Ñucaca Hungría llactapimi nacirircani. Hungría llactapi segunda guerra mundialpi cashpa ninanda llaqui apashcataca cunangamanmi yarini.

Ñuca abuelocunahuanmi viñarcani. Paicunata yarishpaca cushillami sintirini. Ashtahuanbachaca ñuca abuelita Elisabethtami yarini. Paimi Padrenuestro oracionda rezanata quimsa huataguta charishcamandallata yachachihuarca. Shinapash chai oración imata ningapaj munashcataca ña casi 30 huatacunata charishpami chaira intindi callarircani.

Shuj huasita randingapaj munashpami ñuca taitacunaca ninanda trabajan carca. Chaimandami ñuca abuelocuna ñucataca cuidahuan carca. Shinapash cada ishcai semanami familia entero micungapaj tandanajun carianchi. Cushillami yalin carcanchi.

1958 huatapimi ñuca taitacunaca shuj huasiguta randi usharca. Ñuca taitacunahuanga cushillami causanajurcanchi. Shinapash seis quillacuna jipallami ñuca taitaca cáncer ungüihuan huañurca.

Ninanda llaquiyashpami Taita Diostaca ¿imamandata ñuca papitotaca na salvarcangui? nishpa nin carcani. Huañushca jipa ñuca taita ima tucushcatami yachangapaj munarcani. Shuj huahuacuna paicunapa taitacunahuan cajta ricushpaca ñucaca llaquillami sintirin carcani.

Ashtaca huatacunatami casi tucui punlla pantionmanga rin carcani. Chaipi cashpaca ñuca papitota pambashca pushtupica cungurishpami, Taita Diostaca: “ñuca papitoca maipita capanyari” nishpa mañan carcani. Shinallata imashpa causashcata intindingapapashmi mañan carcani.

13 huatacunata charishpami, alemán shimita yachajui callarircani. Alemán shimipi escribishca librocunata estudiashpami ñucapa tapuicunapa respuestacunataca tarisha yarcani. Huata 1967​pica, Alemania Oriental nishca llactapimi estudiangapaj rircani. Chaipi cashpaca, Alemania llactamanda filosofocuna escribishca librocunataca casi tucui tucuitami liishpa tucuchircani. Ashtahuanbachaca ¿imamandata gentecunaca causanchi? nishca partecunatami ashtahuan liin carcani. Chai librocunata liishpapash, ñuca yachangapaj munashca tapuicunapa respuestataca na tarishpallatami quidarcani. Chaimandami Taita Diostaca ayudahuai nishpa mañashpa catircani.

Huata 1970​pi Hungría llactaman tigrashpami ñuca huarmiguta rijsircani. Paica Rose shutimi. Chai tiempopica Hungría llactapica ninanda llaquichijuj gobiernomi tiarca. Chaimandami cazarashca asha tiempo jipallaca Austria llactaman rircanchi. Jipaca ñuca tío Australia llactapi causajpimi chaiman ringapaj munarcanchi.

Shinapash asha tiempo jipallami Austria llactapica trabajota tarircani. Chai trabajomanda shuj compañeromi, Bibliapimi can charishca tapuicunataca contestan nihuarcami. Chaimi ishcai librocunata cuhuarca. Chai librocunataca tucuillatami liircani. Shinapash ashtahuan yachajungapaj munashpami testigo de Jehovacunataca ashtahuan publicaciongunata cuhuachun mañarcani.

Justo ñucanchi cazarashcamanda ña shuj huatata pactajujpimi shuj joven testigo shamushpa, ñuca mañashca publicaciongunata cushpa Bibliamanda yachachingapaj ofricihuarca. Chaimi Bibliamandaca ishcai viajeta semanapica yachajui callarircani. Cada estudiashcami chuscu horascunata estudian carcanchi.

Testigo de Jehovacunahuan Bibliamanda yachajushpaca ninandami cushijurcani. Ñuca propio Bibliapi Taita Diospa shuti maijan cashcata yachaj chayashpaca manllarishcami quidarcani. Misamanga 27 huatacunatami purishcani, pero Taita Diospa shuti Jehová cajtaca nunca na uyashcarcanichu. Bibliapica tucuitami aliguta intindichijurca. Bibliapica huañushcacuna na sufrijujta, puñujui cuendalla cashcatami indindircani (Eclesiastés 9:​5, 10; Juan 11:​11-15). Shinallata shamuj punllacunapica huañuipash illa, cushilla causaigu tianatami yachajurcani (Apocalipsis 21:​3, 4). Huañushcacunata Taita Dios causachijpi, jipa punllacunapi ñuca taitata ricui ushanataca seguromi cani (Hechos 24:15).

Ñuca huarmigupashmi Bibliamanda yachajui callarirca. Ñucanchi estudianajushca librotaca ishcai quillapillami yachajuita tucuchircanchi. Testigo de Jehovacunapa tucui tandanajuicunamanmi ri callarircanchi. Paicuna randimanda juyarijta, ali alicuna cajta ricushpami ninanda alicachircanchi (Juan 13:​34, 35).

1976 huatapimi Australia llactaman ri usharcanchi. Chai llactaman chayashcandimi testigo de Jehovacunata mascarcanchi. Paicunaca ñucanchitaca juyaihuanmi ayudarca. 1978 huatapimi testigo de Jehovacuna tucurcanchi.

Ñuca causaipi yachangapaj munashca tapuicunapa respuestacunataca cunansi ñami yachapani. Shinallata Jehová Diostapashmi rijsishcani. Paimi ñuca propio taitashna can (Santiago 4:8). Ashtahuanbash ñuca propio taitataca paraíso alpagupimi Jehová Dios causachijpi cutin ricui ushasha (Juan 5:​28, 29).

1989 huatapica ñucanchi familiacunaman, rijsicunaman Bibliamanda yachachingapaj munaimandami Hungría llactaman cutin tigrarcanchi. Ashtaca gentecunamanmi Bibliamanda yachachina oportunidadta charishcanchi. Paicunamandaca 70 yali gentecunami testigo de Jehovacuna tucushca. Ñuca mamitapashmi testigo de Jehová tucurca.

17 huatacunatami ñuca causaipi charishca shuj shuj tapuicunata intindi ushangapaj Taita Diostaca ayudahuai nishpa mañan carcani. Ñuca mañaita Taita Dios contestashcamandaca ña 39 huatacunami yalishca. Cunangamanmi Diostaca mañashpa catini. Shinapash cunanga: “Ñuca causaipi charishca tapuicunata contestashcamandaca ninandami agradicini” nishpami Jehová Diostaca mañani.