8 PARTI
Ima llaquiguna shamucpi
“Canguna yapa cushi anguichi. Chasna acpi, shuc ratullami cai pachaibi turmindarina manguichi” (1 Pedro 1:6).
Ailluibi cushi causangahua tucuita alita racpihuas, maicanbiga cungaimanda turmintuguna shamucpi llaquirishunmi (Santiago 4:14). Chiraicumi mana yapa llaquiringahua Yaya Dios yanapai tucunchi. Biblia cunaigunata pactachishaga can, camba tucui aillundi ima llaquibi aushas mana yapacta llaquiringuichu.
1 JEHOVA MAQUIBI TUCUITA SAQUI
BIBLIAGA NINMI: “Dios cangunata yapa ali cuirashcamanda, ama imamandas nusparichichu” (1 Pedro 5:7). Turmintugunaga mana Diosmandachu shamun (Santiago 1:13). Can paima caillayacpiga yanapangami (Hebreos 13:6). “Tucui uras canguna turmintarishcamanda Dioshuan cuintaichi” (Filipenses 4:6).
Caran punzha Bibliata leisha, alita intindisha yachanami cushi angahua yanapanga. Jehovaga “ima llaqui tiacpihuas ñucanchita cushiyachinmi” (2 Corintios 1:3, 4; Romanos 15:4). Paiga “cangunata mana manzhana cungailla yuyaitas cungami” (Filipenses 4:6, 7, 13).
CAITA RAI:
-
Cungailla imatas alita rangahua Jehovata mañai
-
Imatas tucuita alita ricushcahuasha anllai
2 CANGUNAPURA CUIRARICHI
BIBLIAGA NINMI: “Yuyaiyuc runaga caran uras masta yachana munan, sallata sabiru runaga masta intindina munan” (Proverbios 18:15). Caran aillu ima minishtishcata musiarisha imasa yanapanata yuyai (Proverbios 20:5).
Can llaquishca runa huañucpiga, mana pingasha can imasa sintirishcata cuintai. Jesuspas “huacarami” (Juan 11:35; Romanos 12:15). Samana, puñunahuas minishtishca man (Marcos 6:31). Caita rashami ima llaquigunai aushas mana yapacta llaquiringui.
CAITA RAI:
-
Mana llaquiguna shamugllaita ñaupata alita cuintanacuna an. Sa racpimi llaquiguna shamucpiga cungailla cuintangauna
-
Canshina ima llaquigunata pasac runagunahuan cuintanacui
3 YANAPAITA TAPUI
BIBLIAGA NINMI: “Quiquin huauquishina quiric puralla llaquinacusha causaichi” (1 Pedro 3:8). Amigoguna yanapana munashas imasa yanapanatachari mana yachanaun. Chiraicu can ima minishtishcata rimai (Proverbios 12:25). Bibliamanda yachaccunata yanapaita tapui. Bibliahuan cunasha yanapacpi alita rasha catingui (Santiago 5:14).
Yaya Diosta quiric runagunamanda mana caruyashaga, Diosta mas quirisha ima yanapaitas tupangui. Llaquigunai auc runagunata yanapasha alita sintiringui. Can Jehovaibi quirishcata, pai imata rasha nishcatas cuintai. Shuccunata yanapasha canda llaquiccunamanda ama caruyaichu (Hebreos 10:25; 1 Corintios 15:58).
CAITA RAI:
-
Ali amigohuan cuintasha pai yanapachun nisha saqui
-
Imatas mana pacasha pagllai rimai
