Lección 13
Timoteoca shujcunata ayudarcami
Timoteoca gentecunata ayudashpami cushilla causarca. Shuj shuj llactacunaman rishpami ayudarca. ¿Timoteomanda yachajungapaj munanguimanllu?...
Mamapash abuelpashmi Timoteomanga Jehovamanda yachachirca
Timoteoca Listra llactapimi viñarca. Paipa mama Eunice, paipa abuela Loidami Timoteo huahuagu cajpillata Jehová Diosmanda yachachi callarirca. Chaimandami Timoteoca Jehovamanda yachachishpa gentecunata ayudana munaihuan viñarca.
Timoteo ña joven cajpica Pabloca nircami: “Shuj ladocunapi villachingapami rigrijuni. ¿Ñucahuan ringapaj munanguichu?” nishpa. Timoteoca gentecunata ayudangapaj munaimandami ninanda cushijushpa, ari ringapaj munanimi nirca.
Timoteoca Pablohuanmi Grecia llactapi Tesalónica puebloman rirca. Chaimanga
caruta chaquilla rishpa, barcota japishpami chayagrirca. Ña chayashpaca ashtaca gentecunamanmi Jehovamanda yachachirca. Shinapash huaquingunaca ninanda culirashpa paicunata llaquichingapaj munanajujpimi, Pablopash Timoteopash shuj ladocunapi villachingapaj rina tucurca.Huaquin quillacuna jipaca, Tesalonicapi huauquicuna imashina catinajujta yachangapami Pabloca Timoteota Tesalonicaman tigrachun mañarca. Tesalonicapi gentecunaca huauquicunatami nali tratanajurca. ¿Timoteo chaita yachashpaca chaiman rinata manllarcacha? Huauquicunamanda preocuparishpami chaiman rinataca na manllarca. Timoteo tigramushpaca Tesalonicapi huauquicuna Jehovata sirvishpa catinajujtami Pabloman villarca.
Timoteoca tauca huatacunatami Pablohuan Jehovata sirvirca. Chaimandami Pabloca nirca: “Timoteoshnaca pipash na tianllu. Paica Jehovatapash gentecunatapash ninandami juyan. Chaimandami huauquicunata ayudachun cachajuni” nishpa.
Canbashmi gentecunata juyangui. Shinaca ¿Jehovamanda yachachishpa ayudangapaj munanguimanllu?... Shujcunata ayudashpaca Timoteoshnami ninanda cushijushpa causangui.