So phenes, hin phares te kerel oda, so hin lačho? — But manuša peske mišľinen, hoj ada hin phares. Andre Biblija pes phenel pal jekh čhavoro, saveske na sas lokes te kerel oda, so hin lačho. Ov pes vičinelas Jozijaš. Ale les sas lačhe kamarata, save leske pomožinenas. Genaha peske akana buter pal o Jozijaš the pal leskere kamarata.

Le Jozijašiskero dad sas o Amon, ov sas kraľis andro Judsko. O Amon sas igen nalačho a modľinelas pes ko sochi. Sar o Amon muľa, ačhiľa kraľis andro Judsko o Jozijaš. Leske sas akor ča 8 berš. So phenes, sas thiš ajso nalačho sar leskero dad? — Na, ov ajso na sas!

O Jozijaš imar terňipnastar kamelas te šunel le Jehovas. Vašoda peske kidelas avri ča ajse kamaraten, so kamenas le Jehovas. On pomožinenas le Jozijašiske te kerel oda, so hin lačho. Ko sas le Jozijašiskere kamarata?

Leskero kamaratos sas o Sofonijaš. O Sofonijaš sas prorokos, ov phenelas  le manušenge andro Judsko, kaj pes te preačhen te modľinel ko sochi a te na, ta avela pre lende bibacht čiže bari ňešťesca. O Jozijaš šunelas le Sofonijaš, služinelas ča le Jehovaske a na modľinelas pes ko sochi.

Aver le Jozijašiskero kamaratos sas o Jeremijaš. Leske sas ajci berš keci le Jozijašiske a bešenas nadur pestar. On sas ajse lačhe kamarata, hoj sar o Jozijaš muľa, o Jeremijaš leske sthoďa giľi pal ada, sar igen leske hin phares pal leste. O Jeremijaš the o Jozijaš pomožinenas jekh avreske te kerel oda, so hin lačho.

So tut šaj sikaves le Jozijašistar? — The te sas o Jozijaš mek ča cikno čhavoro, ov kamelas te kerel oda, so hin lačho. Ov džanelas, hoj leskere kamarata šaj en ča ola, so kamen le Jehovas. Kide tuke avri ajse kamaraten, so kamen le Jehovas a so tuke pomožinena te kerel oda, so hin lačho.