LEKCIJA 48
Goďaverones tuke kide avri kaha sal
Lačhe kamaratenca hin o dživipen feder. A te predživas vareso pharo, hin amen pre kaste pes te zmukhel. Aľe e Biblija phenel, hoj na sako manuš hino lačho kamaratos. Sar aveha pre oda, ko hino lačho kamaratos? Pre kada amenge akana odphenaha.
1) So tuha šaj keren tire kamarata?
Oda savo sal, dičhol olestar kaha sal. Te sal lačhenca, the tu aveha lačho. Aľe te sal nalačhenca, aveha nalačho. A hin jekh, či lenca phires avri, abo sal lenca pro internetos. Andre Biblija hin: „Ko phirel goďaver manušenca, ačhela goďaveder. Aľe ko phirel dilinenca [olenca, so na kamen le Jehovas], doperela nalačhes.“ (Príslovia 13:20) Te sal le manušenca, so kamen le Jehovas, the tu kameha le Jehovas buter a kereha andro dživipen oda, so kamel o Jehovas. Aľe te sal ajsenca, so le Jehovaske na služinen, ajse manuša tut odcirden le Jehovastar het. Vaš oda tuke mište kide avri tire kamaraten! Te tu kameha le Jehovas a tire kamarata tiš kamena le Jehovas, sodujenge oda anela bari chasna. Avka amen džanaha te zoraľarel u te podhazdel jekh avres. (1. Tesaloničanom 5:11)
2) Sar hin le Jehovaske, te dikhel save kamarata tut hin?
O Jehovas na mukhel chočkas andre peskero jilo. Kamel olen, so hine čačipnaskere. (Príslovia 3:32 NZ) Aľe sar hin le Jehovaske, te dikhel, hoj sam le manušenca, so les narado dikhen? Dukhal les olestar o jilo. (Pregen Jakub 4:4) Aľe te dikhel, hoj sam le manušenca, so les kamen a denašas le nalačhendar, igen olestar radisaľol. A na ča oda! Dikhela pre amende sar pre peskere bare kamarata. (Žalm 15:1–4)
DODŽAN TUT BUTER
Soske avka kampel te kidel avri kaha sam? So šaj keres, kaj tu te aves mek feder kamaratos predal aver?
3) Denaš le nalačhe manušendar!
O manuša, so na kamen le Devles a na dživen avka sar ov kamel, nane predal amende lačhe. Mukh o VIDEJO a paľis vakeren jekhetane.
-
Kana šaj avas le nalačhenca avka, hoj olestar aňi na džanas, hoj sam lenca?
Pregen 1. Korinťanom 15:33 a paľis vakeren jekhetane:
-
Save manuša šaj en nalačhe predal tute? Soske?
Pregen Žalm 119:63 a paľis vakeren jekhetane:
-
Sar džanaha, hoj vareko ela lačho kamaratos?
Jekha kirňa phabatar šaj kirňon the aver. So tuha šaj kerel jekh nalačho kamaratos?
4) Oda kamaratos na mušinel te el ajso sar tu
E Biblija pisinel pal o Dávid the Jonatán. Jekh sas terneder, aver phureder. Jekh sas pasťjeris, aver le kraľiskero čhavo. The avka sas sodujdžene bare kamarata. Pregen 1. Samuelova 18:1 a paľis vakeren jekhetane:
-
Soske amare kamarata na mušinen te el ajse phure sar amen, aňi andal ajsi fajta sar amen sam?
Pregen Rimanom 1:11, 12 a paľis vakeren jekhetane:
-
Sar amen den zor amare kamarata, so kamen le Jehovas?
Dikh tuke andro videjo, kaha ačhiľa kamaratos amaro terno phral. Mukh o VIDEJO a paľis vakeren jekhetane.
-
Soske le Akiloskeri e daj o dad leha vakerenas pal o kamarata andal e škola?
-
Soske dičholas, hoj kamel te el ole manušenca?
-
So kerďa, kaj peske te arakhel čačikane kamaraten?
5) Av čačikano kamaratos!
Rozmišľin, sar tuke šaj arakhes čačikane kamaraten a sar tu šaj aves avrenge ajso kamaratos. Mukh o VIDEJO.
Pregen Príslovia 18:24 the 27:17 a paľis vakeren jekhetane:
-
Sar peske pomožinen čačikane kamarata?
-
Hin tut ajse? Te na, so šaj keres, kaj ajsen te arakhes?
Pregen Filipanom 2:4 a paľis vakeren jekhetane:
-
Te kames lačhe kamaraten, the tu mušines te el lačho kamaratos. Sar oda šaj keres?
Te kames lačhe kamaraten, the tu mušines te el lačho kamaratos
VAREKO ŠAJ PHENEL: „Ov lačho hino, oda ňič, hoj nane andre tumari vjera.“
-
So bi odphenehas?
SO SIKHĽIĽAM
Te peske lačhes kidas avri kaha sam, amenge korkorenge oda anela bari chasna a o Jehovas amendar radisaľola.
So bi phenehas
-
Soske le Jehovaske nane jekh, kaha sam?
-
Save kamaraten na kamas?
-
So šaj keres, kaj te aves baro kamaratos olenca, so kamen le Jehovas?
DIKH TUKE BUTER
Pregen tuke, sar amen čačikane kamarata hazden upre andro pharipena.
„Vytváraj si pevné priateľstvá, skôr než príde koniec“ (Strážna veža z novembra 2019)
Pregen tuke, sar šaj aves avrenca baro kamaratos.
Dikh tuke, sar hin oda le kamaratenca pro internetos.
Andro pribehos „Túžil som po otcovi“ tuke pregen, sar jekh murš avľa pre oda, save les hin kamarata.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
