¿Culqui faltajlla causaimandachu minishtirishcacunapa culquita charinaca difícil ricurishca? Millai ungüicunamanda, shuj shuj llaquicunamanda, politicopura macanajuimanda, guerracunamandami culqui faltajlla causanajushcanchi. Shina causanaca shinllimi can, ashalla culquihuan cushilla causangapaca Bibliapa consejocunami ayudan.

 Bibliapica ninmi: “Charij causanatapash, imapash illaj causantapash yachanimi” (Filipenses 4:12).

 Culquita na charishpapash, cunanbi charishca culquihuanlla causanatami yachajuna capangui. Ashalla culquiguhuan causanata yachajushpami quiquinbash, quiquinba familiapash ñaupaman catita ushapanguichi.

 Imapash ayudacuna tiajta yachaj chayashpami o gobiernocuna bonota carajun yachaj chayashpaca chaicunataca japita ushapangui. Chai ayudacuna tiajta yachaj chayashpaca uchalla imagutapash rurana capangui.

 Bibliapica ninmi: “Ali yuyaita pipash na cujpica, yuyaicunaca llaquimi tucun. Ashtahuangarin ali yuyaita taucacuna cujpimi, shinllipacha tucun” (Proverbios 15:22).

 Chaicunamandaca cusahuarmi, huahuacunahuanbashmi parlarina capanguichi. Shina rurashpami ima cambiocuna tiajpipash tucuicuna ayudarita ushapanguichi. Familia ucupi culquita aliguta utilizanata yachashpaca culquitaca yangamandaca na gashtaringachu.

 Bibliapica ninmi: “Culquigutaca pactana, na pactanatapash” ricuna cangui (Lucas 14:28).

 Ashalla culquiguhuan causashpaca imapilla gashtajushcatami yachana capangui. Primeroca, quillapi imashna culquita ganajushcata anotapangui. Jipaca, imacunapilla gashtan cashcata anotapai, aunque na siemprechu chashnallata gashtarin. Shinallata imapash llaquicuna japijpi chaipi gashtangapapashmi anotana capangui.

 Consejo: Anotajushpaca shuj uchilla cosasta randinatapash anotapangui. Shina rurashpaca uchilla cosascunapi yapata culquita gashtajushcatapashmi cuenta japipangui. Por ejemplo, shuj jarica chiclecunapilla yapata culquita gashtajushcatami cuenta japirca.

 Bibliapica ninmi: “Imatapash aliguta ruranata yariaj causanguichi” (Filipenses 1:10).

 Quillapi imashna culquiguta ganajushcata, imashna culquiguta gashtajushcatapash ricupai. Shina rurashpami yangamanda culquitaca na gashtangui. Por ejemplo, caicunapi yuyapai:

•   Carrocunapi. Carrocunata charishpaca, ¿chai carrocunamanda shujta jatuita ushanguimanllu? Valishca carrota charishpaca ¿baratolla carrohuan cambiaita ushanguimanllu? Na cashpaca ¿bicicletapi, buspi rinata, o chaquilla rinatachu agllapanguiman?

•   Entretenerina. Telepi TV cableta churashca cashpa o internetta charishpa ¿huaquin quillacunata anchuchi ushapanguimallu o baratollata churaita ushpanguimanllu?

•   Michamanda, yacumanda, shuj pagocunamandapash. Yacuta, michata, gasolinata, ama yapata gashtangapaj familiahuan parlaripaichi. Punllapi michacunata huañuchishpa, na unai unaita armashpaca na yapata pagaringachu.

•   Micuna. Restaurantepi micunapa randica huasipi yanushpa micupaichi. Yanungapaj randigrijushpaca ashtaca randipangui. Shinallata ashtaca yanushpaca chai sobracunatapash micuita ushapangui. Shinapash nara randigrishpallatami imata randina cashcata anotaita ushapangui. Quiquinguna causashca pushtupillata verduracunaca, frutacunaca baratomi can. Ushashpaca chaicunatami randita ushapangui. Callepi micunacunataca ama randipanguichichu. Chaipa randica huasipillata shuj huertata rurashpami verduracunata tarpuita ushapangui.

•   Ropacunaca. Ropacuna rucu cajpilla o ña na pactajpillami ropacunata randita ushapangui. Baratolla jatujuj ropacunata mascapai. Ropata secadorapi chaquichinapa randica, canlla indipi chaquichita ushapangui. Shina rurashpami na yapata gashtapangui.

•   Shuj cosascunata randina. Imatapash nara randishpallatami tapurina cangui: ¿Pagai ushashachu? o ¿Minishtinichu? Nishpa. ¿Mushuj carrota, mushuj celularta randingapaca shuyaita ushapanguichu? Cutin na minishtirishca cosasgucunata jatushpami asha culquiguta charita ushapangui.

 Consejo: Ashalla culquiguta charimandami tabacota chupanata, tragota ufianata, apostashpa pugllancunata saquichun ayudan. Shina rurashpami na yangata culquita gashtashpa quiquinllata aliguta causaita ushapangui.

 Bibliapica ninmi: “Diosmanda yachajungapaj, paicunapaj shungupi ninanda munajcunaca, ninandami cushijun” (Mateo 5:3).

 Culquimanda parlashpaca Bibliapica cashnami nin: “Ali yachajushca canaca, jarcarina jirrushnami, culquipash jarcarina jirrushnallatami. Ashtahuangarin ali yachaica, alipacha yachajushcacunaman causaita cuj cashcamandami ashtahuan ali” (Eclesiastés 7:12). Ali yachaita taringapaca Bibliatami yachajuna capanchi. Ashtaca gentecunataca Bibliapa consejocunata paicunapa causaipi pactachishpa, ama yapata culquimanda preocuparichun ayudan cashcatami cuenta japishca (Mateo 6:31, 32).