O Devel čerdža amaro telo odobor šukar so šaj kokri te sačaripe. Ked čhinamen, kušamen, ja posavamen, tegani amaro telo sigate čerela ko odova te čhinavi o rat te thavdel, bajačeri amare vene, sačari i rana hem zorjačeri o mas.

RAZMISLIN AKALJESTAR: Ako o Devel čerdža amaro telo kokri te sačari o rane, kobor pana pobuter valjani te verujina ko odova so ov dija po lafi so ka sačarimen ked hijam dukhavde andral ko vilo? Ki Biblija pisini: „Ov sačari okoljen soj tane phage viljeso, hem pačari oljenge dukhavde rane“ (Psalam 147:3). Ako pana isitu dukh sebepi so nakhljan diso lošno, da lji šaj te verujine so o Jehova ka pačari teklje rane kola akana isitu hem kola šaj te oventu?

O Devel phenela: „Ma dara, sose me hijum tuva. Ma akhar gajlja, sose me hijum to Devel. Me ka zorjačeravtu hem ka pomožinavtu“ (Isaija 41:10). Ked džana so o Jehova akhari gajlja amendar, tegani ka ovelmen rahati andral hem zoraljipe kova pomožinimen te nakha sa o pharipa. O apostol Pavle pheja so o rahati kova isimen andral tano „e Devljeso rahati kova nijekh godi našti te haljol.“ O Pavle pana vačerdža: „Sa šaj te čerav prekalo okoljeste kova delama zoraljipe“ (Filipskonendže 4:4-7, 9, 13).

E Devljeso Lafi pomožini amen te zorjačera amari vera ko lafija kola o Jehova dija ko vakti so avela. Na primer, o Pučaribe 21:4, 5 vačeri so ka čerel o Devel hem sose šaj te verujina oljese.

• „Ov ka kosel svako asvi“. O Jehova ka cidel sa amare muke hem gajlje, čak okola so averendže dičhona but tikne.

• „Okova so bešela ko presto“ ki nebesko slava, o Svemoćno Kralj kova čerdža sa, ka mothovi piklji moć hem vlast adžahar so ka čhinavi o muke hem ka pomožini amen ko sa so valjani amendže.

• O Jehova phenela so ko oljese lafija šaj te „verujinipe hem čačutne tane.“ E Devljeso nav hem odova savo tano ov mothovi so čače ka čerel sa so pheja.

„’Ov ka kosel svako asvi kotar oljenge jačha, na te ovel više meribe, ni muke, ni rojbe ni dukha. Na te ovel okova so hine angljeder.‘ Hem okova so bešela ko presto vačerdža: ’Dikh, sa nevo čerava!‘ Pana vačerdža: ’Pisin, sose ko akala lafija šaj te verujinipe hem čačutne tane‘“ (Pučaribe 21:4, 5).

O svemir hem i Biblija mothovena savo tano amaro nebesko Dad. Sa soj tano čerdo bizo lafija čhivelamen te manga te pendžara e Devlje hem te ova popaše oljeja. A i Biblija jasno vačeri amendže te čera odova. Oj phenela: „Oven paše e Devljeja, hem ov ka ovel paše tumenca“ (Jakoveso 4:8). Isto adžahar, ko Čeriba e apostolengo 17:27 pisini: „Ov nane dur nijekhestar amendar.“

Ako odvineja vakti te pendžare e Devlje, tegani pobuter ka ove uverimo so „ov akhari gajlja“ tutar (1. Petareso 5:7). Sar ka pomožiniče odova so džaneja so o Jehova akhari gajlja tutar?

Te dikha o primer ando Toru kova tano andi Japan. Kotar tiknipe oljesi daj sikadžalje ando Jehova. Ama, ked barilo ov khudža ki jekh japansko mafija koja vičinipe jakuza. Ov vačeri: „Mislijum so o Devel mrzinima hem kazninima adžahar so merena o manuša kola hine uzo mande hem okola kas mangljum.“ O Toru phenela so odova lošno than hem odova sar razmislije avera čerdželje te ovel manuš „kova nanelje vilo.“ Ov vačeri so hine oljese ki godi te čerel: „Mangljum te merav terno palo odova so ka mudarav džikas koj tano popendžarutno mandar, te šaj moklo nav te ačhol pendžarutno.“

Ama, ked o Toru hem oljesi romni i Hana počmije te sikljon andi Biblija, ov but promija poklo  dživdipe hem peklje tabijatija. I Hana vačeri: „Dikhljum sar mo rom prominipe.“ O Toru phenela ko so tano akana uverimo: „Isi Devel kova čače akhari gajlja svakonestar amendar. Ov na mangela nijekh te merel hem mangela te oprostini okoljendže kola čače perena pišmani sebepi so grešije. Ov šunela odova so amen našti te vačera nikase hem so nijekh našti te haljol. Pana hari, o Jehova ka cidel sa o problemija, o muke hem o dukha. Ov hem akana pomožinimen adžahar so čerela diso so ni na perela amendže ki godi. Ov mangelamen hem pomožinimen ked tano amendže pharo“ (Psalam 136:23).

O primer ando Toru mothovi amendže kobor tano šukar te džana so o Devel pana hari ka cidel sa o pharipa hem ka kosel svako asvi. Nanemen samo nada ko vakti so avela, nego hem akana šaj te živina pošukar. Iako avdije ko sveto isi pherdo muke, amen šaj čače te verujina so o Devel mangelamen hem akhari gajlja amendar.