Ñucanchi publicaciongunapica ashtaca huatacunatami yachachishca, jahua pachamanda shitai tucushca jipami Diablotaca Magog shuti llactata mandaj Gog nin nishpa. Shinapash ¿imamandata chaita yachachin carca? Apocalipsis libropica nijunmi, Diablomi Taita Diosta sirvijcunata llaquichijun nishpa (Apoc. 12:1-17). Chaimandami yan carcanchi, Gog shutica Diablomi can nishpa.

Shinapash chaita ali intinditaca na usharinllu carca. ¿Imamandata na usharin carca? Bibliapica Gogta tucuchisha nishpami Jehová Diosca cashna nirca: “Jahuata rij alasyu millai animalcuna, sachapi causaj millai animalcuna micuchunmi cararcani” nishpa (Ezeq. 39:4). Shinallata cashnami nirca: “Chai huatacunami Israel llactapica, Gog shuti runata maipi pambanata ricuchisha. Chaipimi Gog shuti runatapash, paipa ashtaca runacunatapash pambanajunga’ nishpa (Ezeq. 39:11). Diabloca espiritumi can. Espíritu cajpica ¿imashinashi alasyu animalcunapash, sacha animalcunapash micunman carca? ¿Imashinashi Alpapi pambai tucunman carca? Bibliapica Diablo micui tucunata, pambai tucunataca na nijunllu. Ashtahuangarin, huaranga huatacunata shuj yana yana utujuman shitai tucunatami nijun (Apoc. 20:1, 2).

Bibliapica nijunbashmi, huaranga huatacuna tucurijpica, Diabloca yana yana utujumanda cacharichi tucushpami cai pacha chuscundi ladocunapi tiaj Gog nishca, Magog nishca llactacunata umachishpa macanajugrichun tandachinga nishpa (Apoc. 20:8, NM). Diablollata Gog cashpaca ¿imashinashi Gogtallata pandachinman carca? Shinaca Ezequiel libropi parlajuj profeciapipash Apocalipsis libropipash Gog nishpaca na Diablomanda parlajunllu.

Shinaca ¿pitata Magog llactata mandajuj Gog nin? Chaita yachangapaca Diosta sirvijcunata pi atacajtami pundapica yachana canchi. Bibliapica ninmi, Magog llactata mandaj Gog, ‘jahua lado llactata mandaj’, shinallata ‘cai pachapi jatun mandajcunami’ Diosta sirvijcunataca atacanga nishpa (Ezeq. 38:2, 10-13; Dan. 11:40, 44, 45; Apoc. 17:14; 19:19). Quimsamanda parlashpapash Bibliapica shujmandallami parlajun. ¿Imashinata yachanchi? Bibliapica ninmi, tucui llactacuna tandanajushpa macanajui callarijpimi Armagedón nishca jatun macanajuica callaringa nishpa (Apoc. 16:14, 16).

Bibliapi textocunata chimbapurashpa ricujpica ¿pita Taita Diosta sirvijcunata ultimota atacana cashca? Ashtaca llactacunami atacana cashca. Shinaca Magog llactata mandaj Gogca na Diablochu  cashca, tandanajushca ashtaca llactacunami cashca. Shinapash ¿pita tandanajushca ashtaca llactacunataca ñaupaman pushajunga? ¿‘Jahua lado llactata mandajchu’ canga? Na alipacha yachanchichu. Shinapash Bibliapica cashnami nin: ‘Canga can causajushca pushtumandami shamungui. Canbash, canhuan tandanajushca ashtaca gentecunapashmi, jahua lado llactamanda shamunguichi. Tucui paicunaca, caballopi tiarishca ninan shinlli, ashtacapacha soldadocunami canga’ nishpa (Ezeq. 38:6, 15).

Profeta Danielpash jahua lado llactata mandajmanda parlashpaca cashnami nirca: ‘Indi llujshimuj lado llactamandapash, jahua lado llactamandapash fiñarishpa tucuchingapaj rishpami ashtacacunata huañuchinga. Pai mandashpa tiajuna carpacunataca mama cuchacunahuan Diospalla juyailla urcuhuan chaupipimi shayachinga. Ashtahuangarin paipa tucurimui chayamujpica, maijan ayudajtapash na charingachu’ nishpa (Dan. 11:44, 45). Imashinami ricunchi, Gog imata ruranamanda parlashpaca profeta Ezequielpash, profeta Danielpash chaitallatami parlarca (Ezeq. 38:8-12, 16).

Gog nishca ultimota atacajpica ¿imata pasanga? Profeta Danielca cashnami nin: ‘Chai huatacunapica israelitacunata ayudaj jatun mandaj Miguel shuti angelmi shayaringa. Cai pachapi gentecuna causai callarishcamandapacha chai punllacaman, nara tiashca jatun llaqui huatacunami tianga. Shina cajpipash chai huatacunapica, libropi shutita escribichi tucushcacunami quishpichi tucunga’ nishpa (Dan. 12:1). Cai textopi ‘israelitacunata ayudaj jatun mandaj Miguel shuti ángel nishpaca Jesusmandami parlajun. Paimi 1914 huatamandaca rey tucurca. Armagedonbipash paimi Diosta sirvijcunataca difindinga. Apocalipsis 19:11-21​pipash Jesusmandallatami parlajun.

Cutin, Apocalipsis 20:8​pica ¿pitata ‘Gog, Magog’ nin? Bibliapica huaranga huatacuna jipa shuj último prueba tianatami parlan. Chaipimi Jehovapa contra tucushcacunaca Jehovata sirvijcunata ninanda na ricunayachishpa llaquichi callaringa. Shinaca ‘Gog, Magogca’ Jehovapa contra tucushcacunami can. Paicunaca Magog llactata mandaj Gog cuendami Diosta sirvijcunataca tucuchingapaj munanga. Shinapash ishcandillatami tucuchitapacha tucuchi tucunga (Apoc. 19:20, 21; 20:9). Shinaca, huaranga huatacuna jipa Jehovapa contra tucushcacunatami Gog, Magog nin.

Testigo de Jehovacunaca Bibliata ali intindingapaj munaimandami ‘jahua lado llactata mandaj’ pi cashcata yachangapaj munanchi. Tandanajushca ashtaca llactacunata pi ñaupaman pushanata na yachashpapash cai ishcai cosascunataca seguromi canchi: 1) Magog llactata mandaj Gogpash paipa soldadocunapash tucuchi tucungami, 2) ñucanchi Rey Jesuscristoca Jehová Diosta sirvijcunata salvashpami shuj tranquilo, juyailla ali Alpagupi causachun ayudanga (Apoc. 7:14-17).