Ñucaca tucuicunata igual tratachun munashpami comunista tucurcani. Pero ¿imashpata comunista canata saquishpa, gobierno na ricunayachij religionman cambiarircani? Shuj llactacunapi shinllita trabajajushca huatacunapica ¿imashinata Jehová Diosta juyaimanda y shujcunapash ayudajpi ñucapa comportamientopi mejorai usharcani?

 Ñucaca Moldovia llactapa Tabani shuti pueblogupi año 1930​pi nacirircani. Chai puebloca pobre pobremi carca. Chaipimi ñuca taitaca 6 huahuacunata mantiningapaj shuj hacienda cuendapi shinllita trabajan carca. Micungapaca faltajllagucunami carcanchi. Ñuca mamaca Iglesia ortodoxa rusa partemi carca. Cutin ñuca taitaca catolicomi carca. Sacerdotecuna imacunatalla rurashcata parlashpami paicunaca cutin cutin pliturin carca.

 18 añosta charishpa colegiopi graduarishpallami ñucaca Komsomol nishca organizacionman yaicurcani. Chai organizacionga comunista yuyaicunatami jovengunamanga yachachin carca. Shinallata jovengumanga chai Partido Comunistapi miembrocuna cachunmi yachachin carca. Ñapashmi ñucataca chai sectorpa grupopi secretario cachun churahuarca. Chaipica tucuicunami huauquicuna panicuna canchi nishpa yachachin carca. Shinallata tucuicunami igual canchi y tucuitallatami igualta tratana canchi nishpami yachachin carca. Chaita uyashpaca cushijushcami carcani. Pero chaipipash injusticiacunata y nalicunata ricushpami imapash chingashcashna sintirircani.

 Unión Soviética a llactapa gobiernoca iglesiacunata vichachun, grupo religiosocunata tucuchichunmi mandan carca. Chaimandami Komsomol nishca organizacionbi cashcamandaca chai gobierno imata mandashcataca maimanda cazuna carcani. Chai pueblopica huaquin testigo de Jehovacunapashmi tiarca. Paicunaca honrado, ali gentecunami can yashpapash, yapatami exageranajun yashpami ricun carcani. Shinapash shuj testigo ñuca charishca ashtaca tapuicunata contestanataca yaitallapash na yarcanichu.

 Ñuca tío Dimitrica pueblopillatami causarca. Paica testigo de Jehovami carca. Huata 1952​pi mayo quillapimi paica “Guéorgui ¿imatata canba causaipica ruragringui?” nishpa tapuhuarca. Paica ñucata ninanda llaquimandami shina tapuhuarca. Pai tapujpimi ñuca umamanga tauca tapuicuna shamuhuarca. Por ejemplo, “Taita Dios tiashpaca ¿imamandata gentecunataca ashtaca sufrimientocunata charichun saquin?” nishpami tapurircani. Ñuca tiohuanga 8 punllacunatami parlarcanchi. Ñuca tapuicunataca Bibliahuanmi paica contestahuan carca. Huaquinbica hasta las 3 de la mañanacamanmi parlashpa quidan carcanchi.

 Chaipimi Bibliata estudiana munaihuanbacha estudiai callarircani. Bibliata estudiashpami ñucata ciertopacha juyaj Taitata charishcata cuenta japircani (Salmo 27:10). Masqui na ashtacata yachashpapash, ñami Jehová Diostaca tucui shunguhuan juyarcani. Chaimi importante decisiongunatapash rurai usharcani. Chai sectorpa grupomanda presidente amenazajujpipashmi Partido Comunistamanda llujshircani. Huata 1952​pa septiembre quillapimi Jehová Diosman ñuca causaita mingashpa bautizarircani. Bibliata estudiai callarishcamanda solo 4 quillacuna jipallami bautizarircani.

 Chai punllacunapica, testigo de Jehovacunapa obraca prohibidomi carca. Pero Jehová Diosta juyashcata ricuchingapami munarcani. Chaimandami shuj pueblocunapi testigocunaman publicaciongunata saquigringapaj ofrecircani. Shina saquingapaj rinaca peligrosomi carca. Porque chai pueblocunapi gentecuna ricushpaca, imatapash sintishpami autoridadcunaman denuncianalla carca. Shinallata, huaquin testigocunaca, paica policiami can, testigocuna imata rurajta yachangapallami testigo de Jehová tucurianga yanmi carca. Shinapash ñuca ciertopacha testigo de Jehová cajtaca, jipallagupimi cuenta japirca. Bautizarishcamanda ishcai quillacuna jipallami ñucataca, publicaciongunata saquijujta ricushpa preso japihuarca.

 Nara sentenciata cushpallatami ñucataca casi shuj huatata carcelpi charihuarca. Chai tucuilla quillacunapica, Jehová Diosmanda caruyachun munashpami cutin cutin interrogahuan carca. Pero shinapash na Jehovamandaca caruyarcanichu. Jehová Diostaca tucui shunguhuanmi juyarcani. Tiempohuanga Ucrania, Odesa llactapimi audienciata rurahuarca. Chai audienciamanga ñucapa taitamamata y ñuca huauquipanicunatapashmi cayachun cacharca. Paicunaca na testigo de Jehovacunachu carca.

 Chai juiciopica, paica engañai tucushpami shuj peligroso sectamanmi yaicushca nircami. Shina nishpami autoridadcunaca ñuca taitamamata y huauquipanicunataca paica locomi tucushca nishpa convencingapaj munarca. Ñuca taitamamaca ninandami manllarirca. Huacashpami testigo de Jehová canataca saquinami cangui nihuarca. Pero ñucaca tranquilomi ñuca mamataca nircani: “Mamita ama pinarijuichu. Na engañai tucushcanichu. Chaipa randica ñuca imatami siempre mascajushcatami tarircani. Imata tarishcataca nunca na saquingapaj munanichu” nircanimi (Proverbios 23:23). Bibliamanda yachanaca ashtacami faltahuarcara. Pero Jehovataca ñami rijsircani y paimanda caruyangapaca na munarcanichu. 6 huatacuna jipami ñuca taitamamapash Bibliata yachajui callarishpa testigo de Jehovacuna tucurca.

 Shinlli trabajocunata rurachunmi 15 añospa sentenciashpa ñucataca Siberia llactapa Kolimá nishca pushtuman trenbi cachahuarca. Chaipica pamba trabajoca ashtacami tiarca. Presocunata controlangapami guardiacuna y oficialcunaca macashpa yarjai pasachin carca. Primerollaca caimanda causaca na llujshishachu yashpami pensan carcani.

 Chai pushtupica 34 testigo de Jehovacunami cashcarca. Huaquingunaca “canba grupopica maijanbash Jonadab tianllu” nishpami tapuhuarca. Chai ratomi paicunaca testigo de Jehovacunami can nishpa pensarcani. Porque testigo de Jehovacunallami Bibliapi tiashca shuticunata utilizashpa parlanataca yachan. Chai huauquicunaca ashtaca experienciatami charirca. Chaimi shinlli ratocunapi Bibliapi consejocunata uyashpa ñucapa comportamientopi mejorachun ayudahuarca. Por ejemplo, shuj shuj casocunapi imata ruranatami yachachihuarca.

 Pambapica maquinacunahuanmi trabajan carcani. Shuj punllaca, Matfei shuti ñucapa cumbami 50 santocunapa shuticunatami de memoria yachani nishpa jariyajurca. Chaimi ñucaca santocunata nalicachishpa rimarcani. Chaimandami ñucapa cumba huactangapaj tucujpica calpashpa rircani. Shina pasajujtaca huauquicunaca asishpami ricunajuhuashcarca. Asinajujta ricushpami ñucaca ninanda culirashpa nircani: “¿Imashpata asinajunguichi? Ñucaca predicangapallami munarcani” nircani. Chaipimi huauquigucunaca, ali villaicunataca aligumanmi parlana canchi na rimajunachu canchi nishpa juyaihuan intindichihuarca (1 Pedro 3:15). Ñuca cumbaca gobiernotaca na alicachinllu carca. Shinapash guardiacunata y autoridadcunata testigo de Jehovacuna respetohuan tratajta ricushpami manllarishpa ricun cashcarca. Tiempohuanga Bibliamanda ashtahuan yachajungapami munarca. Shuj tutaca chiri yacu barrilpi pacalla bautizarirca. Chai tutata nunca na cungashachu.

 Asha tiempo jipallami ishcai huauquicunata y ñucataca politicamanda parlajuj clasecunaman richun munarca. Primeroca na rishunllu nircanchimi. Porque chaiman rishpaca, politicapimi satirinajunchiman yashpami shina nircanchi (Juan 17:16). Chaimi castigashpa ishcai semanata shuj yana yana ucupi vichai tucurcanchi. Chaimanda llujshijpimi huauquicunaca, chai clasecunaman rishpaca na politicapica chapurinajunguichichu nishpa aliguman explicarca. Ashtahuangarin, chaiman rishpaca, ali testimoniotami cui ushanguichi nircami. Chai huauquicunaca, aliguman Bibliapi consejocunata intindishpa ali decisiongunata agllachunmi ñucanchitaca ayudarca.

 Huauquicunaca, Jehová Dios ñucamanda preocuparijta cuenta japichunmi consejahuan carca. Por ejemplo, shuj presotaca jefe de contabilidad cachunmi churashcarca. Paica sacerdotemi carca. Micungapaj rinajushpaca cada tuparishcatami “imanalla Diablopa huahua” nihuan carca. Chaimi shuj presoca canbash “imanalla papito” niyari nihuarca. Chaimi ñucaca paipa nishcata rurashpa shina nircani. Pero shina nishcamandaca ashtami macai tucurcani. Ñucata ima pasashcata yachaj chayashpami huauquicunaca nalita rurashcata intindichihuarca (Proverbios 29:11). Chaimi chai sacerdotetaca disculpahuai nircani.

 Pambapi trabajoman nara cachashca tiempopica tuta o ali horatapachami reunionmanga pacalla rin carcanchi. Pero pambapi cashca tiempopica ni maipi pacajunata na charircanchichu. Chaimi cada punlla guardiacuna ricunalla pushtucunapi shuj bombaguta rurashpa tandanajun carcanchi. Chaipimi papelpi escribishca textogucunata ricun carcanchi. Ashtaca textocunata de memoria yachajushpa chai textocunata cutin cutin repasangapami esforzarin carcanchi. Si shuj guardia ricujpica, notagucunataca uchami langan carcanchi.

 Huata 1959​pimi, pambapi trabajocunamanda cacharishpa Karagandy pushtuman deportahuarca. Nara librepachaca carcanichu. Chaimi cazarangapaca 20 punllacunata permisota mañarcani. Shinami Rusia llactapa Tomsk nishca pushtuman rircani. Chaipimi shuj cushilla paniguta rijsircani. Paica María shutimi carca. Paica tucui shunguhuanmi Jehová Diostaca sirvijurca. Ñucaca siempremi directo parlanlla carcani. Chaimi shugulpita paitaca, “novio tucungapaca na tiempota charinichu. Cazarashun” nircani. Chaimi paica ari nihuarca. Shuj uchilla fiestagutami rurarcanchi. Ashtaca pruebacunata aguantashcamandaca Mariaca ninandami ñucataca alicachishpa Jehová Diosta sirvishpa catichun ayudangapaj munahuarca (Proverbios 19:14).

 1960 huatacunapica, huasin huasin rishpaca na predicaita ushanllu carcanchi. Pero informalmente predicangapaca ima oportunidad ricurijpipash uchami aprovechan carcanchi. Maimanbash invitajpi o vacación llujshishpaca, paraíso alpagupi causanamandami parlan carcanchi. Shinallata shuj shuj personacunahuan parlangapaca, shuj shuj formacunatami mascan carcanchi. Por ejemplo, huasicunata jatunajujta ricushpaca chaiman rishpami, dueñocunamanga Taita Diosmanda parlai ushan carcanchi. Shina rurashpami Mariahuanga 6 personacunahuan Bibliata yachajui callarircanchi. Tiempohuanga chai personacunaca testigo de Jehovacunami tucurca.

 Huaquinbica votacionguna tiaj tiempopimi predicai ushan carcanchi. Shuj punllaca, policía secretapi trabajaj agentecunami ñuca trabajajuj fabricaman shamurca. Chai fabricapica tauca testigocunami trabajan carcanchi. Caipica 1.000 compañero trabajadorcunapa ñaupapimi testigo de Jehovacunaca imashpata politicacunapi na participanguichi nishpa tapurca. Ingeniero jefepash y shuj compañerocunapashmi ñucanchitaca difindishpa Testigocunaca cumplido, ali trabajadorcunami can nirca. Chaimi ñucanchicuna shinlli tucushpa, Bibliapi textocunata de memoria nishpa ñucanchi creenciacunamanda parlai usharcanchi. Shina parlajpimi chuscu trabajadorcunaca Bibliata estudiai callarirca y nara shuj huata tucujpillatami bautizarirca.

 1970 huatacunapica, Kazajistán llactapi ashtaca personacunami ali shunguta charimandaca testigo de Jehovacuna tucurca. Chaimi por primera asambleata rurangapaj munarcanchi. Pero ¿imashata autoridadcunata na yachajtaca rurashunyari? yarcanchimi. Almaty nishca llactapa ladolla pueblopica shuj casamientomi tiagrijushcarca. Chaimi chai casamientota aprovechashpa asambleatapash rurashun yarcanchi. Chai casamientomanga más de 300 invitadocunami rirca. Ñuca huarmigu y shuj panigucunapash chai pushtuta aliguta arreglangapaj y mishqui micunaguta rurangapaca ninandami esforzarirca. Invitadocunaca, 12 huauquicuna cushca discursocunatami ashtahuanga gushtarca. Chaipimi ñucaca por primera vez, ashtaca gentecunapa ñaupapi shuj discursota curcani.

 Ñuca huarmigu Mariaca ali alimi carca, ñucaman sujetarishpami causan carca. Siempremi Taita Diospa Gobiernota pundapi churan carca. Paipa tucui causaipica nunca na Jehová Diosmandaca caruyarcachu. Paica sano sano cashpapash shuj punllaca, osteoporosis ungui japishpami gravepacha tucurca. Chaimi casi 16 huatacunata camapilla yalirca. Chaipimi ñuca ushigu Liudmila y ñucapash paitaca año 2014​pi huañungacaman ali ali cuidarcanchi.

 Ñuca huarmigu Mariata sufrijujta ricushpaca, imapash maquita huatashcashnami sintirin carcani. Huaquinbicarin, paipa ladogupi cashpaca, shungu ucupillami ninanda huacan carcani. Shinapash huañungacamanmi Bibliatapash y animota cuj temacunatapash igual liin carcanchi. Paraíso alpagupi causanatami cutin cutin parlan carcanchi. Jehová Diospa promesacunata yarishpami ninanda tranquilizarin carcanchi y aguantashpa catipash ushan carcanchi (Salmo 37:18; 41:​3).

 Jehová Diosta rijsishca punllamandami paica ñucata juyahuashca, llaquihuashca y imagupipash apoyahuashca (Salmo 34:19). Pamba trabajocunapi purijujpi y shuj ladocunaman cachai tucujpipash Jehová Diosca paipa shimi Bibliahuanmi ayudajuhuarca. Shinallata, ñuca juyashca huarmigu Mariata huañungacaman cuidachunmi fuerzata carahuarca. Jehová Diosta juyaimandami ima pasajpipash aguantashpa catimushcani.