Ko purano vreme, o Izraelcija dinđe desetak a sar deo andi olengi služba e Devlese. O Devel phenđa e Izraelcenđe: „Svako berš odvojin o desetak ando sa odova so bijani ti njiva“ (Ponovljeni zakoni 14:22).

 I zapovest te del pe o desetak pisini ko Mojsijeso zakon, kova o Devel dinđa e Izraelcenđe ko purano vreme. Sebepi so o hrišćanija avdije na valjani te ićeren pe ko Mojsijeso zakon, olendar na rodela pe te den o desetak (Kološanima 2:13, 14). Ako neko mangela te del prilog, ov odova valjani te ćerel „sar so rešinđa ko po vilo, na bizi volja ja ki sila, sose o Devel mangela okole kova radosno dela“ (2. Korinćanima 9:7).

•  O desetak ko Purano zavet

•  O desetak ko Nevo zavet

 Ko deo andi Biblija kova tano bute manušenđe penđardo sar Purano zavet, o lafi desetak pomini pe nekobor putija. Ked pomini pe odova lafi but putija odnosini pe ko period palo odova so e Mojsijeso zakon hine dindo e Izraelcenđe. Ama, nekobor putija odnosini pe ko period angleder odova.

Angleder e Mojsijeso zakon

 O prvo manuš kova dinđa o desetak hine o Avram ja o Avraham (Postanak 14:18-20; Jevrejima 7:4). Odova hine poklon kova o Avram jekhvar dinđa e kraljese ando Salim kova hine hem svešteniko. Ništa na mothovi so o Avraham ja olese ćhave palem dinđe le desetak.

 O dujto manuš kova pomini pe ki Biblija so dinđa desetak hine e Avrahameso unuko, o Jakov. Ov obećinđa e Devlese so ako ka blagoslovini le, ka del le „desetak ando sa so ka dobini“ (Postanak 28:20-22). Premalo disave izučavaocija andi Biblija, verovatno o Jakov dinđa životinje sar desetak. O Jakov dinđa obećanje so ka del desetak, ama avera andi olesi porodica na hine len obaveza te den desetak.

Talo e Mojsijeso zakon

 O Izraelcija ko purano vreme valjanđe te den desetak te podupirinen pekle verska aktivnostija.

•   Ando desetak odvojinđa pe aso Levitija hem aso sveštenikija kola na hine len pikli phuv (Brojevi 18:20, 21). O Levitija dobinđe desetak ando manuša hem o dešto deo ando desetak dinđe e sveštenikonenđe, hem odova so dinđe hine najšukar so hine len (Brojevi 18:26-29).

•   Valjanđe te den pana jekh beršeso desetak, kova koristinđa e Levitenđe hem avere Izraelcenđe (Ponovljeni zakoni 14:22, 23). Odova desetak koristinđa pe aso Izraelska porodice ko disave posebna praznikija hem ko krajo ando svako trito berš o desetak delinđa pe e ćororenđe (Ponovljeni zakoni 14:28, 29; 26:12).

 Sar računinđa pe o desetak? Svako berš o Izraelcija odvojinđe o dešto deo ando odova so bijanđa olengi phuv (Levitska 27:30). Ako manglje te den pare umesto odova so bijanđa olengi phuv, on morandilje te dodajinen pana 20 posto (Levitska 27:31). Isto ađahar, on morandilje te den dešto deo andi stoka (Levitska 27:32).

 Sar o Izraelcija birinđe kola životinje ka den? Đi o životinje ikljona hine ando tor on bi brojinena hem svako dešto životinja valjanđa te del pe sar desetak. On na isminđe te menjinen odola životinje niti te biknen len aso pare (Levitska 27:32, 33). Ama, ked dinđa pe o desetak ko beršese praznikija, o životinje šaj hine te menjinen pe aso pare. Sebepi odova, hine polokho e Izraelcenđe kola ko praznikija avena hine dural (Ponovljeni zakoni 14:25, 26).

 Ked o Izraelcija dinđe desetak? Svako berš o Izraelcija dinđe desetak (Ponovljeni zakoni 14:22). Ama, svako eftato berš hine hari averćhane. Odova berš hine sabat hem o Izraelcija ništa na sejinđe (Levitska 25:4, 5). Odolese, odova berš na dinđa pe o desetak ando odova so bijanđa i phuv. Svako trito hem šovto berš, o Izraelcija o dujto desetak delinđe e ćororencar hem e Levitencar (Ponovljeni zakoni 14:28, 29).

 Savi kazna hine ako neko na dinđa desetak? Ko Mojsijeso zakon na hine odredimi kazna ako neko na dinđa desetak. On valjanđe te den desetak sose đanđe so odova tano ispravno, a na sose darandilje andi kazna. On valjanđe te phenen anglo Jehova so dinđe desetak hem te roden lestar blagoslov (Ponovljeni zakoni 26:12-15). Ked neko na dinđa desetak, anglo Devlese jaćha odova hine samći ćorela olestar (Malahija 3:8, 9).

 Da li o desetak hine baro pharipe e manušenđe? Na. O Devel obećinđa pe narodose so ako anena o desetak, ov ka ćhorel o blagoslovija upro olende hem sa ka ovel len (Malahija 3:10). Ki aver strana, ked o narodo na dinđa desetak, on but patinđe. On više na hine len e Devleso blagoslov hem na hine len korist andi služba koja ćerđe o sveštenikija hem o Levitija sose on na hine len sostar te živinen hem morandilje te ćeren buti (Nemija 13:10; Malahija 3:7).

 Đi o Isus hine ki phuv, e Devlese sluge pana valjanđe te den desetak. Ama, palo e Isuseso meribe, ando Devlese sluge više na rodela pe te den desetak.

Ko Isuseso vreme

 Premalo odova so pisini ko Nevo zavet, o Izraelcija pana dinđe o desetak ked o Isus hine ki phuv. Ov phenđa so on valjani te den desetak, ama osudinđa e religiozno vođen kola dinđe desetak ama na ćerđe odova soj tano považno premalo Zakon. Na mothovđe pravda, milosrđe hem vernost (Matej 23:23).

Palo Isuseso meribe

 Palo Isuseso meribe više na rodinđa pe ando hrišćanija te den desetak. Ked o Isus dinđa po životi sar otkupno žrtva, o manuša više na valjanđe te ićeren pe ko zapovestija ando Mojsijeso zakon, maškaro kola hine hem i zapovest te del pe desetak (Jevrejima 7:5, 18; Efešanima 2:13-15; Kološanima 2:13, 14).