Juan 16:23​pica ninmi: “Ñuca shutipi ñuca Taitata imaguta mañajpipash, paica carangallami”.

Jehová Diosca paitalla mañachun munashcatami Jesusca yachachirca. Taita Diosca paita mañanchi nishpa santocunata, angelcunata, huañushca familiacunata mañachunga na munanllu. Taita Diosta mañashpaca Jesuspa shutipimi mañana capanchi. Shinami Jesús ñucanchimanda huañushcata tucui shunguhuan crishcata ricuchinchi. Jesusca, “ñuca Taitapajman ñuca na pushajpica, pipash na paillata chayai ushanllu” nircami (Juan 14:6).

Salmo 62:8​pica ninmi: “Paipaj ñaupajpica, tucui shungu mañaichiyari”.

Jehová Diosta mañajushpaca shuj ninanda juyaj taitahuan parlajunshna parlapashunchi. Mañajushpaca yangata shuj libromanda liishpa o imatapash yachajushcamandalla de memoria nijunapa randica Taita Diostaca respetohuan shungumandami mañana capanchi.

1 Juan 5:14​pica ninmi: “Pai munashcashna ñucanchi imaguta mañajujtapash, Diosca uyanllami”.

Bibliapimi Taita Dios ñucanchicunamanda imata ruranata, shinallata ñucanchicuna imata Taita Diosmanda ruranata villajun. Taita Dios ñucanchi mañaicunata uyachun munashpaca ‘pai munashcashnami’ mañana capanchi. Chaipaca Taita Diosta ashtahuan rijsingapami Bibliata yachajuna capanchi. Shinami Taita Diosca ñucanchi mañaicunataca cushijushpa uyanga.

Ñucanchi minishtishca cosascunamanda mañapashunchi. Taita Diostaca micunagumanda, ropagumanda, maipi causanamanda o shuj minishtishca cosascunamandapashmi mañanalla capanchi. Shinallata ali decisiongunata agllaita ushangapaj, llaquicunata aguantangapaj fuerzata carahuai nishpapash mañanallami capanchi. Shinallata Taita Diostaca juchacunamanda perdonachun, paipi tucui shunguhuan crichun ayudahuai nishpa, ñucanchita cuidahuai nishpapash mañanallami capanchi (Lucas 11:3, 4, 13; Santiago 1:5, 17).

Shujcunamandapash mañapashunchi. Ali taitamamacunaca paicunapa huahuacuna juyarishpa causachunmi munan. Jehová Diosca ñucanchi taita caimandami ñucanchipura ayudarishpa causachun munan. Chaimandami ñucanchi cusagumanda, huarmigumanda, huahuacunamanda, familiacunamanda, amigocunamanda Taita Diostaca mañana capanchi. Discípulo Santiagoca, “caishujmanda chaishujmandami, Diosta mañana canguichi” nircami (Santiago 5:16).

Agradicinami capanchi. Bibliapica Taita Dios gentecunamanda ali cosascunata rurashcatami ricuchin. Chaimandami “tamiachishpa granocunatapash fucuchishpa, ñucanchiman ima aligutapash carashpa cushichijun” (Hechos 14:17). Taita Dios imacunatalla ñucanchimanda rurashcata pensarishpaca paitaca ninandami agradicishun. Shinapash Taita Diosta agradicishcata ricuchingapaca paipa mandashcacunatami cazuna capanchi (Colosenses 3:15).

Huaquinbica ñucanchi tucui shunguhuan mañashcata Taita Dios na uchalla contestajpimi llaquilla sintirinchi. Shinapash ¿na ucha contestashcamandallachu Taita Diosca ñucanchimanda na preocuparin nita ushapanchi? Na, na shinachu can. Chaipaca Taita Diosta imamanda mañashpa catina cashcata ricupashunchi.

Página 3​pi parlashca Steve runagumanda ricupashunchi. Paica ninmi: “Taita Diosta na mañashca cashpaca imacha tucuiman carcanipash”. Steve runagutaca ¿imata ayudarca? Paica Bibliata yachajushpami Taita Diosta cutin cutin mañana cashcata yachajurca. Paica ninmi: “Ñucapa amigocuna ñucata juyaihuan ayudashcamandami Taita Diostaca ninanda agradicini. Cunansi cushillami causani”.

Jennyca Taita Dios ñuca mañashcacunataca maitashi uyahuanga yashpami pensan carca. Shinapash paihuanga ¿imata pasarca? Paica ninmi: “Llaqui llaqui sintirijushpaca imamanda shina sintirijushcata intindingapaj ayudahuai nishpami Taita Diostaca mañarcani”. Taita Diosta mañanaca ¿imashinata Jennytaca ayudarca? Paica ninmi: “Taita Diosta mañanami Taita Dios ñucamanda imata pensajta intindichun ayudahuarca. Imapapash na valinshna sintirijujpipash Taita Dios ñucata juyajtami intindircani. Chaimi aguantashpa catichun ayudahuarca. Jehová Diosta mañanami pai ciertopacha tiajta crichun, shuj alipacha amigo cajta, shuj juyaj taita cajta cuenta japichun ayudahuashca. Taita Diospa mandashcacunata cazungapaj esforzarijpica paica nunca na saquihuangachu”.

Isabel huarmiguta ima pasashcata ricupashunchi. Isabel huarmigu vijsayu cajpica doctorcunaca, canba huahuaguca discapacitadomi naciringa nircami. Chaimi Isabelca ninanda llaquirirca. Huaquingunacarin abortanami cangui nishcarcami. Isabelca ninmi: “Chai ratoca ninanda llaquiyashpa, huañungashnami yarihuarca”. Ama shina sintirichunga ¿imata ayudarca? Paica ninmi “Taita Diostaca cutin cutinmi ayudahuai nishpa mañarcani”. Isabelpa Gerard huahuaguca discapacitadomi nacirirca. ¿Isabel huarmiguca Taita Dios paipa mañaicunata na uyashcatachu yuyan? Na. Paica ninmi: “Ñuca churiguca 14 huatacunatami charin. Paica shuj jatun bendicionmi capashca. Ñuca churigu discapacitadogu cashpapash cushilla causajujta ricushpaca Taita Dios ñuca mañaicunata uyashcatami cuenta japini”.

Cai shimicunaca Salmo 10:17​pi nishcatami yarichin. Chaipica, “Mandaj Dioslla, na jariyashpa causajcuna imatalla mañajtaca uyaparcanguimi. Canmi paicunapaj shunguta alichishpa, paicuna mañajtapash aligutapacha uyapangui” nijunmi. Shinaca Taita Diosta mañanataca na saquinachu capanchi.

Bibliapica Jesús Taita Diosta imashna mañashcatami ricuita ushapanchi. Jesús paipa discipulocunaman yachachishca oracionmi ashtahuan rijsishca can. Chaimandaca ¿imatata yachajupanchi?