Luka 18:1-43
18 Tegani vakergja lenge jekh sporedba bašo adava kobor tano važno sekogaš te molinen pe hem te na otkažinen pe:
2 „Ki jekh diz sine jekh sudija kova so na darala sine taro Devel hem na poštujnela sine e manušen.
3 A ki adaja diz isto agjaar sine jekh udovica, koja so stalno džala sine ki leste hem molinela le sine: ’Sudin pravedno maškar mande hem okoleste kasaja so tužinava man‘.
4 Nesavo vreme ov na mangela sine te pomožinel lake, ama ko krajo vakergja peske: ’Na darava taro Devel hem na poštujnava nijekhe manuše,
5 ama akaja udovica adaleske so dosadinela man, ka pomožinav lake te dobinel i pravda, te šaj te na avel više hem te na mučinel man ple molbencar‘“.
6 Tegani o Gospodari vakergja: „Dali šungjen so vakergja o sudija, iako tano nepravedno?
7 Nane li o Devel te kerel te dobinen pravda okola soj birime lestar, kola so rodena le dive hem rat? A osven adava ov tano strplivo lencar.
8 Vakerava tumenge, ov ka kerel ola sigate te dobinen i pravda. Ama o manušikano Čhavo* keda ka avel, ka arakhel li asavki vera ki phuv?“
9 A okolenge kola so ki peste dikhena sine sar but pravedna, a ko javera dikhena sine sar potele pestar, vakergja akaja sporedba:
10 „Duj manuša gele ko hrami te molinen pe. Jekh lendar sine farisei,* a o javer sine danočniko.
11 O farisei terdilo hem agjaar molingja pe ki peste: ’Devla, blagodarinava man tuke so na sium sar o javera manuša: čora, nepravedna, nemoralna ili sar akava danočniko.
12 Postinava duj puti ko kurko, hem taro sa so zarabotinava dava desetok‘.
13 A o danočniko tergjola sine ki strana hem na mangela sine ni te vazdel ple jakhja te dikhel ko nebo, nego khuvela pe sine ko kolin hem vakerela sine: ’Devla, ov milostivo mancar, soske sium grešniko!‘
14 Vakerava tumenge, o danočniko gelo peske khere popravedno taro farisei. Soske, sekoj so vazdela pe, ka ovel ponižimo, a koj tano ponizno, ka ovel vazdimo“.
15 A o manuša anena sine ki leste pumare tikne čhaven te šaj te blagoslovinel len. Keda o učenikija dikhle adava, holjangje hem vakergje lenge te ciden pe.
16 Ama o Isus vikingja e tikne čhaven ki peste hem vakergja: „Mukhen e tikne čhaven te aven ki mande hem ma čhinaven len! Soske, asavkenge tano dendo e Devleskoro Carstvo.
17 Čače vakerava tumenge, koj nane te prifatinel o Carstvo e Devleskoro sar jekh tikno čhavo, nane te khuvel ki leste“.
18 A jekh poglavari pučlja le: „Učitele, tu kova sian šukar, so mora te kerav te šaj te dobinav večno životo?“
19 O Isus vakergja leske: „Soske vakerea mange kaj sium šukar? Nikoj nane šukar, osven jekh Devel.
20 Tu džanea o zapovedija: ’Ma ker preljuba, ma mudar, ma čor, ma de hovavni izjava sar svedoko, poštujn tle dade hem tle daja‘“.
21 A ov vakergja leske: „Me sa akava kerava taro mlo ternipe“.
22 Keda šungja adava, o Isus vakergja leske: „Panda jekh buti falinela tuke: bikin sa so isi tut hem o pare ingar len e čorolenge, pa ka ovel tut barvalipe ko nebo. Tegani ava hem ov mlo sledbeniko!“
23 A ov keda šungja akava, but razočaringja pe, soske sine but barvalo.
24 Tegani o Isus dikhlja le hem vakergja: „Kobor ka ovel pharo e barvalenge te khuven ko e Devleskoro Carstvo!
25 Polokho ka ovel te nakhavel pe kamila tari suv, nego o barvalo manuš te khuvel ko e Devleskoro Carstvo“.
26 Okola so šungje adava, pučle: „Tegani koj šaj te spasinel pe?“
27 A ov vakergja: „Adava so našti te keren o manuša, o Devel šaj te kerel“.
28 Tegani o Petar vakergja: „Ake, amen mukhlem sa amare bukja hem džaja pali tute“.
29 A o Isus vakergja lenge: „Čače vakerava tumenge, nijekh na mukhlja kher, ili romnja, ili phralen, ili roditelen, ili čhaven baši e Devleskoro Carstvo,
30 a te na dobinel but poviše ko akava vreme, a ko vreme so avela* hem večno životo“.
31 Tegani cidingja ki strana e 12 apostolen hem vakergja lenge: „Ake, džaja ko Erusalim hem sa so pišingje o prorokija bašo manušikano Čhavo* ka ispolninel pe.
32 Ka predajnen le e manušenge taro javera nacie, ka asan leske, ka vredžinen le hem ka čhungaren le.
33 Otkeda ka maren le kamšikoja, ka mudaren le, a ko trito dive ka voskresninel“.
34 A o apostolija na džanena sine so značinena adala lafija, hem na halile bašo so kerela lafi.
35 Džikote o Isus avela sine paše ko Erihon, jekh korolo manuš bešela sine uzo drumo hem mangela peske sine.
36 Keda šungja kaj but manuša nakhena, počmingja te pučel e javeren so ulo.
37 Ola vakergje leske: „Nakhela o Isus o Nazarekjanco!“
38 Tegani glasno vikingja: „Isus, tu o Čhavo e Davideskoro, žalin man!“
39 Okola so sine anglal vakergje leske te čutinel, ama ov vikinela sine panda poglasno: „Tu o Čhavo e Davideskoro, žalin man!“
40 Tegani o Isus ačhilo hem zapovedingja te anen leske adale manuše. Keda o manuš alo paše, o Isus pučlja le:
41 „So mangea te kerav tuke?“ Ov vakergja: „Gospodare, ker palem te dikhav!“
42 A o Isus vakergja leske: „Palem dikh! Tli vera sasljargja tut“.
43 O manuš odma počmingja te dikhel hem počmingja te džal pali leste hem te falinel e Devle. Hem celo narodo so dikhlja adava, počmingja te falinel e Devle.
