Montreal nishca llactamanda shuj pobrella pushtugupimi viñarcani. Ñucaca ocho huahuacunapa catimi cani. Ñuca seis quillacunata charijpimi ñuca papitoca huañupashca. Chaimandami ñuca mamitaca pailla ñucanchitaca cuidana tucurca.

Ñucaca uchillagumandapachami drogacunata chupajta, apostashpa pugllajta, shuacuna ashtaca nalicunata rurajta ricushpa viñashcani. Ñuca ña 10 huatacunata charishpaca prostitutacunapa, ñuca llactapi causaj interescunata ushashcata cobraj nali gentecunapa mandadocunata rurashpami causan carcani. Gentecunata yangata llullashpa, umachishpa jatunataca ninandami gushtan carcani. Chai ruraicunaca ñucapaca shuj drogashnami carca.

Ña 14 huatacunata charishpaca umachishpa jatunataca alipachami yacharcani. Por ejemplo, yangata quilpashca ashalla orocunata charij relojocunata, pulseracunata, anillocunata randishpami “14 quilates orotami charin” nishpami gentecunamanga mercadocunapi, callecunapi umachishpa jatun carcani. Shina rurashpaca culquitaca facilmi ganan carcani. Shuj punllacarin 10 mil dolartami shuj punllapilla ganarcani.

Ñuca ña 15 huatacunata charijpica, rehabilitacionda rurana huasimandapash llujchishpa cachajpimi, maipi quidanatapash na charishpa callecunapi, parquecunapi, ñucapa nali amigocunapa huasicunapipashmi puñun carcani.

Policiacunapash tauca viajetami japihuarca. Pero shuashcacunataimanga na jatun carcanichu. Chaimandami carcelmanga nunca na apahuarcachu. Carcelman na rishpapash llullashpa umachispa jatushcamanda, permiso illa jatujushcamanda, shuj shuj nali cosascunamandaca ashtaca multacunatami pagana tucurcani. Shinapash nimatapash, ni pitapash na manllanllu carcani. Interescunata ushashcata cobraj nali gentecuna mañachishca culquita cobrashpami trabajan carcani. Chai trabajo peligroso caimandami armacunatapash apashpa puri callarircani. Shinallata ashtaca nali nali cosascunata ruraj gentecunapapashmi trabajashcani.

Ñucaca 17 añota charishpami primera vez Bibliamandaca uyarcani. Ñucahuan pacta igual causajuj huarmimi Bibliamandaca testigo de Jehovacunahuan yachajui callarirca. Bibliapa yachachishcacunata na gushtaimandami paita jichushpa, shujhuan rircani.

Shina rijpipash cai cati huarmipashmi Bibliamanda testigo de Jehovacunahuan yachajui callarirca. Paipa cambiocunata ricushpaca ninandami alicachircani. Paica ashtahuan juyaihuan, pacienciahuanmi tratai callarirca. Shuj punllaca testigo de Jehovacunaca paicunapa tandanajuimanmi invitahuarca. Chai tandanajuipica ñuca rijsishca gentecunashnaca na carcachu. Paicunaca juyaihuanmi chasquihuarca. Chai tandanajuipica alimi sintirircani, nunca na shina sintirishcarcanichu. Ñuca huahua cajpica ñuca familiaca na juyahuanllu carca. Testigo de Jehovacuna ali ali tratajtaca ninandami gushtarcani. Chaimi Bibliamanda yachajuchun animajpica, Bibliata yachajui callarircani.

Bibliata yachajunami ñucataca salvahuarca. Pugllashpami 50 mil dolarta dibi tucurcani. Chaita pagangapami culquita minishtijurcani. Chaimi ishcai cumbacunandi shuangapaj rinata pensarinajurcanchi. Shinapash antsicarinmi paicunahuan shuangapaca na rircani. Chai ishcai cumbacunamandaca shuhuangapaj rimandami shujtaca huañuchirca, chaishujtaca carcelpimi churarca.

Bibliata yachajushpami ñuca causaipi cambianapacha cashcata cuenta japircani. Chaitaca 1 Corintios 6:​10​ta liishpami cuenta japircani. Chaipica, “shuhuacuna, charishpapash ashtahuan charijyangapaj munajcuna, machajcuna, ima llaquipash japishpami ali canman nijcuna, ñavi ñavi shuhuajcunapash, Taita Dios mandajuj llactapica napacha imatapash japigringachu” ninmi. Chai textota liishpaca huacaitami huacarcani. Ñuca causaipi tucuipi cambiana cashcatami cuenta japircani (Romanos 12:2). Ñucaca millai millaimi carcani. Ñuca causaica yanga, nalipachami carca.

Shinapash Jehová Diosca ali, perdonaj Dios cajtami yachajurcani (Isaías 1:18). Jehová Dios perdonaj Dios cashcamandami, nali ruraicunata saquishpa, cambiaita ushangapaj ayudahuai nishpa Jehová Diostaca tucui shungu mañarcani. Jehovapa ayudahuanga nali cosascunataca asha asha saquita usharcanimi. Primeroca, ñucahuan pacta causajuj huarmiguhuanmi cazararcani.

24 añota charishpaca ñami quimsa huahuayuj carcani. Paicunata mantiningapami shuj trabajoguta charingapaj munarcani. Pero ni escuelamanllapash na yaicushca caimandami trabajanataca casi nimata na yacharcani. Chaimandami Jehová Diosta ayudahuai nishpa trabajota mascangapaj llujshircani. Trabajomanda entrevistacunapica “honrado trabajangapami munani” ninmi carcani. Huaquinbica, “Bibliatami estudiajuni” nishpami villan carcani. Pero ni maijanbash na trabajota cungapaj munahuarcachu. Ultimopica ñuca causaimanda parlashca jipaca, shuj trabajachijca, “no sé imashpacharipash, pero canman trabajota cuna cashcatami sintini” nihuarcami. Chaita uyashpaca Jehová Dios ñucapa mañashcacunata uyashcatami cuenta urmarcani. Asha tiempo jipaca ñuca huarmigundimi bautizarishpa testigo de Jehová tucurcanchi.

Jesuspa ejemplota catimanda, Bibliapa consejocunata cazuimandami causa capani. Cunanga shuj juyailla familiagutami charipani. Ñuca concienciapipash alimi sintiripani, Jehová Dios ñucata perdonashcataca seguromi capani.

14 añotami ña Jehová Diostaca tiempo completopi sirvijupani. Shujcunaman Bibliamanda yachachingapami ashtahuan ñuca tiempotaca utilizani. Ñuca huarmigupashmi chairalla tiempo completopi ñucahuan Jehová Diosta pacta sirvi callarirca. Cai último 30 huatacunapica, ñuca trabajomanda compañerocunamandaca 22puratami testigo de Jehová tucuchun ayudai ushapashcani. Cunanbica gentegucunata umachishpa, shuashpaca ñana puripanichu. Ashtahuangarin Bibliamanda yachachishpa, jipa punllacunamanga ashtahuan ali causaigumi tiagrin nishpami gentecunamanga villachipani (Salmo 37:​10, 11).