О Евреија секова берш славинена сине и Пасха ко 14 диве таро масек нисан. Адава керена ле сине те шај те сетинен пе кај о Јехова ослободинѓа лен таро ропство ко Египет хем ингарѓа лен ки Ветими пхув. Ко 33 берш а.е., о Исус хем лескере апостолија славинѓе и Пасха ки упруни соба ко јекх кхер ко Ерусалим. Ко крајо тари вечера, о Исус вакерѓа: „Јекх тумендар ка предајнел ман“. О апостолија бут изненадинѓе пе хем пучле ле: „А кој ка овел адава?“ О Исус одговоринѓа ленге: „Окова каске со ка дав акава маро“. Тегани денѓа о маро е Јуда Искариотеске. Одма пало адава, о Јуда уштило хем иклило тари соба.

Пало адава о Исус молинѓа пе, пхагља о маро хем денѓа ле пле апостоленге со ачхиле леа. Тегани вакерѓа ленге: „Хан таро акава маро. Ов претставинела мло тело, кова со ка дав ле баши туменде“. Пало адава леља мол, молинѓа пе хем денѓа ла е апостоленге. О Исус вакерѓа ленге: „Пиен тари акаја мол. Адава претставинела мло рат со ка дав ле те шај те овен простиме о гревија е манушенгере. Ветинава туменге кај ка овен царија манцар ко небо. Керен акава секова берш те шај те сетинен тумен ки манде“. О следбеникија е Исусескере керена акава секова берш ки исто рат. Адава состанок акана викинела пе е Господарескири вечера.

 Откеда завршинѓа и вечера, о апостолија почминѓе те акошен пе кој тано лендар најбаро. Ама, о Исус вакерѓа: „Најбаро тумендар тано адава со ки песте дикхела сар најтикно, сар најхари важно.

Тумен сиен мле амала. Вакерава туменге са со мангела мло Дад те вакерав туменге. Панда хари ка џав ки лесте ко небо. Тумен ка ачховен, хем о мануша ка џанен кај сиен мле ученикија кеда ка дикхен кај мангена тумен јекх јекхеа. Манген тумен сар ме со мангљум тумен“.

Ко крајо, о Исус молинѓа пе хем родинѓа таро Јехова те аракхел са лескере ученикон. Молинѓа е Јехова те поможинел лен те шај те керен о буќа заедно хем ко мир. Исто аѓаар, молинѓа пе те славинел пе е Девлескоро свето анав. Пало адава, о Исус хем о апостолија гиљавѓе фалбена гиља е Јеховаске хем иклиле аври. Похари авела сине о време те астарен е Исусе.