O šukar haberi avela taro Jehova, o bahtalo Devel, kova so mangela o familie te oven bahtale (1. Timotej 1:11). Ov kergja o brako. O zakonsko venčimo brako kerela o roditelija hem o čhave te oven sigurna, mangle hem bahtale. O hristijanija valjani te počitujnen o zakonija ki lengiri phuv bašo venčibe. Čitin Luka 2:1, 4, 5.

Sar o Devel dikhela ko brako? Ov mangela o brako maškar o rom hem i romni te ovel trajno. O Jehova mangela ola te oven verna jekh jekheske (Evreite 13:4). Ov mrzinela o razvod (Malahija 2:16). Ama mukhela jekh hristijani te razvedinel pe hem palem te venčinel pe samo ako leskoro bračno partneri kergja preljuba. Čitin Matej 19:3-6, 9.

O Jehova kergja e murše hem e džuvlja te pomožinen pe jekh jekhea (1. Mojseeva 2:18). O rom tano poglavari, adaleske ov valjani te grižinel pe bašo ple familijakere materijalna potrebe hem te sikavel la bašo Devel. Ov valjani nesebično te mangel ple romnja. O rom hem i romni valjani te mangen pe hem te počitujnen pe. Te šaj te ovel len bahtalo brako valjani te sikljon te prostinen jekh jekheske, adaleske so solduj tane nesovršena. Čitin Efešanite 4:31, 32; 5:22-25, 33; 1. Petrovo 3:7.

Ako isi tumen problemija ko brako, solduj džene valjani te trudinen tumen te sikaven mangipe jekh jekheske  (1. Korinkjanite 13:4, 5). I Biblija na vakerela kaj o odvojbe tano rešenie bašo obična problemija ko brako. Čitin 1. Korinkjanite 7:10-13.

O Jehova mangela te oven bahtale. Ov dela tumen najšukar sovetija adaleske so mangela te uživinen ko tumaro ternipe. O Devel mangela te šunen tumare roditelen adaleske so ola tane mudra hem iskusna (Kološanite 3:20). Isto agjaar, o Jehova mangela te osetinen i bari radost so avela taro adava so sien poslušna Leske hem leskere čhaveske. Čitin Propovednik 11:9–12:1; Matej 19:13-15; 21:15, 16.

Tumen sar roditelija valjani te keren but buti te šaj tumare čhaven te ovel len sa so valjani (1. Timotej 5:8). Ama, te šaj tumare čhave te oven bahtale, isto agjaar, valjani te sikaven len te mangen e Devle hem te sikljoven lestar (Efešanite 6:4). Keda o čhave ka dikhen kaj tumen mangena e Devle, adava šaj but te vlijajnel ko lengere vile. Keda sikavena len tari Biblija, pomožinena tumare čhaven ispravno te razmislinen. Čitin 5. Mojseeva 6:4-7; Izreki 22:6.

E čhavenge valjani pofalba hem ohrabruvanje. Isto agjaar, valjani lenge vospituvanje hem sovetija. Keda tumen kerena akava, zaštitinena len te na keren nešto so ka anel lenge lošna posledice (Izreki 22:15). Ama, nikogaš na valjani te oven prestroga hem te preterinen. Čitin Kološanite 3:21.

E Jehovaskere svedokija ikalge nekobor lila baši o roditelija hem o čhave. Akala lila temelinena pe ki Biblija. Čitin Psalm 19:7, 11.