Nevo manželstvo hino nevi fameľija. Furt kames la da le dades a presikaves lenge e paťiv, ale akana hiňi tiri romňi, o rom nekdvoležiteder manuš andre tiro dživipen. Prekal tiri fameľija na mušinel ada te el lokes te achaľol. Biblicka zasadi šaj tuke pomožinen te el virovnano, keci časos sal tira fameľijaha a keci tira romňaha, le romeha, kaj tumenge andro manželstvo te el mište.

SO PHENEL E BIBLIJA: Presikav e paťiv la dake le dadeske (Efezanom 6:2) Ada hin jekh, keci berš lenge hin, furt tuke len važin a presikav lenge e paťiv! Ma bister, hoj the tira romňa, le romes hin e daj o dad a mušinel pes pal lende te starinel sar lačhi čhaj, lačho čhavo. E laska nane žjarlivo, vašoda ma dara, hoj tut e romňi, o rom na kamel, bo furt rado dikhel peskera fameľija. (1. Korinťanom 13:4; Galaťanom 5:26)

SO ŠAJ KERES:

• Ňigda ma phen ajse nagoďaver lava, sar: Tiri fameľija furt dikhel upral pre mande! Abo: Tira dake ňigda nane pre dzeka, so kerav

• Snažin tut te pochopinel la romňa, le romes

SO PHENEL E BIBLIJA: O rom džala het la datar le dadestar a ľikerela pes la romňatar a sodujdžene ena jekh ťelos. (1. Mojžišova 2:24) The te sal andro manželstvo, možno tiri daj tiro dad na kamen te preačhel te el zodpovedna vaš tuke a rado pes mišinen andre tiro manželstvo.

Rozhodňin tut tira romňaha, le romeha, so lenge domukhena a so na. Ma daran te phenel lenge, sar tumenge hin. Phenen lenge ada jasňe, ale ma phenen ada drsňe! (Príslovia 15:1) Te avena pokorna, kovlejileskere the trpezliva, tumari fameľija tumen furt rado dikhela a zľidžana tumen jekh avres andre laska. (Efezanom 4:2)

SO ŠAJ KERES:

• Te tuke mišľines, hoj pes e fameľija but mišinel andro tumaro manželstvo, phen ada pokojnones tira romňake, le romeske

• Phenen tumenge, so aleha kamen te kerel