КО ПУРАНО време о џамутро или лескири фамилија дена сине бабахако е бојракере фамилијаке кеда пхандена сине пумаре лафија те шај те лен пе. Шај сине те дел пе сар бабахако скапоцена буќа, животне или паре. Понекогаш о бабахако дела пе сине аѓаар со о џамутро ваљани сине те керел бути. Адава шај те дикха ле таро е Јаковескоро случај кова со сине спремно те керел бути ефта берш е Рахелакере дадеске те шај те лел ла (1. Мој. 29:17, 18, 20). Соске керела пе сине адава?

И библиско изучувачка и Керол Маерс, вакерела: „О бабахако сине дендо е бојракере фамилијаке соске ленгири чхај нашти сине више те поможинел лен околу и нива хем о животне“. О бабахако шај исто аѓаар поможинела сине е дује фамилиенге те овен попаше, хем аѓаар шај сине о фамилие те поможинен јекх јекхеске кеда ка овен лен сине проблемија. Освен адава, о бабахако сикавела сине кај и чхај тани верими хем кај панда хари ка џал песке таро пле дадескоро кхер хем оттегани ка заштитинел ла хем ка грижинел пе лаке о ром наместо о дад.

О бабахако на значинела сине кај и ромни тани несаво предмети кова со шај сине те кинел пе или те бикинел пе. Ко јекх лил башо живото ко пурано Израел пишинела: „И обврска те дел пе бабахако е чхајакере фамилијаке шај те изглединел сар те пхене кинела пе е чхаја. Ама о бабахако дела пе сине те шај те учхарел пе адава со нашавела и фамилија — јекх члени кова со поможинела лен сине — а на сар цена со платинела пе те шај те лел пе ромни“ (Ancient Israel—Its Life and Institutions).

Авдиве, ко несаве пхувја о мануша понадари да дена бабахако. Кеда о родителија сој тане Сведокија родена бабахако, ваљани ленгири „разумност те овел пенџарди сариненге“, аѓаар со нане те роден повише таро адава сој разумно (Фил. 4:5; 1. Кор. 10:32, 33). Аѓаар, ка сикавен кај на мангена о паре хем кај нане алчна (2. Тим. 3:2). Исто аѓаар, кеда о родителија сој Сведокија на родена баро бабахако, тегани о џамутро на ка ваљани те одложинел о брако те шај те заработинел башо бабахако. Или на ка ваљани те чхинавел е пионерско службаја те шај те овел ле доволно паре башо бабахако.

Ко несаве пхувја о закони родела те дел пе бабахако. Ко асавке тхана о родителија сој Сведокија тане послушна башо асавке законија. Соске? Адалеске со о Девел родела таро пле слуге те овен послушна е властенге хем те икерен о законија кола со нане против е Јеховаскере законија (Рим. 13:1; Дела 5:29).