1, 2. a) Jehová Dioshuan ali cangapaca ¿imatata rurana capanchi? b) Jehovapa consejota cazujcunapa o na cazujcunapa ejemplocunata yachajunaca ¿imashinata ayudanga?

NALICUNA ali causanajujta ricushpami salmo librota escribijca shungupi ninanda nanarishpa nirca: ‘Ñucaca yangapachami mapa illaj shungu tucushcani. Ñuca maquitapash yangallatami’ na mapayachishcani nishpa (Sal. 73:​2, 3, 13, 21). Shinapash salmo librota escribijca ‘Taita Diospa huasiman yaicushpami’ cutin ali pensarirca, Diospa ñaupajpipash ali ricurirca (Sal. 73:​16-18). Ashtahuangarin Jehová Diospi tucui shunguhuan confiashpami nirca: ‘Ñucamanda rimashpaca, Taita Diospajman quimirinaca aligupachami. Mandaj Jatun Diostami shuyashpa causajuni’ nishpa (Sal. 73:28). Shinami, salmo librota escribijca intindirca Jehová Dioshuan ali llevaringapaca paita sirvijpuracunapi amigocunata mascana cashcata, Jehovata cazuna cashcatapash (Sal. 73:24).

² Ñucanchicunapash na llullaj, causaj Dioshuan ali cangapaca paipa consejocunata, cazushpa intindinami canchi. Shina rurajpica Diosca alicachishpami ñucanchitaca ricunga. Bibliapica ninmi, Jehová Diosca huaquin gentecunata, huaquin llactacunata llaquishpami ali ñanman tigrachun consejarca nishpa. Taita Diosca ‘tucurimui punllacunapi causanajujcunata yachachingapami Bibliataca escribichirca’ (Rom. 15:4; 1 Cor. 10:11). Cai temapica huaquin gentecunapa, huaquin llactacunapa ejemplocunatami ricushun. Shinami, Jehová Dios imata pensajta yachajushpa shuj alpa mangagutashna Jehová ñucanchita formachun saquishun.

3. Gentecunata Jehovalla mandana cashcata ricuchingapaca ¿imatata Isaías 64:8; Jeremías 18:​1-6 textocunaca nin? (Cai paginapi dibujota ricupangui.)

³ Jehová Diosca gentecunata, llactacunata mandangapami  autoridadta charin. Chaimandami Isaías 64:8​pica nin: “Mandaj Dioslla, canmi ñucanchi taita cangui. Ñucanchica, alpamanda rurashcacunallami canchi, canmi ñucanchita rurarcangui. Ñucanchica, tucuicunami cambaj maquihuan rurashca canchi” nishpa. Alpa mangata rurajcunaca paicuna munashca mangacunatami ruranlla. Pensaripashunchi ¿turu alpa o barroca mangata rurador runataca nita ushanllu imamandata cashna rurahuarcagui nishpa? Na. Shinallata, gentecunapash Taita Diostaca na ninachu canchi imatata rurajuhuangui nishpa (Jeremías 18:​1-6, liingui).

4. Jehová Diosca huaquin gentecunata, llactacunataca ¿ali cachun, cutin shujcunataca na ali cachunllu ruran?

⁴ Alpa mangata ruradorcunaca mangagucuna ali quedachunmi mangacunataca asha asha formashpa rin. Jehová Diospash alpa mangagucunatashnami israelitacunataca formarca. Alpa mangata ruradorca asha barrota japishpami pai munashca mangagucunata ruran. Shinapash, Jehová Diosca huaquin gentecuna, huaquin llactacuna ali cachun, cutin shujcunaca nali cachun nishpaca na ruranllu. Jehová Diosca ñucanchillata alita ruranata nalita ruranata agllachunmi munan. Shinaca, Jehová Dios ñucanchita formachun munashpaca, ñucanchillatami Jehová Dios formachun saquina canchi (Jeremías 18:​7-10, liingui).

5. Alpa mangagutashna na formachun saquijpica ¿imatata Jehová Diosca ruran?

⁵ Napacha cazungapaj munajpica ¿imatata Jehová Diosca ruran? ¿Fuerzachu gentecunataca ali mangagutashna ruran? Pensaripashunchi. Alpa mangata ruradorcunaca pai munashca mangata na shinai ushashpami shuj forma mangacunata ruran o chai barro alpataca shitashpa saquin. Shinapash Jehová Diosca alpa mangata ali rurador cuendami can (Deut. 32:4). Gentecunaca paicunapa culpamandallatami Jehová Dios formachunga na munan. Ashtahuangarin, cazungapaj munashcata o na cazungapaj munashcata ricushpami Jehová Diosca gentecunata forman. Gentecuna cazujpica ali mangagucunashnalla cachunmi Jehová Diosca forman. Shuj ejemplota ricupashun. Ungido huauquicunaca “llaquishpa” “alipaj” rurashca mangacunashnami can. Cutin Diosta na cazungapaj munajcunaca ‘ninanda fiñarishpa tucuchingapaj shicanyachishca alpa mangashnami’ can (Rom. 9:​19-23).

6, 7. Jehová Dios consejajpica ¿imatata Davidca rurarca? ¿Imatata Saulca rurarca?

⁶ Jehová Diosca consejashpa o ali ñanman tigrana cashtaca intindichishpami gentecunataca mangagucunatashna forman. Rey Saulpa, rey Davidpa ejemplocunata ricupashun. Bat-sebahuan faltapi urmashpami rey Davidca paillata ashtaca llaquicunata charirca, shujcunatapash llaquiman aparca. Rey David jatun nalita shinashcata intindichunmi Jehová Diosca profeta Natanda Davidpajman cacharca shinllita rimashpa intindichichun (2 Sam. 12:​1-12). Natanda uyashpaca ¿imatata rurarca? Davidca nalitapachami rurashcani nishpami tucui shunguhuan arripintirirca. Chaimandami Jehová Diospash llaquishpa perdonarca (2 Samuel 12:​13, liingui).

⁷ Cutin rey Saulca na intindingapaj munarcachu. Tucuilla amalequitacunata, huagracunata huañuchingui nijpipash paica Jehovata na cazushpami rey Agagta, huaquin ali huagracunatapash na huañuchirca. Paica tucuicunapa ñaupajpi ali ricuringapaj munashpami shina rurarca (1 Sam. 15:​1-3, 7-9, 12). Chaimandami Jehová Diosca profeta Samuelta rey Saulpanman cacharca, nalitami rurashcangui nishpa intidichichun. Shinapash Saulca na intindingapaj munarcachu.  Alpa mangagutashna Jehová Dios formachunga na munarcachu. Ashtahuangarin, nalita rurashcata pacangapaj munashpami, Jehová Diosman cungapajmi shina rurarcani nirca. Chaimandami Saúl rey cashpa catichunga na munarca. Ashtahuangarin, cutinga Diospa ñaupajpica nali ricurircachu (1 Samuel 15:​13-15, 20-23, liingui).

8. Jehová Dios ayudangapaj munajpica ¿imatata israelitacunaca rurarca? ¿Imatata yachajunpanchi?

⁸ Jehová Diosca llactacunatapashmi mangagucunatashna formangapaj munan. Israelitacunapa tiempota yaripashunchi. Israelitacunata Egiptomanda llujchishca jipaca chai llactata agllashpami Jehová Diosca alpa mangagutashna formai callarirca. Shinapash Israel llactaca nalita rurashpami catirca. Shuj llactacunapa yanga dioscunata adorashpami causanajurca. Chaimandami Jehová Diosca cutin cutin profetacunata cacharca. Shinapash profetacunataca na cazurcachu (Jer. 35:​12-15). Israelitacunaca paicunallata na uyaimandami shinllita castigai tucurca. ‘Tucuchingapaj’ rurashca mangacunashna cajpimi, Israel llactapa 10 jatun familiacunataca Asiria llacta tucuchirca. Cutin, Judá llactapa ishcai jatun familiacunataca Babilonia llactami tucuchirca. Imashinami israelitacunapa ejemplopi ricushcanchi, alpa mangatashna Jehová Dios formachun saquishpallami ñucanchillata ali causashun.

9, 10. Jehová Dios consejajpica ¿imatata ninivitacunaca rurarca?

⁹ Jehová Diosca Nínive llactamanda gentecunatapashmi  consejarca. Chaimandami profeta Jonastaca nirca: “Jatari, chai jatun Nínive shuti pueblopi causajcunapajman ri. Ñuca imatalla villai nishcata villagri” nishpa. Jehová Diosca Nínive llactata tucuchingapaj munajushpami Jonastaca villagri nirca (Jon. 1:​1, 2; 3:​1-4).

¹⁰ Jonás villajpimi ‘Nínive pueblopi causajcunaca, Taita Diosta crinajurca. Paicunapurapica, rucumanda callarishpa uchillacunacamanmi, cañamuta churajushpa, na micunachu nishpa villanajurca’. Ashtahuangarin ‘Nínive pueblota jatun mandajpash pai mandashpa tiajunamanda jatarishpami, paipaj churajunata llujchirca, paipash cañamuta churajushpa uchufapi tiarirca.’ Ninivitacunaca alpa mangatashna aliguta formachun saquishpa arripintirijpimi Jehová Diosca paicunata na tucuchirca (Jon. 3:​5-10).

11. Israel llactapa, Nínive llactapa ejemplopica ¿imatata Jehovamanda yachajupanchi?

¹¹ Israelitacunaca Taita Diospa agllashca llacta cashpapash alpa mangagutashna Jehová Dios formachunga na munarcachu. Cutin, Nínive llactaca Taita Dios agllashca llactaca na carcachu. Shinapash, alpa mangagutashna formachun saquijpimi Jehová Diosca Nínive llactata llaquishpa perdonarca. Imashinami ricupanchi, Jehová Diosca na ñavita ricushpallachu agllan (Deut. 10:17).

12, 13. a) Jehová Diosca ¿imamandata huaquinbica cambian? b) Saúl rey cajpica ¿imashinata Jehová Diosca llaquirirca? Nínive llactamanda gentecunataca ¿imashinata Jehová Diosca llaquirca?

¹² Gentecuna cambiangapaj munajpica, tucuchishapachami nishca cashpapash Jehová Diosca cambianmi. Bibliapica Taita Diosca ninmi, rey “cachun Saulta churashcamandaca, ninandapachami llaquirini” nishpa (1 Sam. 15:11). Cutin, Nínive llactamandacuna arripintirijpica ‘llaquichishami nishca cashpapash llaquirishpami’ paicunataca na tucuchirca (Jon. 3:10).

¹³ Saulmandapash ¿imatata yachajupanchi? Callaripica Saúl rey cachunmi Jehová Diosca munarca. Shinapash, Saúl feta na charijpi, na cazungapaj munajpimi Jehová Diosca Saúl rey cachunga ña na munarca. Shinaca, Saúl rey cachun agllashpaca ¿Jehová Diosca pandarircachu? Na. Ashtahuangarin Sául nali tucujpimi Taita Diospash cambiarca. Shinallata, ninivitacuna cambiajpica, Jehová Diospash cambiashpami paicunataca na tucuchirca. Shinaca Jehová Diosca juyaj, llaquij Dios caimandami gentecuna paicunapa nali ñanda saquishpa cambiajpica paipash cambian. Chaita yachashpaca cushijunchimi.

14. a) Jehová Diosca ¿imashinata ñucanchitaca alpa mangagutashna forman? b) Alpa mangagutashna ñucanchita Jehová Dios formachun munashpaca ¿imatata rurana capanchi?

¹⁴ Jehová Diosca Bibliahuan, paipa organizacionhuanmi ñucanchitaca alpa mangagutashna forman (2 Tim. 3:​16, 17). Chaimandami, Bibliahuan paipa organizacionhuan consejocunata cujpi o ali ñanman tigrachun intidichijujpica uchashpa cazuna canchi. Chairalla o unaita bautizarishca cashpa, congregacionbi ashtaca responsabilidadcunata charishpapash Jehovapa consejocunataca catinami canchi. Shinallata, alpa mangagutashna ñucanchita Jehová Dios formachunbash saquinami canchi.

15, 16. a) Congregacionbi responsabilidadcunata chingachishpaca ¿imashinata huaquingunaca sintirishca? b) Congregacionbi responsabilidadcunata chingachimanda ama yapata llaquirijuchunga ¿imata ayudanga?

¹⁵ Jehová Diosca ¿imashinata ali ñanman tigrachun ayudan? Huaquinbica cutin alita rurai callarichunmi Jehová Diosca aliguta ñucanchitaca  intindichin. Cutin huaquinbicarin, nalita rurashcata aligutapacha intindichunmi congregacionbi responsabilidadcunata quichun. Ernestopa * ejemplota ricupashun. Paica ancianomi carca. Nali negociocunata ruraimandami Ernestoca jatun juchapi urmarca. Chaimandami anciano cana responsabilidadta chingachirca. Huauqui Ernestoca anciano canata saquinmi nishpa congregacionbi villajpica ¿imashinata chai tutaca paica sintirirca? Paica ninmi: “Cunanga imapapash na sirvinichu yashpami ninanda llaquirircani. Yalishca 30 huatacunapica precursor regular, betelita, siervo ministerial, ancianomi carcani. Quimsa punlla jatun tandanajuipipash ñami discursota cui callarircani. Shinapash, tucui responsabilidadcunatami ñapash chingachircani. Ashtahuangarin, ninanda pinganayachishpami Jehovapa organizacionbica cutinga na responsabilidadcunata charishachu yarcani” nin.

¹⁶ Ernestoca nalita rurashcata intindinami carca. Shinapash ¿responsabilidadcunata chingachishcamanda ama yapata llaquirijuchunga imata Ernestotaca ayudarca? Paica ninmi: “Bibliata yachajungapaj, villachingapaj, tucui tandajuicunapi cangapami ali arreglota rurarcani. Shinallata, congregacionbi huauquipanicuna, revistacunapi ali experienciacunami ñucataca ayudahuarca. Ashtahuanbachaca La Atalaya del 15 de agosto de 2009 revistapi “¿Le gustaría recuperar su privilegio de servicio?” temami ñucataca ayudahuarca. Chai temaca ñuca oraciongunapi mañashcacunataca contestajuj cuendami carca. Chai revistapica nijurcami: ‘Cunanga congregacionbi na ashtaca responsabilidadcunata charimandami Jehová Diospajman ashtahuan quimirita ushapangui’ ” nishpa. Shinami huaquin huatacuna jipaca Ernestoca nin: “Jehová Diosca ñami cutin bendiciajuhuan, ñami cutin siervo ministerial cani” nishpa.

17. Congregacionmanda llujchishpa cachanaca ¿imamandata ali can? Shuj ejemplota parlapai.

¹⁷ Huaquinbica congregacionmanda llujchishpami Jehová Diosca ayudan. Shinami congregaciondaca nalicunamanda limpian, nalicuna cutin alita rurachunbash ayudan (1 Cor. 5:​6, 7, 11). Robertoca casi 16 huatacunatami congregacionmanda llujchi tucushca carca. Chai tucui huatacunapica Jehová Diosta cazushpami taitamamapash congregacionbi huauquicunapash paihuan na chapurirca, saludaitallapash na saludarcachu. Cunanga ñami taucalla huatacunata congregacionman tigramushpa Robertoca ali catijun. ¿Imamanda ashtaca huatacuna jipapash Jehovamanbash congregacionmanbash tigramurcangui? nishpa tapujpica paica ninmi, ñuca familia ñucahuan nimamanda na parlajpimi congregacionman tigramungapaj animarircani. “Alillachu cangui nishpa ñuca familia ashagutallapash ñucata parlachijpica tal vez Jehovapajmanga na tigramuimanllu” carcani ninmi.

18. Jehová Dios ñucanchita alpa mangagutashna formachunga ¿imashina barro alpata cana capanchi?

¹⁸ Ali intindingapaca na tucuillacunachu congregacionmanda llujchi tucunata minishtinchi. Shinapash, Jehová Dios ñucanchita shuj alpa mangagutashna formajujpica ¿imashina barro alpa cashcatata ricuchishun? Jehová Dios consejashpa intindichijujpica Davidshna o Saulshnachu cashun? Ñucanchi Taita Jehová Diosca alpa mangaguta japishpa formaj Dios caimandami shuj taita paipa ‘churita juyashpa llaquichinshna paipa juyashcacunataca llaquichin’. Shinaca, ñucanchi Taita Jehová Dios ñucanchita consejashpa intindichijujpica cushijushpa cazupashunchi (Prov. 3:​11, 12).