Спрема јекх анкета, 80 посто таро тинејџерија ки Америка молинена пе, ама само екваш лендар молинена пе секова диве. Сигурно несаве лендар пучена пе: „Дали и молитва тани само јекх начин те ослободине тут таро стрес или, палем, вклучинела нешто повише“?

•  Сој тани и молитва?

•  Дали о Девел шунела амен?

•  Башо со те молинав ман?

•  Со вакерена јавера терне?

 И молитва тани чачутно разговор амаре Створителеа кова со керѓа са. Замислин со значинела адава! Иако о Јехова тано побаро таро мануша ко секова поглед, ов „нане дур никастар амендар“ (Дела 17:27). Уствари, и Библија поттикнинела амен: „Овен паше е Девлеа, хем ов ка овел паше туменцар“ (Јаков 4:8).

 Сар шај те ове паше е Девлеа?

•   Јекх начин тано преку и молитва — аѓаар ту кереа лафи е Девлеа

•   Јавер начин тано преку о проучибе е Библијакоро — аѓаар о Девел „керела лафи“ туја.

 Асавки комуникација таро солдуј џене — и молитва хем о проучибе е Библијакоро — ка поможинел туке те овел тут зорало амалипе е Девлеа.

 „Те кере лафи е Јеховаја, е Најбареа ко цело универзум, тани и најбари чест со шај те овел јекхе мануше“ (Џереми).

 „Кеда ки молитва вакерава е Јеховаске мле најхор чувствија, овава попаше леа“ (Миранда).

 Шај верујнеа ко Девел, па чак молинеа тут леске, а сепак на сиан целосно уверимо кај шунела тут. Ама, и Библија вакерела кај о Јехова тано „адава со шунела о молитве“ (Псалм 65:2). Ој поттикнинела амен: „Са тумаро пхарипе фрден леске“. Соске? „Соске ов грижинела пе туменге“ (1. Петрово 5:7).

 Размислин: Сигурно одвојнеа време редовно те кере лафи тле паше амаленцар. Шај те кере адава е Девлеа да. Редовно молин тут леске аѓаар со ка користине лескоро лично анав, Јехова (Псалм 86:5-7; 88:9). И Библија вакерела: „Молинен тумен секогаш“ (1. Солуњаните 5:17).

 „И молитва тани разговор коте со вакерава мле небесно Дадеске са со иси ман ко вило“ (Мојзес).

 „Керава лафи е Јеховаја башо са, чак башо најтикне буќа, исто сар со би керава лафи ме дајаја или несаве паше амалинкаја“ (Карен).

 И Библија вакерела: „Ко са — молитваја, молбаја хем благодарибаја — вакерен е Девлеске со родена“ (Филипјаните 4:6).

 Дали адава значинела кај шај те молина амен башо амаре проблемија да? Оја! Ки Библија пишинела: „Фрде тло пхарипе е Јеховаске, хем ов ка поможинел тут“ (Псалм 55:22).

 Џанѓола пе, кеда молинеа тут е Девлеске, на ваљани те кере лафи само башо тле проблемија. „Ако родава е Јехова само кеда нешто ваљанела манге, саво амалипе тано адава?“, вакерела јекх чхај која со викинела пе Шантел. „Мислинава кај најангле ваљани те заблагодаринав ман леске, хем на само баши јекх бути, него башо повише.“

 Размислин: Башо кола буќа сиан благодарно? Башо кола трин буќа со случинѓе пе авдиве шај те заблагодарине тут е Јеховаске?

 „Чак нешто едноставно, сар јекх шужи лулуди, шај те поттикнинел амен те заблагодарина амен е Јеховаске ки молитва“ (Анита).

 „Размислин башо створиме буќа кола со посебно свиџинена пе туке или башо несаво библиско стихо кова со погодинела тло вило, хем пало адава заблагодарин тут е Јеховаске“ (Брајан).