Dikh pre ada cikno čhavoro pro obrazkos. So phenes, daral a hino smutno? The tuke sas avka varekana? — Sakoneske varekana avka hin. Andre Biblija šaj genas pal le Jehovaskere kamarata, so lenge thiš sas varekana smutnones, bo sas korkore a daranas. Jekh lendar sas o Elijaš. Dodžanaha pes pal leste buter.

O Elijaš dživelas but berša angle oda, sar pes naroďinďa o Ježiš. O Achab sas kraľis andro Izrael, ale na služinelas le Jehovaske. O Achab a leskeri romňi Jezabel pes modľinenas ke socha, so pes vičinelas Baal. Vašoda but manuša chudne te služinel le Baaloske. E kraľovna Jezabel sas igen nalačhi a kamelas te murdarel savore Jehovaskere služobňiken the le Elijaš! Džanes, so kerďa o Elijaš? —

 O Elijaš denašľa! Geľa dur andre pušťa a garuďa pes andre jaskiňa. So mišľines, soske ada kerďa? — Mište phenes, daralas. Ale o Elijaš pes na mušinelas te daral. Soske? Bo džanelas, hoj o Jehovas leske šaj pomožinel. O Jehovas leske imar sigeder sikaďa, hoj hino zoralo Del. Jekhvar šunďa avri leskeri modlitba avka, hoj andal o ňebos čhiďa e jag pre phuv. Vašoda the akana o Jehovas šaj pomožinel le Elijašiske.

Sar sas o Elijaš garudo andre jaskiňa, o Jehovas leske phenďa: „Soske tut ade garuves?“ O Elijaš odphenďa: „Imar ačhiľom ča me korkoro, so tuke služinel. Darav, hoj murdarena the man.“ O Elijaš mišľinelas, hoj murdarde savoren, so služinen le Jehovaske. Ale o Jehova leske phenďa: „Ada nane čačipen. Hin mek 7000 aver manuša, so mange služinen. Ma dara! Hin man but buťi prekal tu.“ So mišľines, radisaľolas o Elijaš, sar ada šunďa? —

So tut šaj sikaves olestar, so pes ačhiľa le Elijašiske? — Ma dara a ma av smutno, te sal varekana korkoro! Hin tut kamarata, so kamen le Jehovas the tut. O Jehovas hino igen zoralo a furt tuke pomožinela. Sal rado, hoj o Jehovas hino furt paš tute? —