Matej 20:1-34
20 O nebesno Carstvo tano sar jekh manuš kova so isi le niva drakhencar, hem kova so uštilo rano sabajle te rodel rabotnikija kola so ka keren buti leske ki niva.
2 Otkeda dogovoringja pe e rabotnikoncar te platinel len po jekh denarij* ko dive, bičhalgja len te džan ki leskiri niva.
3 Keda iklilo palem ko okolu enja o saati* sabajle, dikhlja javeren da sar tergjona ko ploštad soske nikoj na lelja len bukjake,
4 hem vakergja lenge: ’Džan tumen da ki niva, hem ka platinav tumen kobor so valjani‘.
5 Tegani ola gele. Palem iklilo ko okolu 12 o saati* hem ko okolu trin o saati* paloručko hem kergja o isto.
6 Ko krajo iklilo ko okolu pandž o saati* paloručko hem arakhlja javeren sar tergjona, pa pučlja len: ’Soske tergjona akate celo dive bizi buti?‘
7 Ola odgovoringje leske: ’Soske nikoj na lelja amen bukjake‘. A ov vakergja lenge: ’Džan tumen da ki niva‘.
8 Keda počmingja te rakjol, o gazda vakergja okoleske so vodinela i buti ki niva: ’Vikin e rabotnikon hem platin lenge. Počmin okolendar kola so ale posledna pa sa dži ko prva‘.
9 Keda ale okola so počmingje te keren buti ko okolu pandž o saati* paloručko, sekoj dobingja po jekh denarij.*
10 Keda ale o prva, ola mislingje peske kaj ka dobinen poviše, ama ola da dobingje po jekh denarij.
11 Samo so dobingje i plata, počmingje te buninen pe protiv o gazda
12 hem vakergje: ’Akala so ale posledna kergje samo jekh saati buti, a tu platingjan len isto sar amende, iako kergjem naporno buti celo dive hem thabilem ko kham!‘
13 A ov odgovoringja jekheske lendar: ’Amala, me na kergjum tuke ništo lošno. Tu soglasingjan tut te kere buti bašo jekh denarij, neli?
14 Le adava soj tlo hem dža. Me mangava te dav akaleske so alo posledno isto kobor so dava tuke.
15 Nane man li pravo te kerav so mangava mle parencar? Ili sian zavidlivo* adaleske so sium šukar lencar?‘*
16 Agjaar o posledna ka oven prva, a o prva ka oven posledna“.
17 Džikote džana sine ko Erusalim, o Isus cidingja e 12 učenikon taro narodo hem ko drumo vakergja lenge:
18 „Ake, džaja ko Erusalim, hem e manušikane Čhave* ka predajnen le e glavna sveštenikonge hem e učitelenge e zakoneskere. Ola ka osudinen le te ovel mudardo
19 hem ka predajnen le e manušenge taro javera nacie te asan leske, te maren le kamšikoja hem te kovinen le ko stubo, a ko trito dive ka voskresninel“.
20 Tegani i daj e Zevedeeskere čhavengiri ali ko Isus zaedno ple čhavencar hem pokloningja pe leske te šaj te rodel lestar nešto.
21 Ov pučlja la: „So mangea?“ Oj odgovoringja leske: „Keda ka ove Cari ko tlo Carstvo, ker me duj čhave te bešen uzi tute, jekh tari tli desno a jekh tari tli levo strana“.
22 O Isus vakergja: „Na džanena so rodena. Šaj li te pien tari čaša kolatar so ka pijav me?“ Ola odgovoringje leske: „Oja šaj“.
23 A ov vakergja lenge: „Čače ka pien tari mli čaša, ama te bešen tari mli desno ili levo strana, adava našti me te odlučinav. Adala thana ka den pe okolenge kaske so mo Dad odlučingja te del len“.
24 Keda o javera 10 učenikija šungje bašo adava, holjangje e Jakoveske hem e Jovaneske.
25 Ama o Isus vikingja e učenikon ki peste hem vakergja lenge: „Džanena kaj o carija taro akava sveto vladinena upro narodo, a e važna manušen isi len avtoriteti upro manuša.
26 Ama maškar tumende ma te ovel agjaar. Nego koj mangela te ovel baro maškar tumende, neka ovel tumenge sluga,
27 hem koj mangela te ovel prvo maškar tumende, neka ovel tumenge robo.
28 Agjaar, o manušikano Čhavo* da na alo te služinen leske, nego alo te služinel hem te del plo životo sar otkupnina bute dženenge“.
29 A keda iklile taro Erihon but manuša džana sine pali leste.
30 Tegani duj korole manuša bešena sine kaj o drumo hem keda šungje kaj o Isus nakhela, vikingje: „Gospodare, žalin amen, tu o Čhavo e Davideskoro!“
31 O narodo vakerela lenge sine te kjutinen, a ola vikinena sine panda poglasno: „Gospodare, žalin amen, tu o Čhavo e Davideskoro!“
32 Tegani o Isus ačhilo, vikingja len hem pučlja: „So mangena te kerav tumenge?“
33 Ola vakergje leske: „Gospodare, neka phravgjon amare jakhja“.
34 E Isuseske pelo žal, adaleske pipingja lengere jakhja hem ola počmingje odma te dikhen. Palo adava gele pali leste.
Footnotes
^ Doslovno: „ko trito saati“ (otkeda ikljola o kham).
^ Doslovno: „ko šovto saati“.
^ Doslovno: „ko enjato saati“.
^ Doslovno: „ko 11-to saati“.
^ Doslovno: „ko 11-to saati“.
^ Doslovno: „isi tut zlobno jakh“.
^ Ili: „darežlivo“.
^ Dikh ko rečniko bašo „Manušikano Čhavo“.
^ Dikh ko rečniko bašo „Manušikano Čhavo“.
