1, 2. ¿Imamandata ñucanchicunaca jovenba situacionbishna capanchi?

 CAIPI pensaripashunchi, shuj punllaca shuj jovenba taitamamaca accidentepimi huañun. Y chai taitamamacunaca jovenman culquita herenciata saquinapa randica deudacunatarami saquin. Paicunaca culquita charishpapash yangata gashtashpami tucuchishca carca. Chaimandami taitamamapa dibitaca cai jovenra pagana tucun. Shinapash chai deuda ashtaca ashtaca cashcamandami jovenga chai dibitaca nunca na pagaita ushana ricurin.

² Ñucanchicunahuanbash shinallatami pasan. Ñucanchipa primer taita Adán y Evaca jucha illa, perfectocunami carca. Y paicunaca shuj juyailla jardinbimi causanajurca (Gén. 1:27; 2:​7-9). Paicunaca para siempre ali cushilla causaita ushanmanmi carca. Shinapash paicunaca juchapi urmashcamandami para siempre aliguta causana oportunidadtaca chingachirca. Shinapash chashna rurashpaca paicunapa huahuacunamanga ¿ima herenciatata saquirca? Bibliapica ninmi: “Shujlla runamandami, pecadoca cai mundopi tiai callarirca. Pecado tiashcamandami, huañuipash tiai callarirca. Shinami huañuica, tucui gentecunaman yalirca. Porque tucui gentecunami pecadota rurashcarca” (Rom. 5:12). Ñucanchipa taita Adanga ñucanchimanga pecadotami herenciatashna saquirca y cai pecadoca ñucanchitaca huañuimanmi apajun. Y chai pecadoca ñucanchipaca shuj dibi o deuda cuendami can. Cai deudataca pipash na pagaita ushapanchichu (Sal. 49:8).

 3. Bibliapica ¿imamandata pecadotaca dibihuan chimbapuran?

³ Jesusca ñucanchi pecadocunataca ‘dibicunahuanmi’ chimbapurarca (Mat. 6:12; Luc. 11:4). Porque pecadota ruranaca Jehová Diosman shuj dibita dibijuj cuendami can. Y ñucanchipa dibicunata o pecadota anchuchingapaj Jehová Dios imatapash na rurashca cajpica huañuihuanllami pagaita ushana carcanchi. Y causarina esperanzataca na charinchimanllu carca (Rom. 6:​7, 23).

 4. a) Pipash na ayudajpica ñucanchipa causaihuanga ¿imata pasana carca? (Salmo 49:​7-9). b) Bibliapica pecado nishpaca ¿imacunamandallata parlajun? (“ Pecado” nishca recuadrota ricupangui).

 ⁴ Adán y Eva perdishca causaitaca ñucanchillaca nuncapash na recuperaita ushanchimanllu carca (Salmo 49:​7-9​ta liipangui). Pipash na ayudajpica para siempre causana esperanzataca na charinchimanllu carca. Animalgucunashnami huañushpapash sin esperanza huañunchiman carca (Ecl. 3:19; 2 Ped. 2:12).

 5. Jehová Diosca ñucanchipa juchamanda salvangapaca ¿imatata rurashca? (dibujota ricupangui).

⁵ Párrafo unopi parlashca jovenda cutin yaripashunchi. Shuj charij charij persona, dibita pagangapaj ofrecirijpica chai jovenga ¿imatashi ruranman? Seguromi chai jovenga cushijushpa, agradicishpa cai ayudataca chasquinman. Shina cuendallatami Jehová Diospash, Adán y Evapa pecadomanda ñucanchita salvangapaca Jesuspa causaitaca shuj regalotashna carashca. Shinami shuj dibita pagashpa ayudanshna Jehová Diosca rurarca. Y Jesusca, Jehová Dios cushca regalo imapa ayudajtami intindichirca. Paica nircami: “Taita Diosca cai mundopi gentecunata ninanda juyashpami, paipa único Churiguta cachamurca. Paipa Churipi crishcata ricuchijcunaca ama shujllapash tucuchi tucuchun, sino para siempre causachunmi paipa Churitaca cachamurca” (Juan 3:16). Jehová Dios paipa Churiguta ñucanchiman shuj regalogutashna carashcamandami ñucanchicunaca Jehová Dioshuan ali amigopash tucuita ushapanchi.

 6. Cai temapica ¿imatata ricupashun?

⁶ Jehová Dios carashca regalomandaca ¿imashinata beneficiarishpa y ñucanchi pecadomandapash perdonda chasquita ushapanchi? Chaita yachangapaca cai temapimi Jehová Diosca gentecunahuan ali tucungapaj imata rurashcata yachajupashun. Shinallata pecadota limpiangapaj imata rurashcatami ricupashun. Ashtahuanbash gentecunata salvangapaj shuj preciota Jehová Dios pagashcatami yachajupashun. Y pecadomanda, huañuimanda libre saquishpa justocunata ricujtami yachajupashun. Cai yuyaicunami Jehová Dios ñucanchita perdonangapaj imatalla rurashcata yachachun ayudanga. Shinami Jehová Dioshuan ashtahuan agradecido sintiripashun.

JEHOVÁ DIOSCA GENTECUNAHUAN ALI TUCUNGAPAMI MUNAN

 7. a) Adán y Evaca ¿imatata chingachirca? b) Adán y Evapa miraicuna cashcamandaca ¿imatata minishtinajurcanchi? (Romanos 5:​10, 11).

⁷ Adán y Evaca para siempre causaigutallaca na chingachircachu. Ashtahuanbash Jehová Dioshuan ali amigo canatami chingachirca. Paicunaca juchata nara rurashpaca Jehová Diospa familiamanmi pertenecirca (Luc. 3:38). Shinapash Jehová Diosta na cazushpaca Jehovapa familiamandami llujchi tucurca. Y huahuacunata  nara charijpillatami shina pasarca (Gén. 3:​23, 24; 4:1). Cashna razonmandami paipa miraicunaca Jehová Dioshuan cutin ali tucuna o ali amigo canata minishtirca (Romanos 5:​10, 11​ta liipangui). Bibliamanda parlaj shuj libropica Romanos 5:​10, 11​pi ali tucuna shimica griego shimipica “shuj contra personahuan ali tucuna cashcatami ricuchin”. Shinapash ñucanchihuan ali amigo tucungapaca Jehová Diosrami primeroca huaquin cosascunata rurarca. ¿Ima cosascunatata rurarca?

PECADOTA LIMPIANGAPAJ RURAICUNA

 8. Jehová Diosca paihuan ali amigo tucuchunga ¿imatata rurarca?

⁸ Jehová Diosca gentecuna juchayu cajpipash paihuan ali amigo tucuchunmi gentecunataca pecadomanda limpio quidachun ayudarca. Jehová Diosca paihuan ali amigo tucuchunga shuj valishca cosasta recuperangapaj chai cosaspa valorta paganshnami pagana tucurca. Escrituras Griegas Cristianaspica ali tucuna shimitami utilizan (Rom. 3:25). Y ali tucuna nishpaca gentecunahuan ali cangapaj Jehová rurashca cosascuna y paihuan cutin ali amigo cai ushashcatami ricuchin.

 9. Israelitacunaca Jehová Dios paicunapa juchacunata perdonachunga ¿imatata rurana carca?

⁹ Israelitacunapa tiempocunapica Jehová Diosca israelitacunapa juchacunata perdonangapaj y paihuan ali amigo cachunga huaquin cosascunata rurachunmi mañarca. Cada huatami Pecadocunamanda Limpiarina Punllapica sumo sacerdoteca tucuilla israelitacunapa pecadocunata Jehová Dios perdonachunga animalgucunata huañuchishpa sacrificiocunata rurana carca. Cai animalcunapa sacrificiocunaca israelitacunapa pecadocunataca na por completo perdonaita usharcachu. Shinapash Jehová Diosca israelitacuna tucui shunguhuan arripintirijpi y Jehová Dios mañashcashna sacrificiocunata rurajpica paicunapa juchacunata perdonangapaca dispuestomi carca (Heb. 10:​1-4). Ashtahuanbash Pecadocunamanda Limpiarina Punllapi rurashca sacrificiocuna y shuj sacrificiocunapash paicuna juchayucuna cashcatami yarichin carca. Y shinami paicunapa juchata por completo perdonachun shuj mejor solución minishtirishca cashcata cuenta japichun ayudarca.

10. Pecadocunata para siempre perdonangapaca ¿imatata Jehová Diosca ruragrijurca?

¹⁰ Jehová Diosca pecadocunata para siempre perdonangapaca ¿imatata ruragrijurca? Paica paipa juyashca Churigutami cachamugrijurca. Jehová Diosca, Jesús ‘ashtaca gentecunapa pecadocunata apangapaj shuj viajella paillata shuj sacrificioshna curichunmi’ cachamurca (Heb. 9:28). Jesusca ‘shuj preciota paganshnami paipa causaita cushpa ashtaca gentecunata libre saquingapaj shamurca’ (Mat. 20:28). Pero ¿imashinata Jesusca pecadocunamandaca salvagrijurca?

GENTECUNATA SALVANGAPAJ SHUJ PRECIOTA PAGANA

11. a) Bibliapica ¿imamandata shuj preciota pagana minishtirishca cashcata ricuchin? b) Shuj persona gentecunata salvai ushangapaca ¿ima quimsa requisitocunatata pactachina carca?

¹¹ Bibliapica gentecunata pecadocunamanda limpiangapaj y Jehová Dioshuan ali amigo tucungapaca shuj preciota pagana minishtirishcapacha cashcatami ricuchin. Adán y Evaca para siempre y perfecto causana oportunidadtami chingachirca. Shinaca paicuna chingachishcata recuperangapaca shuj preciota paganami minishtirishca ricurirca (1 Tim. 2:6). Y cai preciota pagai ushangapaca shuj personaca cai quimsa requisitocunatami charina carca. Primeroca perfectomi cana carca. Catipica cai personaca cai alpapi Adán y Evashnallata para siempre causana oportunidadtami charina carca. Ultimopica gentecunamanda huañungapaj dispuestomi cana carca. Shinallami Adán y Eva pirdichishca causaita recuperachun  y pecadomandapash limpiachun ayudaita ushana carca.

12. ¿Ima razongunamandata Jesusca gentecunataca salvaita usharca?

¹² Jesusca cai quimsa razongunamandami gentecunataca pecadomanda limpiaita o salvaita usharca: 1) paica perfecto, “ima pecadopash” illami carca, 2) Jesusca cai alpapi na huañushpa para siempre causaita ushanami carca, 3) gentecunamanda huañungapaj dispuestomi carca (1 Ped. 2:22; Heb. 10:​9, 10). Jesusca, Adán nara pecadota rurashpa perfecto cashcashnallatami perfecto carca (1 Cor. 15:45). Chaimandami Jesús paipa causaita cushpaca Adán pirdichishca causaita cutin recuperachun ayudaita usharca (Rom. 5:19). Shinami Jesusca “último Adán” tucurca. Shinaca Adanba pecadomanda shuj persona paipa causaita cushpa huañunaca ñana minishtirishca ricurircachu. Jesusca paipa causaita cushpami para siempre ayudarca (Heb. 7:27; 10:12).

13. Pecadota limpianahuan y gentecunata salvangapaj shuj preciota paganahuanga ¿imapita diferente can?

¹³ Shinaca pecadota limpianahuan y gentecunata salvangapaj shuj preciota paganahuanga ¿imapita diferente can? Pecadota limpiashpaca Jehová Diosca gentecuna juchayu cajpipash paihuan ali amigo tucui ushachunmi ayudan. Cutin gentecunata salvangapaj shuj preciota pagashpaca, gentecunapa pecadotami limpian. Shinaca Jehová Diosca Jesuspa causaita cushpami gentecunata pecadomanda salvangapaj shuj preciota paganshna rurarca (Efes. 1:7; Heb. 9:14).

PECADOMANDA, HUAÑUIMANDA LIBRE SAQUISHPAMI JUSTOCUNATA RICUN

14. ¿Imatata yachajugripanchi?

¹⁴ Pecadota limpianamandaca ¿ima beneficiocunata tian? Cai beneficiocunamanda parlangapaca Bibliapica shuj shuj shimicunatami utilizan. Aunque huaquin shimicuna parecido cashpapash cada unomi Jehová Dios ñucanchita perdonangapaj imata rurashcata ashtahuan yachajuchun ayudan. Chaicunata yachajunami Jehová Diospa perdonda ashtahuan valorashpa ricuchun ayudanga.

15, 16. a) Bibliapica pecadomanda, huañuimanda libre quidachunga ¿imata rurashcatata ricuchin? b) Huañuimanda, pecadomanda salvarita ushashcata yachajushpaca ¿imashinata sintiripanchi?

¹⁵ Bibliapica pecadomanda, huañuimanda libre cachun shuj preciota pagashpa gentecunata salvashcatami ricuchin. Chaimanda parlashpami apóstol Pedroca: “Quiquingunataca tucurinalla orohuan, culquihuanga na libre cachunga ayudarcachu. Sino, Cristopa ninan valishca yahuarhuanmi quiquingunataca libre cachun ayudarca. Chai yahuarca sano, ali maltun llamagupa yahuarshnami can” nircami (1 Ped. 1:​18, 19).

¹⁶ Jesús ñucanchita salvangapaj huañushpa shuj preciota pagashcamandami pecadomanda, huañuimandapash libre quidaita ushapashcanchi (Rom. 5:21). Jesús huañushpa ñucanchita libre saquishcamandaca Jehová Diosta y Jesustapash ninandami agradicipanchi (1 Cor. 15:22).

17, 18. a) Jehová Diospa ñaupapi sin culpa justo ricurinaca ¿imatata ricuchin? b) Jehová Diospa ñaupapi justo ricurinaca ¿imashinata benefician?

¹⁷ Taita Diospa ñaupapi sin culpa justo ricurinaca pai ñucanchi “pecadocunata” perdonashpa cungaitapacha cungan cashcatami ricuchin. Caita rurashpaca Jehová Dios ñucanchicunata perdonashpaca ¿paipa mandashcacunata na valichishcatachu ricuchin? Na, na shina canllu. Jehová ñucanchi pecadocunata perdonashpaca na ñucanchi miricishcamandachu sin culpa justocuna cashcata ricun. Shinallata imatapash rurashcacunamandaca na ñucanchi pecadocunataca perdonanllu. Ashtahuangarin Jehová Dios ñucanchi pecadocunata limpiangapaca Jesustami cai alpamanga cachamurca. Jesuspi feta ricuchijpimi ñucanchi pecadocunata perdonashpa justocuna cashcata ricun (Rom. 3:24; Gál. 2:16).

 ¹⁸ Jehová Diospa ñaupapi justo ricurishpaca ¿ima beneficiocunatata charinchi? Huaquin cristianocunaca Jesushuanmi jahua cielopi mandangapaj agllai tucushca. Paicunaca Jehová Diospa churicunashnallatami tucushca (Tito 3:7; 1 Juan 3:1). Paicunapa pecadocuna totalmente perdonashca cashcamandami nuncapash na pecadota rurashcacunashna ricurin. Chaimi paicunaca Taita Diospa Gobiernopi mandaita ushan (Rom. 8:​1, 2, 30). Cutin shuj cristianocunaca cai alpapi para siempre causana oportunidadtami charin. Paicunaca Jehová Dioshuan ali amigo tucushpami, pecadomandapash perdonai tucushca (Sant. 2:​21-23). Armagedonmanda salvarishca ashtaca ashtaca na cuentai ushanalla gentecunaca para siempremi causaita ushanga (Juan 11:26). Shinallata ‘alita rurajcuna’ y ‘nalita rurajcunapash’ causaringami (Hech. 24:15; Juan 5:​28, 29). Tiempohuanga cai alpapi tucui Taita Diosta sirvijcunami ‘Taita Diospa huahuacunashna tucushpa pecadomanda libre causanga’ (Rom. 8:21). Imashinami ricupashcanchi pecadota limpianaca, ñucanchicuna Jehová Dioshuan ali amigo tucuchunmi ayudan. Caita yachanaca shuj jatun bendicionmi can.

19. Jehová y Jesús ayudashcamandaca ¿ima beneficiocunatata charipanchi? (“ Jehová Diosca ñucanchita perdonangapaca ¿imatata rurashca?” nishca recuadrota ricupangui).

¹⁹ Ñucanchicunapash callaripi parlashca jovenba situacionbishnallatami capashcanchi. Chai jovenga paipa taitacunapa ashtaca ashtaca deudacunahuan quidashpami pagaita na ushagrijurca. Jehová Diosca ñucanchita ayudashcamandami cutin paihuan ali amigo tucuita ushapashcanchi. Shinallata Jesuspi feta churashpami pecadomanda y huañuimandapash libre quidaita ushapashcanchi. Ashtahuanbash Jehová ñucanchi pecadocunataca perdonashpami cungaitapacha cungaita ushan. Ashtahuanbachaca Jehová Dioshuanmi ali amigo tucuita ushapanchi.

20. Cati temapica ¿imatata yachajupashun?

²⁰ Jehová y Jesús ñucanchimanda imatalla rurashcata yachashpaca paicunataca ninandami agradicipanchi (2 Cor. 5:15). Paicuna imatapash na rurajpica shuj esperanzataca na charinchimanllu carca. Cati temapica Bibliamanda huaquin chimbapuraicunatami yachajupashun. Shinami Jehová Diospa perdón imashinapacha cashcata yachajupashun.