Ima ali cajta, ima nali cajta yachashpa pactachij gentecunaca maipi cashpapash, ima pasajpipash, paicunalla cashpapash na cambianllu. Caicunata yachanami paicunapa causaipica ashtacata ayudan.

Cunanbica escuelapi compañerocuna, musicacuna, telepi programacunaca huahuacunataca pandacunatami alitashna yachachin. Caicunami ima ali cajta, ima nali cajta yachajushcacunatapash pandachi ushan.

Huahuacunaca solteroyajuj tiempopimi ashtahuanbachaca ñapash pandarita ushan. Chaimandami Beyond the Big Talk (Después de “la charla padre e hijo”) nishca libropica nin: Jovengunaca “shuj compañerocunapa nishcacunata, telepi, radiopi nishcacunata ama rurangapaca ña yachajushcallami cana can. Shinallata ima ali cajta, ima nali cajta yachajushcacunata yaipi charishpami, amigocuna nalicachina cajpipash, ali decisiongunata agllana can” nishpa. Chaipaca uchillamadallatami ali yachajushcalla cana can.

Ima ali, ima nali cashcata ali intindichipangui

BIBLIAPICA NINMI: ‘Ali yuyaicunata charishpa aliguta yachajushca cashpami alita, nalitapash yachai ushajcuna tucunga’ nishpa (Hebreos 5:14).

• Ima ruraicuna ashtahuan ali o nali cashcata ricuchipai. Causaipi ima cosascunalla pasajta ricuchishpa yachachipai. Por ejemplo, pipash llullajpica “llullanaca na alichu can” ninami cangui. Cutin quiquinba huahua imatapash ciertota nijpica “alitami rurashcangui, siempremi cabalguta nishpa parlana cangui” ninami capangui. Cutin pipash mayorllagucunata na ayudajta ricushpaca “mayorgucunataca siempremi ayudana, na ayudashpaca nalitami rurajungui” ninami capangui. Quiquinba huahua mayorllagucunata ayudajpica “alipacha, paicunata llaquishcatami ricuchijungui” nipangui. Chaimi paicunaca ima ali cajtaca ruraicunahuan ricuchina cashcata yachajunga.

• Ima ali cajta o nali cajta yachajushcacunata imamanda cazuna cashcata intindichipangui. Paicunallata pensarichun tapuicunata rurashpa yachachipai. Por ejemplo: “¿Imamandata honrado canaca ali can?”, “¿Imamanda llullanaca amigocunamanda caruyachin?”, “¿Imamandata shuhuanaca nali can?” nishpa.

• Ima ali cajta, o nali cajta yachana imamanda ali cashcata ricuchipai. Huahuacunataca: “Can honrado cajpica, canbi confiangami” o “Shujcunata ali tratajpica, candapash ali tratangami” nishpa yachachipangui.

Ali ruraicunahuan quiquinba familia imashina cashcata ricuchipai

 BIBLIAPICA NINMI: “Imashna cashcataca, cangunallata yarinami canguichi” nishpa (2 Corintios 13:5).

• Tucui familiacunami ima ali cashcata pactachishpa causana can. Shinami:

  • “Ñucanchica na llullanchichu”.

  • “Huasipica pitapash na macanchichu, caparitapash na caparinchichu”.

  • “Ñucanchica pitapash nalicachishpaimanga na rimanchichu” nita ushapangui.

Chaimi quiquinba huahuacunaca ima ali cajta, ima nali cajta yachajushca yuyaicunaca na yangalla cashcata, ashtahuangarin chai yachajushcacunata pactachimanda paipa familia diferente cashcata ricui ushanga.

• Imapash pasashcacunata uyashpa o ricushpaca, huahuacunataca familiapi imata yachajui ushashcata parlapangui. Chaipaca paipa compañerocunapa nishcacunahuan o telepi imata yachachishcacunahuan chimbapurashpami intindichina capangui. Huahuacunataca tapupangui: “¿Canga imatashi ruranguiman carca?” o “¿Familiapica imatashi ruranchiman carca?” nishpa.

Huahuacunamanga ima ali cashcata ashtahuan ali yachachishpa catipai

BIBLIAPICA NINMI: “Ali yuyaihuan [o ali concienciahuanmi] causana canguichi” nishpa (1 Pedro 3:16).

• Ali portarijpica felicitapangui. Alita rurajpica imamanda chaita rurana ali cashcata intindichishpa felicitapai. Por ejemplo, imapipash honrado cajpica “alitami rurashcangui, canmandaca ninandami cushijuni” nipangui. Cutin imatapash nalita rurashcata villajpica, nara tacurishpallata villashcamanda felicitapangui.

• Nali portarijpica, na shina ruranachu carca nishpa yachachipangui. Huahuacunataca paicunapa nali rurashcacunamanda ama shujcunatara culpanajuchunmi yachachina capangui. Paicunaca imata nalita rurashcata, imamanda chaita ruranaca nali cashcatami intindina can. Huaquin taitamamacunaca paicunapa huahuacunata nali sintichingapaj na munaimandami, nalita rurashca cajpipash na imatapash nin. Shinapash nalita rurashcamanda parlanami ali concienciata charichun, ima ali cashcata, ima nali cashcata cuenta japichun ayudan.