Andre Biblija sas phendo, hoj pal oda, sar o Kristus merela, varesave le kresťanendar ačhena falošna a previsarena o biblicko čačipen pro klamišagos. (Skutky 20:29, 30) Pregeľa varesavo časos a avka pes ačhiľa. O falošna učiťeľa prithovenas ko Ježišoskero sikaviben oda, so sikavenas pohanska naboženstva. O kresťanstvo avka preačhiľa te sikavel o čačipen. (2. Timotejovi 4:3, 4) Sar šaj džanas, hoj amen adaďives rozuminas oleske, so skutočňe sikavel e Biblija?

Avľa časos, kaj o Jehovas te odučharel o čačipen. O Jehovas phenďa, hoj andro posledna ďivesa but manuša džanena, so hin o čačipen. (Daniel 12:4) Andro berš 1870 paru uprimna kresťana sprindžarde, hoj but olestar, so sikaven andro khangera, nane čačipen. Vašoda kamenas te džanel, so hin andre Biblija. O Jehovas lenge pomožinďa a on arakhle a achaľile o biblicko čačipen.

Uprimna manuša študinenas e Biblija. Ala čestna kresťana rodenas o biblicko čačipen avka, sar amen adaďives. Kidenas avri postupňe jekh biblicko nauka pal aver a rodenas, so pal ada phenel e Biblija. Sar arakhle veršos, saveske sas phares te achaľol, rodenas dureder andre Biblija, kaj te achaľon ole veršoske. Sar arakhle, so hin čačes andre Biblija, zapisinde peske ada. Ada, hoj e Biblija višvetľinel jekh biblicko veršos aver veršoha, pomožinďa te arakhel o čačipen pal o Devleskero menos, pal o kraľišagos, pal ada, so o Del kerela prekal o manuša, so kerela la phuvaha, so hin olenca, so mule a hoj pale šaj ušťena andal o meriben. Preačhile te paťal a te kerel but veci, so sikavel o falošno kresťanstvo. (Ján 8:31, 32)

Le beršestar 1879, ala prava kresťana avle pre ada, hoj pes mušinel pal ada čačipen te zvestinel pal calo svetos. Akorestar den avri o časopisos, so pes furt del avri dži adaďives, Stražno veža. Adaďives zvestinas biblicko čačipen andro 240 krajini, andro 750 čhiba. Mek ňigda angle ada ajci butdžene na prindžarde o čačipen avka, sar akana.

• So pes ačhiľa le biblicke čačipnaha, sar o Kristus muľa?

• Sar avľa o biblicko čačipen pale avri?