Responsable gentecunaca, paicunaman imaguta mingashcataca ima tiempopi nishcapimi pactachin. Chaimi paicunapica confiai usharinlla.

Huahuacunaca uchillagumandapachami responsable canata yachajui ushan. Parenting Without Borders (Padres sin fronteras) nishca libropica ninmi: “Shuj huata quimsa quillacunata charishpallatami, huahuacunaca paipa taitamamacuna imata nishcata cazui ushan. Shinallata huata sujta quillacunata charishpaca, taitamamacuna imata rurajtami paicunapash rurangapaj munan. Ashtaca llactacunapica huahuacuna ña 5 o 7 huatacunata charijpimi, taitamamacunaca huasipi ayudachun imagutapash mandanlla. Huahuacunaca uchillamandapachami, huasipi imapash ruranacunapi ali ayudai ushan” nishpa.

Huaquin llactacunapica huaquin jovengunaca paicunalla causangapaj munashpami taitamamacunapa huasimanda rin, shinapash problemacuna ricurijpica cutinmi taitamamacunapa huasiman tigran. Huaquinbica culquita yangata tucuchishcamanda, huasipi imatapash na rurai ushashcamanda, o imatapash na pactachi ushashcamandami taitacunapa huasimanga tigranlla.

Chaimandami viñashpa imatapash ali pactachi ushachunga, uchillamandallata huahuacunataca ali yachachina capangui. How to Raise an Adult (Cómo preparar a su hijo para la edad adulta) nishca libropica ninmi: “Quiquinba huahuacunata huahuayachishpa viñachishcamanda, 18 huatacunata charijpira paillata imatapash na rurai ushashcamanda llaqui apajuchunga na munapanguichu” nishpa.

Huasipi imagupipash ayudachun mañapai

BIBLIAPICA NINMI: “Tucui imata rurashcamandapash, japina tianmi” nishpa (Proverbios 14:23).

Huahuacunaca taitamamacunata imagupipash ayudangapami munan. Chaimandami huahuacunamanga imagutapash rurashpa huasipi ayudachunga yachachinalla capangui.

Huaquin taitamamacunaca huahuacuna escuelamanda tauca debercunata charin yashpami, imagutapash huasipi rurachunga na mandangapaj munan.

Shinapash ayudanata yachaj huahuacunaca ali estudiantecunapashmi caita ushan. Paicunaca mandashcata pactachinata yachajushcamandami maipi cashpapash, imagutapash pactachinlla. Parenting Without Borders nishca libropica ninmi: “Uchillacuna cajpillata ayudangapaj munanajujpita ayudachun na saquishpaca, shujcunata ayudanaca na importante cashcata yuyachunmi saquinajunchi [...]. Chaimi huahuacunaca paicuna imata munashcata cuchun munan” nishpa.

 Chai libropi nishca shinaca, huasipi imatapash rurashpa ayudanata yachachinaca huahuacuna ama paicunapilla yuyachun, shujcunapipash yuyachunmi ayudan. Familiapi importante cashcata yarichun, huasipi ali cangapaca tucuicunallata ayudana cashcata intindichunbashmi ayudan.

Nalita rurashcamanda ima pasajta intindichun ayudapai

BIBLIAPICA NINMI: “Rucuyashpapash alipacha yachajushca cangapaca, ali yuyaita cushcatapash uyangui, ali tucuchun rimashcatapash chasquingui” nishpa (Proverbios 19:20).

Quiquinba huahua imatapash nalita rurajpica, imata nali rurashcata villapanguilla. Chaimi imata ruranata yachajunga. Por ejemplo imagutapash faquishpaca uchallami disculparina can, o chaita arreglangapami imatapash rurana can.

Quiquinba huahuacuna imapi pandarishcata, imata na ali rurashcata intindishpaca cai cosascunatami yachajunga:

• Honrado canata.

• Shujcunatara na culpana cashcata.

• Pretextocunata na churana cashcata.

• Disculparina cashcata.