Ima ashtahuan importante cashcata ricupai. Bibliapica ashtahuan importante cosascunatarami rurana canguichi nishpami consejan (Filipenses 1:10). Ima cosascunatalla ruragrijushcata shuj hojagupi anotapai. Chai jipaca maijan cosascunata rurana ashtahuan importante cashcata ricupai. Huaquin cosascuna importante cashpash chai ratopacha ruranaca na minishtiringachu. Cutin huaquin cosascunataca chai rato rurangapaj munashpapash na importante cashcatami yarina capangui. *

Imata ruranataca ña pensarishcallami cana capangui. Eclesiastés 10:10​pica “Jirru filo tucurijpi na cutin afilashca cashpaca imatapash cuchunaca shinllimi. Shinapash afilashpaca facilllami imatapash rurarin. Shinallatami ali yuyashpa imatapash rurashcacunaca ali llujshin” ninmi (La palabra de Dios para todos nishca Biblia). Imashinami shuj jachataca nara utilizashpallata afilanchi. Shinallatami imata ruragrijushpapash tiempohuan arreglocunata rurana capanchi. Shinallami ñucanchi tiempotaca ali aprovechashun. Quiquin ruragrijushca cosascunamanda imapash na importante cashcata cuenda japishpaca chaita ruranaca ñana minishtiringachu. Shinallata imatapash ruranata ña tucuchishca cashpaca tiempota aliguta aprovechangapajmi shuj importante cosascunatapash ruraita ushapangui. Imata ruranata ña pensashcalla cashpaca textopi nishcashnami ñucanchi ruraicunaca ali llujshinga.

Importante cosascunatalla rurapai. Na importante cosascunata rurashpaca quiquimba tiempotallami perdingui. Ashtaca cosascunata rurangapaj munashpa, shuj shuj arreglota rurashpaca talvez na pactaimandami quiquinllata estresarishpa ñana cushilla sintiringui.

Imata rurana cashpapash uchalla rurapai. Eclesiastés 11:4​pica ninmi: “Huairata chapaj runaca na tarpungachu. Fuyuta ricuriajlla causaj runapash na cosechangachu” nishpa. Shuj tarpuj runa tarpungapaj munashpapash tamiachunbacha shuyajushpaca tiempotalla perdishpami tarpuitapash na tarpushpa ñana cosechanga. Cai tarpuj runashna ñucanchi causaipi tucuimanda preocuparijushpaca ñucanchi tiempotalla perdishpami importante cosascunataca ñana rurashun. Talvez imatapash nara dicidishpallatami imacunalla pasana cashcata yachana cani nishpa pensai ushanchiman. Ciertomi can, imaguta nara dicidishpallata ali pensanaca minishtirishcami can. Proverbios 14:15​pipash chaitallatami ricuchin. Chaipica ninmi “Ali, yachajushca runaca, imata rurangapapash aliguta yarinrami” nishpa. Pero imatapash rurangapa aliguta yuyajushpapash, siemprellatami preocuparinchi (Eclesiastés 11:6).

Tucui ali llujshichunga na shuyanachu capanchi. Santiago 3:17​pica “Jahua pachamanda [o Diosmanda] shamujuj ali yachaica, [...] imatapash aliguta ruranatami yarichimun” ninmi. Imatapash rurajushpa ali llujshichun munanaca alimi can. Pero tucui siempre ali llujshichun munashpaca imapash nali llujshijpica ñucanchillatami llaquilla, nali sintirishun. Por ejemplo, shuj idiomata yachajujushpaca imapipash pandari ushashcata yaipimi charina capanchi. Shinapash tucui ali llujshichun munaj gentecunaca, imatapash pandata ninata manllaimandami tal vez chai idiomataca na ucha yachajui ushanga. Imapash metata churarishpaca imata rurai ushashcapi o na rurai ushashcacunapimi pensarina capanchi. Proverbios 11:2​pica “Ali yachaica, na jariyashcacunahuanmi” ninmi. Shinaca na tucuita rurai ushashcata yachaj gentecunaca pandarishpapash na culiranllu. Huaquinbicarin chai pandarishcacunatallata yarishpami paicunallata asirin.

Trabajangapapash, samangapapashmi tiempotaca llujchina capanchi. Bibliapica ninmi: “Ishcai maqui jundata ninanda trabajashpa yuyaita shaijunchingapaj randica shuj maqui jundatalla trabajashpa ashaguta samanami ashtahuan ali” ninmi (Eclesiastés 4:6). Trabajanatalla ninanda gushtaj gentecunaca trabajashpalla yalimandami shaijushca sintirin, samangapapash tiempotaca ñana charin. Cutin trabajanata na gushtaj gentecunaca samashpalla yalingapami munan. Chaimanda Bibliapica tiempota aliguta utilizashpa trabajangapapash, samangapapash tiempota llujchina cashcata nin. Ñucanchi rurashcahuan “cushijunaca Taita Dios carashcami” ninmi (Eclesiastés 5:19).

Ali puñupangui. Salmo librota escribij runaguca “casilla, ima manllaipash illajmi siririsha, chashnallatami puñusha” nircami (Salmos 4:8). Casi tucui gentecunami ocho horascunata puñunata minishtipanchi. Shinami ali samashpa cushilla, ali sintiripashun. Aliguta puñuna o samanaca huaquin cosascunapimi ayudan. Por ejemplo, aliguta puñushpa o samashpaca imata cashpapash alimi yachajuita ushapashun. Shinapash na aliguta puñushpaca imapash accidentetami charita ushanchi. Shinallata culirapash sintirishun.

Pactachi ushanalla metacunata churaripai. Bibliapica ninmi: “Ñapash chinganallacunata munanapa randica charishcahuanlla cushijunami ashtahuan ali” (Eclesiastés 6:9 Nueva Biblia de los hispanos). Cai textomandaca ¿imatata yachajupanchi? Ali yachajushca runaca imatapash na fácil pactachinalla cajpica na yangata imatapash ruranllu. Shinallata imatapash charingapaj munaimandallaca na yangamanda divi tucunllu. Chaipa randica pai imata charita ushashcaguhuanlla cushijungapajmi esforzarin.

¿Alitachu rurangapaj esforzarijuni? nishpa tapuripashunchi. Cashna tapurinami ima ashtahuan importante cashcata yachachun ayudan. Alita rurangapaj esforzarishpaca ñucanchillatami ali causashun. Shinallata ñucanchi causaipi ima ashtahuan importante cashcata yachashpami ñucanchi tiempotaca aliguta utilizai ushapashun. Ashtaca gentecunaca alita rurangapaj munaimandami Bibliapi consejocunata mascashca. Chai gentecunaca Bibliapi ali consejocunata tari ushashcatami yachajushca (Proverbios 2:6,7).

Ñucanchi causaipica juyaitami ricuchina capanchi. Bibliapi Colosenses 3:14​pica juyaita ricuchishpallami “aliguta causanguichi” nishpami yachachin. Ashtahuanbachaca familiapi na juyarishpa causashpaca cushilla, tranquilo sintiritaca na ushashunllu. Huaquingunaca juyaita ricuchinapa randica culquita o shuj profesionda charingapajmi esforzarishca. Chaimandami cushilla causaitaca na ushan. Chaimi Bibliapica ñucanchi causaipi juyaita ricuchina ashtahuan importante cashcata tauca viajecunata yachachin (1 Corintios 13:1-3; 1 Juan 4:8).

Taita Diosmanda yachajungapaj tiempota llujchipai. Geoff shuti jarica shuj juyailla huarmiguta, ishcai huahuacunata, ali amigocunata, shuj ali trabajotapashmi charirca. Paica ambulancia carrocunata manejashpami imapash accidente tiajpica llaqui apashca gentecunata ayudan carca. Chaimanda paipa causaica casi siempre peligropi carca. Chaimandami paica ñucanchi causaipica ¿nachu imatapash ashtahuan rurana canchi? nishpa tapurin carca. Shuj punllaca Testigo de Jehovacunapa shuj publicaciondami paica liirca. Chai revistapimi paipa tapuimanda shuj ali respuestata tarirca.

Geoffca Bibliapi imata yachajushcatami paipa huarmiguman, paipa huahuacunaman parlarca. Chaimi paipa familiaca Bibliamanda ashtahuan yachangapaj munashpa Bibliamanda yachajui callarirca. Bibliata yachajunami cushilla causachun ayudarca. Shinallata paicunapa tiempota aliguta utilizanatapashmi yachajurca. Paicunaca llaquipash illaj, para siempre, cushilla, ali causai ushanatapashmi Bibliapica yachajurca (Apocalipsis 21:3,4).

Geoffpa causaimanda parlashpaca Jesús imata nishcatami yaripanchi. Jesusca nircami “Diosmanda yachajungapaj, paicunapa shungupi ninanda munajcunaca, ninandami cushijun” nishpa (Mateo 5:3). Shinaca ¿Taita Diosmanda ashtahuan yachajungapaj tiempota llujchipanguimanllu? Taita Diosmanda yachajunami cushilla, ali causachun ayudanga.