Ari, cristianocunami capanchi. Y cai cati yuyaicunapimi chaicunataca cuenta japita ushapangui:

•   Jesuspa ejemplotami alipacha catingapaj esforzaripanchi. Shinallata pai yachachishca shinami causangapaj esforzaripanchi (1 Pedro 2:21).

•   “Ñucanchita salvangapaca, cai alpapi gentecunapuramandaca nipita na Taita Diosca agllashcachu” sino solo Jesustalla. Chaimi ñucanchicuna salvari ushangapaca Jesuspi crina minishtirishcapacha cashcata seguro capanchi (Hechos 4:12).

•   Testigo de Jehovacuna tucushpaca Jesuspa shutipimi bautizarircanchi (Mateo 28:18, 19).

•   Taita Diosta mañajushpaca Jesuspa shutipimi mañapanchi (Juan 15:16).

•   Jesús tucui jaricunata umashna mandajushcatapashmi cripanchi (1 Corintios 11:3).

 Shinapash cristianocunami canchi nij tucushca shuj grupocunamandaca ñucanchicunaca huaquin cosascunapica na cripanchichu. Por ejemplo, Bibliapica Jesusca Taita Diospa Churi cashcatami yachachin. Shinaca Jesusca na trinidadmanda shuj parteca canllu (Marcos 12:29). Shinallata huañushca jipa alma causashpa catijushcataimanga na cripanchichu. Shinallata Bibliapica Taita Dios gentecunata infiernopi ninanda llaquichijushcataimanga na yachachijunllu. Chaimi chai panda yachachishcacunapica na cripanchi. Shinallata Bibliapica ni maipi na nijunllu, religiongunata ñaupaman pushajcunataca ninandami alicachina canguichi nishpa. O paicunataca shuj shimicunata nishpapashmi rimana canguichi nishpaimanbash na yachachijunllu (Eclesiastés 9:5; Ezequiel 18:4; Mateo 23:8-10).