rurai ushan”.
15 Shinapash shujcunaca ninajurcami: “Paica Eliasmi can” nishpa. Cutin shujcunaca ninajurcami: “Paica caishuj profetacunashna, profetami can” nishpa.
16 Chashna ninajujta uyashpami rey Herodesca nirca: “Umata fitishpa ñuca huañuchichun cachashca Juanmi causarimushca”* nishpa.
17 Rey Herodesca, Herodías shuti huarmipa ñaupapi ali ricuringapaj munashpami, Juandaca cadenahuan huatashpa carcelpi churachun cachashcarca. Herodiasca, Herodespa huauqui Filipohuanmi primeroca cazarashca carca. Herodías shuti huarmi Herodeshuan cazarashca cajpimi,
18 Juanga cutin cutin rey Herodestaca nishcarca: “Leypi nishcashnaca, canba huauquipa huarmihuanllata cazarashpaca, jatun nalitami rurajungui” nishpa.
19 Chaita uyashpami Herodías huarmica, Juanda na ricunayachishpa huañuchingapaj munajurca. Pero Juanda huañuchitaca na ushashcarcachu.
20 Porque Juandaca rey Herodesca manllarcami. Juan na culpata charijta* y Taita Diosta sirvij cashcataca rey Herodesca alimi yacharca. Juanba parlashcacunataca rey Herodesca gushtanmi carca. Chaimi Juanda uyashpaca, paita imata ruranataca na atinan carca.
21 Herodesca paipa cumpleaños punlla chayajpimi shuj jatun micuita rurarca. Chai micuimanga importante jaricunata y mil soldadocunata mandajcunata y Galilea llactamanda ashtahuan rijsishca gentecunatapashmi invitarca. Chaipimi Herodiasca pai imata pensajushcataca pactachi ushagrijurca.
22 Chai punllapimi Herodiaspa ushica* paicunapaman yaicushpa bailarca. Chaita ricushpami Herodespash y paihuan micunajujcunapash ninanda alicachirca o cushijurca. Chaimi rey Herodesca chai cuitsataca* cashna nirca: “Can imata munashcata mañahuailla. Imata mañajpipash cushallami” nishpa.
23 Ashtahuanbash Herodesca cashnami juramenturca: “Can imata mañajpipash cushallami, ñuca mandajuj llactacunamanda chaupitapash cushallami”.
24 Shina nijpimi Herodiaspa ushica chaimanda llujshishpa paipa mamata tapurca: “¿Imatata mañana cani?”. Chaimi paipa mamaca nirca: “Juan Bautistapa umata mañagri”.
25 Shina nishca ratopillatami chai cuitsaca, rey Herodespaman calpashpa rishpa cashna nirca: “Juan Bautistapa umata fitishpa, cunanda shuj jatun platopi apamuchunmi munapani”.
26 Shina nijpica rey Herodesca ninandami llaquirirca. Shinapash, invitashca gentecunapa ñaupapi juramentushcata yarishpami* chai cuitsa imata mañashcataca pactachirca.
27 Chaimandami rey Herodesca Juanba umata fitichun chai rato shuj guardiata carcelman cacharca. Chaimi chai guardiaca carcelman rishpa Juanba umata fitirca.
28 Shina fitishpami, Juanba umataca shuj jatun platopi apamushpa Herodiaspa ushiman curca. Chaimi paica paipa mamaman curca.
29 Juanba discipulocuna chaita yachaj chayashpami, paicuna shamushpa Juanba cuerpota apashpa shuj bóveda jatun utujupi churagrirca.
30 Apostolcuna tigramushpaca, paicuna imata rurashcata, imata yachachishcatami tucuita Jesusman villanajurca.
31 Chaimi paicunataca nirca: “Cangunaca ashaguta samanami canguichi, shuj chulunlla pushtuguman jacuchi” nirca. Ashtaca gentecuna shamunajujpi y rinajujpimi, paicunaca micungapaj tiempotallapash na charishcarca.
32 Chaimandami paicunalla cangapaj shuj canoapi vitsashpa* rirca.
33 Shinapash paicuna rinajujtaca gentecunaca ricunajurcami. Shuj gentecunapashmi paicuna rishcataca yachaj chayarca. Chaimi tucui llactamanda gentecunaca, ñapash chaquilla rishpa paicunata mishashpa chayagrirca.
34 Canoamanda Jesús uriajushpaca, michij illa llamagucunashna ashtaca gentecunata ricushpami ninanda llaquirirca. Chaimi paicunamanga ashtaca cosascunata yachachi callarirca.
35 Ña amsayajujpimi, Jesuspa discipulocunaca paipaman quimirishpa cashna ninajurca: “Cai pushtuca chulunllamari. Amsayaitapash ñamari amsayajun.
36 Gentecunataca ladolla pueblocunapi imapash micunaguta randigrichun cachapayari” nishpa.
37 Chaimi Jesusca nirca: “Cangunami paicunamanga micunaguta carana capanguichi” nishpa. Shina nijpimi paicunaca cashna nishpa tapurca: “¿Paicunaman carangapaj 200 denario* culquihuan tandata randingapaj richunllu munapangui?”.
38 Chaimi Jesusca paicunataca nirca: “¿Mashna tandagucunatata charinguichi? Ricugripaichi” nishpa. Ricungapaj rishca jipami paicunaca nirca: “5 tandagu, ishcai pescadogullami tiashca” nishpa.
39 Chaimi chai tucuilla gentecunataca, verdella jihua pambapi mundun mundun tiarichun mandarca.
40 Shina nijpimi huaquingunaca 100, 100 tandanajushpa, cutin shujcunaca 50, 50 tandanajushpa tiarirca.
41 Chai jipami Jesusca, 5 tandaguta, ishcai pescadoguta japishpa jahua cielota ricushpa, Taita Diosta mañashpa pagui nirca. Chaita rurashca jipami, tandacunataca pedaziashpa paipa discipulocunaman cui callarirca. Chaimi paipa discipulocunapash chai gentecunaman cararca. Ishcai pescadogucunatapashmi partishpa tucuicunaman cararca.
42 Shinami tucuicuna vijsa pactajta micurca.
43 Chai jipami tandapash y pescadocunapash puchujpi* 12 canasto jundata tandachirca.
44 Chai punllaca 5 mil jaricunami tandataca micurca.
45 Chai jipallami Jesusca paipa discipulocunataca canoaman vitsashpa, mar yacu chaishuj ladoman chimbashpa, Betsaida llactaman richun mandarca. Shinapash Jesusca gulpi gentecuna ringacamanmi chaipi quidarca.
46 Gentecuna rishca jipaca, Taita Diosta mañangapami Jesusca shuj lomaman rirca.
47 Ña tutayajpica, canoaca mar yacu chaupipimi carca. Shinapash Jesusca paillami lomapi carca.
48 Ninanda huairajujpi, paipa discipulocuna canoapi na ri ushanajujta ricushpami, ña punllayajujpica* yacu jahuata purishpa paicunapaman rirca. Jesusca paicunapa ladota yalishpa rishalla yashcami carca.
49 Shinapash, yacu jahuata purijujta ricushpami Jesuspa discipulocunaca caparishpa ninajurca: “Imata shamujunyari” nishpa.
50 Yacupi purijujta ricushpami tucuillacuna ninanda manllarinajurca. Shinapash Jesusca ñapashmi paicunataca nirca: “Ama manllaichichu. Ñucami cani” nishpa.
51 Canoaman Jesús vitsajpica ñana huairarcachu. Chaita ricushpami paipa discipulocunaca ninanda manllarinajurca.
52 Paicunaca tandacunahuan Jesús ima milagrota rurashcata ricushpapash na intindishcarcachu. Paicunapa shungupi cabalta intinditaca na ushanajurcachu.
53 Mar yacuta chimbashca jipaca, Genesaret llactaman chayashpami canoataca yacu manñapi huatarca.
54 Shinapash paicuna canoamanda uriajujpica, ñapashmi gentecunaca Jesusta rijsirca.
55 Jesús chayamushcataca llacta enteropimi gentecunaca villanajurca. Chaimi gentecunaca Jesús maiman rijpipash, ungushcacunata camillacunapi churashpa paipaman apanajurca.
56 Maijan llactaman y maijan puebloman Jesús yaicujpipash, gentecunaca plazacunamanmi ungushcacunataca apamunajurca. Shina apamujpimi ungushcacunaca, canba jahualla churajushca ropa* pundagutallapash tacarichun saquihuayari nishpa roganajurca. Jesuspa jahualla churajuna pundaguta tacarijcunaca tucuillami ali tucunajurca.
Notacuna
^ Griego shimipica “nali angelcunata” nijunmi.
^ Griego shimipica “bronceta” nijunmi.
^ O “saquirina”.
^ Chaquimanda polvota chafsirishpami, na culpata charishcata ricuchijurca.
^ Caipica “Herodes Antipas” nijunmi. Paica Herodes el Grande nishcapa churimi carca.
^ Griego shimipica “jatarimushca” nijunmi.
^ O “hijaca”.
^ O “solterataca”.
^ O “yuyarishpami”.
^ O “sicashpa”.
^ O “sobrajpi”.
^ Nara ali punllayajpillata nishpaca “cazi las 3 de la mañanamanda cazi 6 de la mañanacaman horastami” shina nijun.
^ O “llachapa”.
