Кеда бијанѓола јекх бебе, тегани о дад хем и дај тане бут бахтале. Сар неве родителија шај ка овен изненадиме кобор шај јекх чхаво те лел тумендар време хем сила. О бисуте раќа хем о промене ко чувствија шај те анен џи ко нервозе ко брако. Ка ваљани те керен несаве промене те шај те грижинен тумен тумаре чхавеске хем тумаре бракоске. Сар шај о советија тари Библија те поможинен ту те икљове ко крајо акале ситуацијаја?

СО ВАКЕРЕЛА И БИБЛИЈА: „О мануш со иси ле мангипе бут трпинела хем ов тано љубезно“. Исто аѓаар, асавко мануш нане те дикхел само песке или сигате те хољанел (1. Коринќаните 13:4, 5). Сар неви дај нормално тано те де побаро внимание те чхавеске. Тегани, шај то ром те осетинел пе кај бистерѓан ле, адалеске ма бистре кај леске да ваљани те одвојне време. Ако сиан стрпливо хем љубезно шај те поможине ле ов те осетинел пе кај ваљанела туке хем кај исто аѓаар грижинела пе тумаре чхавеске.

Ки Библија пишинела: „Ромален, џивдинен тумаре ромњенцар аѓаар сар со сиклилен“ (1. Петрово 3:7). Хаљов кај ти ромни ка накхавел побутер време е чхавеа хем ка ваљани лаке побутер сила те грижинел пе леске. Адалеске со иси ла неве обврске шај те овел ла стрес, те овел уморно хем чак депресивно. Несаво пути шај ка овел туке хољами, ама трудин ту те ачхове смиримо, соске „окова со на хољанела сигате, пошукар тано таро зорало мануш“ (Изреки 16:32). Сикав кај хаљовеа ла хем поможин ла (Изреки 14:29).

СО ШАЈ ТЕ КЕРЕ:

• Е даденге: Поможин те ромњаке адалеа со ка аракхе е чхаве, чак раќате да. Накхав побутер време те ромњаја хем те чхавеа, а на јавере буќенцар.

• Е дајенге: Кеда то ром ка мангел те поможинел туке те аракхел е чхаве, мукх ле те керел адава. Ако на керела адава најшукар, ма критикујн ле, ов љубезно хем сикав леске сар те керел адава.

СО ВАКЕРЕЛА И БИБЛИЈА: „Ола ка овен јекх тело“ (1. Мојсеева 2:24). Иако иси тумен нево члени ки фамилија, ма бистре кај ту хем то брачно партнери сиен јекх тело. Трудинен тумен те ачховен паше јекх јекхеа.

Ромњален, сикавен тумаре роменге кај ценинена адава со ола хаљовена хем поможинена тумен. Тумаре лафија шај те овен сар „иљачи“ (Изреки 12:18). Ромален, вакерен тумаре ромњенге козом мангена лен хем ценинена лен. Фалинен лен башо адава со грижинена пе е фамилијаке (Изреки 31:10, 28).

„Никој те на родел пи корист, него и корист е јаверескири“ (1. Коринќаните 10:24). Секогаш кер адава со и најшукар те ромњаке или те ромеске. Сар ром хем ромни одвојнен туменге време те керен лафи, те вакерен туменге башо кола буќа ценинена тумен хем те шунен јекх јекхе. Ма овен себична кеда керела пе лафи башо интимна односија. Размислин башо потребе со иси те брачно партнере. И Библија вакерела: „Ма чхинавен тумен јекх јекхестар “ (1. Коринќаните 7:3-5). Адалеске, искрено керен лафи баши акаја бути. Кеда сиен стрплива хем хаљовена тумен, тумаро брако ка овел позорало.

СО ШАЈ ТЕ КЕРЕ:

• Ма бистрен те одвојнен туменге време само туменге е дујенге.

• Кер буќа со ка сикавен кај мангеа те ромња или те роме, сар на пример шај те пишине јекх шужи порака или те де тикно поклон.

СО ВАКЕРЕЛА И БИБЛИЈА: „Панда сар бут тикно пенџареа о света лила, кола со шај те керен ту гоѓавер те шај те спасине ту“ (2. Тимотеј 3:15). Планиринен сар ка сикавен тумаре чхаве. Ов шај те сикљовел панда англедер те бијанѓовел. Панда џикоте тано андре ко воги, ов шај те пенџарел тумаре гласија хем упри лесте влијајнела адава сар осетинена тумен. Читинен леске панда кеда тано бут тикно. Шај нане те хаљовел адава со читинена леске, ама адава ка поможинел ле те мангел те читинел кеда ка бајрол.

Никогаш нане рано те вакерен тумаре чхавеске башо Девел. Заедно леа молинен тумен е Јеховаске (5. Мојсеева 11:19). Чак кеда кхелена туменге заедно, вакерен леске башо буќа со керѓа лен о Јехова (Псалм 78:3, 4). Џикоте бајрола, о чхаво ка осетинел кобор тумен мангена е Јехова хем ка сикљол ов да те мангел ле.

СО ШАЈ ТЕ КЕРЕ:

• Молинен е Јехова те поможинел тумен сар те воспитинен тумаре чхаве.

• Бут пути вакерен е чхавеске башо буќа со мангена те сикавен ле. Аѓаар, панда таро тикнипа ка почминел те сикљол.